ଭୁବନେଶ୍ୱର ୨୦।୯ (ବ୍ୟୁରୋ):ଦୁର୍ଗା ପୂଜା ପାଇଁ ରାଜଧାନୀ ଭୁବନେଶ୍ୱରରେ ପ୍ରସ୍ତୁତି ଜୋର୍ଦାର ଚାଲିଛି। ଧୁମ୍ଧାମ୍ରେ ପୂଜା କରିବାକୁ ଆୟୋଜକମାନେ ଲାଗି ପଡିଥିବାବେଳେ ପୂଜା ବୁଲିବାକୁ ସହରବାସୀ ଉତ୍ସାହର ସହ ଚାହିଁ ରହିଛନ୍ତି। ଦୁଇବର୍ଷ ପରେ ଏଥର ବିନା କଟକଣାରେ, ଭକ୍ତଙ୍କ ମେଳରେ ଦୁର୍ଗାପୂଜା ହେଉଥିବାରୁ ଅଧିକ ଭିଡ଼ ହେବାର ସମ୍ଭାବନା ରହିଛି। ବିଶେଷକରି ପୂଜାମଣ୍ଡପ ନିକଟରେ ପାର୍କିଂ ଓ ଟ୍ରାଫିକ୍ ଜାମ୍ ଲୋକଙ୍କ ପାଇଁ ବଡ଼ ସମସ୍ୟା ଆଣିବ। ତେଣୁ ପାର୍ବଣ ଭିଡ଼ ପରିଚାଳନା କମିଶନରେଟ ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରିବ। ଏବେଠୁ ଆବଶ୍ୟକ ପଦକ୍ଷେପ ନିଆ ନ ଗଲେ ପୂଜା ବୁଲିବାକୁ ଆସି ଲୋକେ ରାସ୍ତାରେ ଘଣ୍ଟା ଘଣ୍ଟା ଧରି ଫସିବା ଆଶଙ୍କା ରହିଛି।
ରାଜଧାନୀରେ ଏଥର ୧୭୦ରୁ ଅଧିକ ମଣ୍ଡପରେ ଦୁର୍ଗାପୂଜା ଆୟୋଜନ କରାଯାଉଛି। ଏଥିମଧ୍ୟରୁ ଜାତୀୟ ରାଜପଥ ପାର୍ଶ୍ୱ ଓ ଜନଗହଳିପୂର୍ଣ୍ଣ ଅଞ୍ଚଳରେ ଅଧିକାଂଶ ମଣ୍ଡପ ରହିଛି। ରସୁଲଗଡ଼ ଦୁର୍ଗାପୂଜା ମଣ୍ଡପରେ ଏଥର ଦିଲ୍ଲୀ ଅକ୍ଷରଧାମ ମନ୍ଦିର ତୋରଣ ନିର୍ମାଣ କରାଯାଉଛି। ଜାତୀୟ ରାଜପଥ ପାର୍ଶ୍ୱ ତଥା ସହରର ପ୍ରମୁଖ ଛକରେ ପୂଜା ହେଉଥିବାରୁ ଏଠାରେ ଅଧିକ ଗହଳି ହୋଇଥାଏ। କିନ୍ତୁ ଏଠାରେ ସେପରି ସ୍ବତନ୍ତ୍ର ପାର୍କିଂ ବ୍ୟବସ୍ଥା ନାହିଁ। ଏଥିସହ ଓଭରବ୍ରିଜ ତଳ ସର୍ଭିସ ରୋଡ୍ରେ ଗାଡ଼ି ଚଳାଚଳ ଏବଂ ମଣ୍ଡପକୁ ଯିବାକୁ ବିଭିନ୍ନ ପାର୍ଶ୍ୱରୁ ଲୋକମାନେ ରାସ୍ତା ପାର ହେବେ। ଏସବୁ କାରଣ ପାଇଁ ଏଠାରେ ଟ୍ରାଫିକ୍ ସମସ୍ୟା ଦେଖାଦେବ। ଭିଡ଼ ନିୟନ୍ତ୍ରଣ କରିବା ପୋଲିସ ପାଇଁ ବଡ଼ କଷ୍ଟକର ହେବ। ସେହିଭଳି ଜାତୀୟ ରାଜପଥ ପାର୍ଶ୍ୱରେ ଥିବା ସହରର ଅନ୍ୟତମ ନୟାପଲ୍ଲୀ ଦୁର୍ଗା ପୂଜାମଣ୍ଡପ ନିକଟରେ ମଧ୍ୟ ପାର୍କିଂ ବ୍ୟବସ୍ଥା ନାହିଁ। ଏଠାରେ ମଧ୍ୟ ସମାନ ସମସ୍ୟା ଉପୁଜିବ ବୋଲି ଆଶଙ୍କା କରାଯାଉଛି। ଅନ୍ୟପକ୍ଷରେ କଟକ ରୋଡ୍ରେ ଅଧିକାଂଶ ପୂଜା ମଣ୍ଡପ ରହିଛି। ଅନ୍ୟ ଦିନଗୁଡ଼ିକରେ କଟକ ରୋଡ଼ରେ ପ୍ରବଳ ଭିଡ଼ ସୃଷ୍ଟି ହୁଏ। ବମିଖାଲ ଓ ଷ୍ଟେଶନ ବଜାର ଭଳି ବଡ଼ ପୂଜା ମଣ୍ଡପ ରହିଥିଲେ ମଧ୍ୟ ଏସବୁ ସ୍ଥାନରେ ପାର୍କିଂ ବ୍ୟବସ୍ଥା କରାଯାଇନାହିଁ। ପୂଜା ବୁଲିବାକୁ ଆସିବାକୁ ଥିବା ଲୋକେ ନିଜ ବାଇକ ଓ କାର ପାର୍କିଂ କରିବା ବଡ଼ ସମସ୍ୟା ହେବ। ତେବେ ରାଜଧାନୀରେ ପୂର୍ବ ଅପେକ୍ଷା ଜନସଂଖ୍ୟା ସହ ଗାଡ଼ି ସଂଖ୍ୟା ମଧ୍ୟ ବୃଦ୍ଧି ହୋଇଛି। ବିଭିନ୍ନ ଛକଗୁଡ଼ିକରେ ଟ୍ରାଫିକ ସମସ୍ୟା ଦେଖାଯାଉଛି। ପାର୍ବଣରେ ଏହି ସମସ୍ୟା ଦୁଇଗୁଣ ହେବାର ଆଶଙ୍କା ଥିବାରୁ କମିଶନରେଟ ପୋଲିସ ପାଇଁ ଚିନ୍ତାର କାରଣ ପାଲଟିଛି।
ଏନେଇ ଦ୍ୱୈତନଗରୀ ସିଟି ଟ୍ରାଫିକ୍ ଡିସିପି ଠାକୁର ପ୍ରସାଦ ପାତ୍ର କହିଛନ୍ତି, ରାସ୍ତାଘାଟରେ ପାର୍କିଂ ନ କରିବାକୁ ଲୋକଙ୍କୁ ଆମେ ଅନୁରୋଧ କରିବୁ। ଯେଉଁ ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଛି ସେଠାରେ ପାର୍କିଂ କରି ମଣ୍ଡପ ନିକଟକୁ ଆସିବାକୁ କୁହାଯିବ। ପ୍ରତ୍ୟେକ ମେଢ଼ ପାଇଁ ପୋଲିସ ମୁତୟନ କରାଯିବ। ଟ୍ରାଫିକ୍ ପାଇଁ ଯେଉଁ ସ୍ଥାନରେ ୱାନ୍ ୱେ ଦରକାର ସେନେଇ ବ୍ୟବସ୍ଥା କରାଯିବ। ଭିଡ଼ ନିୟନ୍ତ୍ରଣ ପାଇଁ ଲୋକଙ୍କୁ ବାଟ କଢ଼େଇ ନିଆଯିବ ବୋଲି ଡିସିପି ପାତ୍ର କହିଛନ୍ତି।