ଅକ୍ଲାଣ୍ଡ, ୫।୧୨- ନ୍ୟୁଜିଲାଣ୍ଡ କ୍ରିକେଟରୁ ଅବସର ଘୋଷଣା କରିଛନ୍ତି ବିସ୍ଫୋରକ ବ୍ୟାଟ୍ସମ୍ୟାନ କୋରି ଆଣ୍ଡରସନ। ସେ ଆମେରିକାର ମେଜର ଲିଗ୍ କ୍ରିକେଟ ଟି୨୦ ଲିଗ୍ରେ ୩ ବର୍ଷ ଖେଳିବା ପାଇଁ ଚୁକ୍ତି କରିଛନ୍ତି। ଅନ୍ତର୍ଜାତୀୟ ସ୍ତରରେ ନ୍ୟୁଜିଲାଣ୍ଡ ପକ୍ଷରୁ ଖେଳିବା ମୋ ଲାଗି ସମ୍ମାନର ବିଷୟ। ମୁଁ ଦେଶ ପାଇଁ ଆହୁରି ଖେଳି ସଫଳତା ଆଣିବାକୁ ଚାହେଁ। କିନ୍ତୁ ବେଳେବେଳେ ଭିନ୍ନ ସୁଯୋଗ ମିଳେ, ଯାହା କେହି କେବେ ଚିନ୍ତା ମଧ୍ୟ କରି ନ ଥାନ୍ତି ବୋଲି ଆଣ୍ଡରସନ କହିଛନ୍ତି।
୨୦୧୩ରେ ଅନ୍ତର୍ଜାତୀୟ ସ୍ତରରେ ପଦାର୍ପଣ କରିଥିବା ଅଲରାଉଣ୍ଡର ୩ଟି ଫର୍ମାଟରେ ନ୍ୟୁଜିଲାଣ୍ଡ ପକ୍ଷରୁ ଖେଳିଥିଲେ ୯୩ ମ୍ୟାଚ୍। ୨୦୧୩ରେ ଓ୍ବେଷ୍ଟଇଣ୍ଡିଜ ବିପକ୍ଷ ଦିନିକିଆ ମ୍ୟାଚ୍ରେ ସେ ୩୬ ବଲରେ ଶତକ ହାସଲ କରି ସଭିଙ୍କ ଦୃଷ୍ଟି ଆକର୍ଷଣ କରିଥିଲେ। ସେତେବେଳେ ତାହା ଥିଲା ଦିନିକଆ କ୍ରିକେଟ ଇତିହାସର ଦ୍ରୁତତମ ଶତକ। ତାଙ୍କୁ ୭.୫ କୋଟି ଟଙ୍କାରେ କିଣିଥିଲା ଆଇପିଏଲ ଫ୍ରାଞ୍ଚାଇଜ ମୁମ୍ବାଇ ଇଣ୍ଡିଆନ୍ସ। କ୍ୟାରିୟର ଆରମ୍ଭରୁ ବହୁ ସଫଳତା ପାଇଥିବା ଆଣ୍ଡରସନ ୨୦୧୫ ବିଶ୍ୱକପ୍ ଉପବିଜେତା ନ୍ୟୁଜିଲାଣ୍ଡ ଦଳର ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ। ହେଲେ ଏହାପରେ କ୍ରମାଗତ ଆହତ ସମସ୍ୟା ଯୋଗୁ ଦୀର୍ଘ ଦିନ ଧରି କ୍ରିକେଟରୁ ଦୂରେଇ ରହିଥିଲେ ଆଣ୍ଡରସନ। କ୍ରିକେଟକୁ ଫେରିବା ପରେ ଆଉ ପୁରୁଣା ଫର୍ମ ବଜାୟ ରଖି ପାରି ନ ଥିଲେ। ୨୦୧୮ରେ ସେ ନ୍ୟୁଜିଲାଣ୍ଡ ପାଇଁ ଅନ୍ତିମ ଥର ଅନ୍ତର୍ଜାତୀୟ କ୍ରିକେଟ ଖେଳିଥିଲେ।
