ପ୍ୟାରିସ,୭ା୭: ମହାମାରୀ କରୋନା ଯୋଗୁ ସାରା ବିଶ୍ୱବାସୀ ଦୁର୍ଦ୍ଦଶାରେ ଜିଉଁଛନ୍ତି। ଅଦ୍ୟାବଧି ୧.୧୬ କୋଟିରୁ ଊର୍ଦ୍ଧ୍ୱ ଲୋକ ସଂକ୍ରମିତ ହୋଇଥିବାବେଳେ ପ୍ରାୟ ୫ ଲକ୍ଷ ୪୦ ହଜାର ଲୋକଙ୍କ ଜୀବନଗଲାଣି। ହେଲେ ଯେଉଁମାନେ କରୋନାରୁ ଆରୋଗ୍ୟ ହେଉଛନ୍ତି ସେମାନଙ୍କ ମଧ୍ୟରୁ କେତେଜଣ ଆନ୍ସୋମିଆ(ଗନ୍ଧ ଅନୁଭବ ନ କରିବା)ର ଶିକାର ହୋଇଛନ୍ତି। ସେମାନଙ୍କୁ ଆଘ୍ରାଣ କ୍ଷମତା ହରାଇବା ଭଳି ‘ଅଦୃଶ୍ୟ ଅକ୍ଷମତା’ ସହ ହିଁ ବଞ୍ଚତ୍ତ୍ବାକୁ ପଡ଼ିପାରେ। ଏହାର ପ୍ରକୃତ ଚିିକିତ୍ସା ନ ଥିବାରୁ ଏଭଳି ଅକ୍ଷମତା ସହ ଜିଇବା ମାନସିକସ୍ତରରେ କଷ୍ଟସାଧ୍ୟ ବୋଲି କରୋନା ପୀଡ଼ିତଙ୍କୁ ସାହାଯ୍ୟ ପାଇଁ ଗଠିତ ଫ୍ରାନ୍ସ ଗ୍ରୁପ୍ ‘ଆନ୍ସୋମିଆ.ଓଆରଜି’ର ସଭାପତି ଜିନ୍ ମାଇକେଲ ମେଲାର୍ଡ କହିଛନ୍ତି। ତାଙ୍କ କହିବାନୁଯାୟୀ, ‘ଆନ୍ସୋମିଆ ଗନ୍ଧ ବାରିବାର ଶକ୍ତିକୁ ସମାପ୍ତ କରିଦିଏ। ଏହା ଏକ ଯନ୍ତ୍ରଣା। ସକାଳ କଫିର ବାସ୍ନା, ସାବୁନ ଗନ୍ଧ କିଛି ବି ଅନୁଭବ କରିହେବ ନାହିଁ। ଆନ୍ସୋମିଆର ଶିକାର ବ୍ୟକ୍ତିମାନେ ଧୂଅଁା, ଗ୍ୟାସ୍ ଲିକ୍ କିମ୍ବା ଡଷ୍ଟବିନ୍ର ଦୁର୍ଗନ୍ଧକୁ ବାରିବାରେ ମଧ୍ୟ ଅସମର୍ଥ।
ଫ୍ରାନ୍ସ ରାଜଧାନୀ ପ୍ୟାରିସସ୍ଥିତ ଏକ ହସ୍ପିଟାଲର କାନ, ନାକ ଏବଂ ଗଳା ବିଶେଷଜ୍ଞ ଆଲାନ କୋରେ କୁହନ୍ତି, ଖାଇବା ସମ୍ପୂର୍ଣ୍ଣ ଭିନ୍ନ ଅନୁଭୂତି। ଖାଦ୍ୟର ସୁଗନ୍ଧ ଅନୁଭବ କରିବା ପରେ ଲୋକେ ଖାଦ୍ୟକୁ ପ୍ରଶଂସା କରିଥାନ୍ତି। କିନ୍ତୁ ଆନ୍ସୋମିଆ ହେତୁ ଏହା କରିପାରିବେ ନାହିଁ। ସେ କହିଛନ୍ତି, ଆନ୍ସୋମିଆ ହେବା ପଛରେ ନାସିକା ସଂକ୍ରମଣ, ମଧୁମେହ, କ୍ରୋନିକ ରାଇନାଇଟିସ୍, ଅଲଜାଇମର୍, ପାର୍କିନ୍ସନ୍ସ ଭଳି ଅନେକ କାରଣ ରହିଛି। ଏହି ତାଲିକାରେ ଏବେ କରୋନା ସଂକ୍ରମଣ ଯୋଡ଼ି ହୋଇଯାଇଛି। କୋରେ କହିଛନ୍ତି ଯେ, ସଂକ୍ରମଣରୁ ସୁସ୍ଥ ହେବା ପରେ ମଧ୍ୟ ଆନ୍ସୋମିଆରୁ ମୁକ୍ତି ନ ମିଳିଲେ ତାହା ନିହାତି ଚିନ୍ତାଜନକ। କାରଣ ଏଭଳି ପରିସ୍ଥିତିର କୌଣସି ନିର୍ଦ୍ଦିଷ୍ଟ ଚିକିତ୍ସା ନାହିଁ। ଅନେକ କରୋନା ରୋଗୀଙ୍କର ଓଲଫ୍ୟାକ୍ଟ୍ରି ନ୍ୟୁରନ୍ସଗୁଡ଼ିକ (ଯାହା ଗନ୍ଧ ଚିହ୍ନଟ କରେ) ନଷ୍ଟ ହୋଇଯାଏ। କିନ୍ତୁ ଭଲ ଖବର ହେଉଛି, ନାକ ପଛପଟେ ଥିବା ଏହି ନ୍ୟୁରନ୍ସଗୁଡ଼ିକ ପୁନରୁତ୍ପତ୍ତି ହେବାରେ ସକ୍ଷମ। ପ୍ୟାରିସ୍ର ଦୁଇଟି ହସ୍ପିଟାଲାରେ ଏଭଳି ମାମଲା ଉପରେ ଅଧିକ ଅଧ୍ୟୟନ ଚାଲିଛି। ଏକ କର୍ଟିସୋନ (ପ୍ରଦାହ ଓ ଆଲର୍ଜି ନିରାକରଣ ପାଇଁ ବ୍ୟବହୃତ ଜୀବରସ ବା ହରମୋନ) ଆଧାରିତ ଚିକିତ୍ସା ପ୍ରଭାବଶାଳୀ ପ୍ରମାଣିତ ହୋଇଛି ଏବଂ ସେଥିରୁ ଆଶା ସଞ୍ଚାର ହୋଇଛି ବୋଲି କୋରେ କହିଛନ୍ତି।