ଅଯୋଧ୍ୟା,୩୦।୭: ଆଯୋଧ୍ୟାରେ ରାମ ଜନ୍ମଭୂମି ମନ୍ଦିରର ଭୂମିପୂଜା କାର୍ଯ୍ୟକ୍ରମ ଉପରେ କରୋନା ସଙ୍କଟ ଦେଖାଦେଇଛି। ରାମ ଜନ୍ମଭୂମିର ପୂଜାରୀ ପ୍ରଦୀପ ଦାସ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ସେ ହେଉଛନ୍ତି ମୁଖ୍ୟ ପୁଜାରୀ ଆଚାର୍ଯ୍ୟ ସତ୍ୟେନ୍ଦ୍ର ଦାସଙ୍କ ଶିଷ୍ୟ। ରାମ ଜନ୍ମଭୂମିରେ ମୁଖ୍ୟ ପୂଜାରୀଙ୍କ ସମେତ ଆଉ ୪ଜଣ ପୂଜାରୀ ସେବା କରିଥାନ୍ତି। ସେଥିମଧ୍ୟରୁ ପୂଜାରୀ ପ୍ରଦୀପ କରୋନାରେ ପୀଡ଼ିତ ହୋଇଛନ୍ତି। ଏଥିସହ ରାମ ଜନ୍ମଭୂମିର ସୁରକ୍ଷାରେ ଥିବା ୧୬ ପୋଲିସ କର୍ମଚାରୀ ମଧ୍ୟ କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଛି। ଏହାପରେ ପୂଜାରୀ ପ୍ରଦୀପଙ୍କ ସମେତ ପୋଲିସ କର୍ମଚାରୀଙ୍କୁ ହୋମ୍ କ୍ୱାରାଣ୍ଟାଇନ୍ରେ ପଠାଯାଇଛି। ସୂଚନାଯୋଗ୍ୟ, ରାମମନ୍ଦିର ନିର୍ମାଣ ପାଇଁ ଅଗଷ୍ଟ ୫ରେ ଭୂମିପୂଜା ଆୟୋଜିତ ହେବ। ହେଲେ ଏହାପୂର୍ବରୁ ସୁରକ୍ଷାରେ ମୁତୟନ ଥିବା ଲୋକମାନେ କରୋନାରେ ପୀଡ଼ିତ ହେବା ଏକ ଚିନ୍ତାର ବିଷୟ ପାଲଟିଛି।
