ଖ୍ରୀଷ୍ଟଚର୍ଚ୍ଚ, ୬ା୧୨ (ପି.ଟି.)-ବାରମ୍ବାର ଆଘାତଜନିତ ସମସ୍ୟାରେ ରହିବାପରେ ନ୍ୟୁଜିଲାଣ୍ଡ ଅଲରାଉଣ୍ଡର କୋରେ ଆଣ୍ଡରସନ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ସେ ଯୁକ୍ତରାଷ୍ଟ୍ର ଆମେରିକା (ୟୁଏସ୍ଏ)ର ମେଜର ଲିଗ୍ କ୍ରିକେଟ (ଏମ୍ସିଏଲ୍) ସହ ଏକ ୩ ବର୍ଷିଆ ଚୁକ୍ତି କରିଛନ୍ତି। ଏକଦା ଅନ୍ତର୍ଜାତୀୟ ଦିନିକିଆ କ୍ରିକେଟରେ ଦ୍ରୁତ ଶତକ ହାସଲ କରି ରେକର୍ଡ ଅଧିକାରୀ ହୋଇଥିବା ଏହି ୨୯ବର୍ଷୀୟ ଅଲରାଉଣ୍ଡର ତାଙ୍କ କ୍ୟାରିୟରରେ ନ୍ୟୁଜିଲାଣ୍ଡ ତରଫରୁ ୧୩ ଟେଷ୍ଟ, ୪୯ ଅନ୍ତର୍ଜାତୀୟ ଦିନିକିଆ ଏବଂ ୩୧ ଅନ୍ତର୍ଜାତୀୟ ଟି୨୦ ଖେଳିଛନ୍ତି। ଗତ ଦୁଇ ବର୍ଷ ହେଲା କିନ୍ତୁ ସେ ଜାତୀୟ ଦଳରେ ସ୍ଥାନ ପାଇ ପାରିନାହାନ୍ତି। ସମସ୍ତ ଫର୍ମାଟରେ ମୋଟ ୯୩ ଅନ୍ତର୍ଜାତୀୟ ଗେମ୍ ଖେଳି ସେ ୨୨୭୭ ରନ ସଂଗ୍ରହ କରିଛନ୍ତି। ତନ୍ମଧ୍ୟରେ ଦୁଇଟି ଶତକ ଏବଂ ୧୦ଅର୍ଦ୍ଧଶତକ ରହିଛି। ସେ ୯୦ଟି ଉଇକେଟ ମଧ୍ୟ ଅକ୍ତିଆର କରିଛନ୍ତି। ୨୦୧୪ ଜାନୁୟାରୀ ୧ରେ କୁଇନ୍ସଟାଉନ୍ଠାରେ ଓ୍ବେଷ୍ଟଇଣ୍ଡିଜ ବିପକ୍ଷ ଅନ୍ତର୍ଜାତୀୟ ଦିନିକିଆରେ ୩୬ଟି ବଲ୍ରେ ଦ୍ରୁତତମ ଶତକ ହାସଲ କରି ରେକର୍ଡର ଅଧିକାରୀ ହୋଇଥିଲେ। ମାତ୍ର ବର୍ଷକ ପରେ ଏବି ଡି’ଭିଲର୍ସ ସମାନ ଦଳ ବିପକ୍ଷରେ ୩୧ବଲ୍ରେ ତାଙ୍କର ଏହି ରେକର୍ଡକୁ ଭଙ୍ଗ କରିଦେଇଥିଲେ। ଆଣ୍ଡରସନ କହିଛନ୍ତି ନ୍ୟୁଜିଲାଣ୍ଡ ତରଫରୁ ପ୍ରତିନିଧିତ୍ୱ କରିଥିବାରୁ ସେ ଗୌରବାନ୍ବିତ ମନେକରନ୍ତି। ନିଜ ଦେଶ ପକ୍ଷରୁ ଅଧିକ ମ୍ୟାଚ ଖେଳିପାରି ନ ଥିବାରୁ ସେ ଦୁଃଖିତ। ଆଣ୍ଡରସନ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଦିଲ୍ଲୀ ଡେୟାର ଡେଭିଲ୍ସ, ମୁମ୍ବାଇ ଇଣ୍ଡିଆନ୍ସ ଏବଂ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳିଛନ୍ତି। ୨୦୧୫ ବିଶ୍ୱକପ୍ରେ ରନର୍ସଅପ୍ ହୋଇଥିବା ନ୍ୟୁଜିଲାଣ୍ଡ ଦଳର ସେ ଅନ୍ୟତମ ସଦସ୍ୟ ଥିଲେ। ଆଘାତଜନିତ ସମସ୍ୟା ତାଙ୍କ କ୍ୟାରିୟରକୁ ପ୍ରଭାବିତ କରିଥିଲା। ନ୍ୟୁଜିଲାଣ୍ଡ ତରଫରୁ ସେ ଶେଷଥର ପାଇଁ ୨୦୧୮ରେ ଏକ ଅନ୍ତଜର୍ର୍ାତୀୟ ଟି୨୦ ମ୍ୟାଚ ଖେଳିଥିଲେ।
