ନୂଆଦିଲ୍ଲୀ, ୨୧।୭- କରୋନା ମହାମାରୀ ଲାଗି ଦୀର୍ଘ ୪ ମାସରୁ ଊର୍ଦ୍ଧ୍ୱ ସମୟ ହେବ କ୍ରୀଡ଼ା ଜଗତରେ ବ୍ରେକ୍ ଲାଗିଛି। ଲକ୍ ଡାଉନ୍ କଟକଣା ଲାଗି ବିଶ୍ୱରେ ବିଭିନ୍ନ କ୍ରୀଡ଼ା ଇଭେଣ୍ଟ ସବୁ ସ୍ଥଗିତ କିମ୍ବା ବାତିଲ ହୋଇଯାଇଛି। ବିଭିନ୍ନ କ୍ରୀଡ଼ା ଇଭେଣ୍ଟ ସ୍ଥଗିତ ରହିବା ଯୋଗୁ ଏହାର ସିଧାସଳଖ ପ୍ରଭାବ ଖେଳାଳିଙ୍କ ଉପରେ ପଡ଼ିଛି। ବିଶେଷ କରି କିଛି ଉଦୀୟମାନ ଖେଳାଳିଙ୍କ ଆର୍ଥିକ ଅବସ୍ଥା ଖରାପ ହେବାରେ ଲାଗିଛି। ଫଳରେ ଖେଳାଳିମାନେ ବାଧ୍ୟ ହୋଇ ଅନ୍ୟ ବ୍ୟବସାୟ କରୁଥିବାର ଦେଖିବାକୁ ମିଳିଛି। ଏହାର ଏକ ଜ୍ୱଳନ୍ତ ଉଦାହରଣ ଦିଲ୍ଲୀର ମହିପାଳପୁରରେ ଦେଖିବାକୁ ମିଳିଛି।
ଏଠାରେ ପରିବାର ସହ ରହୁଥିବା ଯୁବ ଭାରତୀୟ ଆଥ୍ଲେଟ୍ ପରିବାର ଖର୍ଚ୍ଚ ବହନ କରିବା ପାଇଁ ଫଳ ବିକୁଥିବାର ଦେଖିବାକୁ ମିଳିଛି। ଏହି ଆଥ୍ଲେଟ୍ଙ୍କ ନାମ ମିରାଜ ଅଲି ଅନସାରୀ। ସେ ଭାରତର ଉଦୀୟମାନ ମିଡିଲ୍ ଡିଷ୍ଟାନ୍ସ ଧାବକ। ମିରାଜ ଏସିଆନ ୟୁଥ୍ ଚାମ୍ପିୟନଶିପ୍ରେ ସେ ଲଙ୍ଗ ଜମ୍ପରେ ର୍ସ୍ବ୍ଣ୍ଣ ପଦକ ଜିତିଛନ୍ତି। ସେହିଭଳି ଦିଲ୍ଲୀର ଏହି ଜୁନିୟର ଆଥ୍ଲେଟ୍ ଏସିଆନ୍ ୟୁଥ୍ ଚାମ୍ପିୟନଶିପ୍ରେ ବ୍ରୋଞ୍ଜ ପଦକ ଜିତି ଦେଶ ପାଇଁ ସୁନାମ ଆଣିଛନ୍ତି। ତେବେ ବର୍ତ୍ତମାନ କରୋନା ଭଳି ସଙ୍କଟଜନକ ସମୟରେ ପରିବାର ପ୍ରତିପୋଷଣ ପାଇଁ ମିରାଜ ଆଗେଇ ଆସିଛନ୍ତି। ମିରାଜ ଏବେ ସ୍ଥାନୀୟ ବଜାରରେ ଫଳ ବିକିବା ଆରମ୍ଭ କରିଛନ୍ତି। ଏକ ଠେଲା ଗାଡ଼ି ମାଧ୍ୟମରେ ସେ କଦଳୀ, ଆମ୍ବ ଆଦି ବିକୁଥିବାରୁ ଦେଖିବାକୁ ମିଳିଛି। ମିରାଜ କୁହିଛନ୍ତି, ‘ଏଠାରେ ଲୋକ ମୋତେ କଦଳୀବାଲା ବୋଲି ଡାକିଥାନ୍ତି। କିନ୍ତୁ କ’ଣ କରିପାରିବି। ପରିବାର ଚଳାଇବା ପାଇଁ କିଛି ନା କିଛି କରିବାକୁ ପଡ଼ିବ।’ ମିରାଜଙ୍କ ପରିବାରରେ ବାପା, ମା ଓ ୪ ଭାଇ ଭଉଣୀଙ୍କୁ ନେଇ ମୋଟ୍ ୬ ଜଣ ସଦସ୍ୟ। ତାଙ୍କ ବାପା ଜଣେ ଅଟୋ ଚାଳକ।