ଲଣ୍ଡନ,୨୮।୭: କରୋନା ମହମାରୀ ବର୍ତ୍ତମାନ ଲୋକଙ୍କ ମନରେ ଭୟ ସୃଷ୍ଟି କରିଛି। ଏଥିରୁ ନିଜକୁ ଦୂରେଇ ରଖିବା ପାଇଁ ସାମାଜିକ ଦୂରତା ଏକ ପ୍ରମୁଖ ଅସ୍ତ୍ର ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ ନିର୍ଦ୍ଦଷ୍ଟ ମାର୍ଗ ଦର୍ଶିକା ଜାରି କରାଯାଇଛି। ଉକ୍ତ ମାର୍ଗଦର୍ଶିକାକୁ ପାଳନ କରିବା ଉପରେ ବର୍ତ୍ତମାନ ଗୁରୁତ୍ୱାରୋପ କରାଯାଉଛି। ଏହାକୁ ନଜରରେ ରଖି ବିଦେଶରେ ରହୁଥିବା ଓଡ଼ିଆ ଉଦ୍ୟୋଗୀ ଅରୁଣ କର ଏକ ନିଆରା ଆପ୍ ବିକଶିତ କରିଛନ୍ତି। ବ୍ରିଟେନରେ ତାଙ୍କ ଦ୍ୱାରା ପ୍ରତିଷ୍ଠିତ ଏକ୍ସପର୍ଟନେଷ୍ଟ କମ୍ପାନୀ ପକ୍ଷରୁ ‘ବିସିପି ବିଚ୍ ଚେକ୍ ଆପ୍’ ବିକଶିତ କରାଯାଇଛି। ଏହି ଆପ୍ ୟୁଜରଙ୍କୁ ଜନଗହଳି ରହୁଥିବା ସ୍ଥାନ ସମ୍ପର୍କରେ ମ୍ୟାପ୍ ମାଧ୍ୟମରେ ସୂଚାଇ ଦେବ। ଉକ୍ତ ଆପ୍ ବ୍ୟବହାର ଫଳରେ ଜନଗହଳି ଠାରୁ ଲୋକମାନେ ନିଜକୁ ଦୂରେଇ ରଖିବା ସହ ସାମାଜିକ ଦୂରତାକୁ ମଧ୍ୟ ସହଜରେ ବଜାୟ ରଖି ପାରିବେ ବୋଲି ଡିଜିଟାଲ ଇନୋଭେସନ କମ୍ପାନୀ ଏକ୍ସପର୍ଟନେଷ୍ଟର କାର୍ଯ୍ୟ ନିର୍ବାହୀ ନିଦ୍ଦେର୍ଶକ ଅରୁଣ କର ସୂଚନା ଦେଇଛନ୍ତି। ଏହି ଆପ୍କୁ ୟୁଜରମାନେ ଗୁଗଲ ଏବଂ ଆପଲ୍ ପ୍ଲେ ଷ୍ଟୋରରୁ ଡାଉନ୍ଲୋଡ କରିପାରିବେ। ଅରୁଣଙ୍କ ଏହି କମ୍ପାନୀ ବ୍ରିଟେନ, ୟୁରୋପ ଏବଂ ଭାରତରେ କାର୍ଯ୍ୟ କରଛି। ସିଫ୍ରଣ୍ଟ ରେଞ୍ଜର, ସିସିଟିଭି ଏବଂ କିଛି ଫ୍ରୁଟଫଲ୍ କାଉଣ୍ଟରରୁ ଏହି ଆପ୍ ଡାଟା ସଂଗ୍ରହ କରିଥାଏ। ଉକ୍ତ ଆପ୍ରେ ଫିଡ୍ବ୍ୟାକ୍ ବିକଳ୍ପ ମଧ୍ୟ ରହିଛି। ଏହି ଆପ୍ ଅରୁଣଙ୍କୁ ବେଶ ପରିଚିତି ଆଣିଦେଇଛି। ସେ ଭାରତୀୟ ସେନାରୁ ଅବସର ନେଇ ଏହି କମ୍ପାନୀ ପ୍ରତିଷ୍ଠା କରିଛନ୍ତି। ଆଇଆଇଏମ୍ ବାଙ୍ଗାଲୋରର ଜଣେ ପୂର୍ବତନ ଛାତ୍ର ଏବଂ ଫୋର୍ବସ ବିଜନେସ କାଉନସିଲର ସେ ଜଣେ ସଦସ୍ୟ ଭାବେ ମଧ୍ୟ କାର୍ଯ୍ୟ କରୁଥିବା ସୂଚନା ରହିଛି।
