![](https://www.dharitri.com/wp-content/uploads/2020/09/n-5-8.jpg)
ଜେନେଭା/ନୂଆଦିଲ୍ଲୀ, ୧୦।୯: କରୋନା ମହାମାରୀ ସଂକ୍ରମଣ ଯୋଗୁ ପୃଥିବୀର ଅର୍ଥବ୍ୟବସ୍ଥା ଦୋହଲି ଯାଇଛି। ତେବେ ଏହାର ପ୍ରଭାବର ଦୋହରା ମାଡ଼ ଲୋକଙ୍କ ଉପରେ ପଡ଼ିବ ବୋଲି ଜାତିସଂଘ ପକ୍ଷରୁ ପ୍ରକାଶିତ ଏକ ରିପୋର୍ଟରେ ଉଲ୍ଲେଖ କରାଯାଇଛି। କାମଧନ୍ଦା ବନ୍ଦ ହେବା ଦ୍ୱାରା ଲୋକେ ଗରିବ ହେବେ। ସେହିପରି ଶିଶୁ ମୃତ୍ୟୁ ହାର ମଧ୍ୟ ବୃଦ୍ଧି ପାଇବ ବୋଲି ରିପୋର୍ଟରେ ଦର୍ଶାଯାଇଛି। ଲକ୍ଡାଉନ୍ ଏବଂ ଶର୍ଟଡାଉନ୍ର ପ୍ରଭାବରେ ଯୋଗୁ ଏଭଳି ହେବ ବୋଲି ଜାତିସଂଘର ରାଜନୈତିକ ମୁଖ୍ୟ ରୋଜମେରି ଡିକାର୍ଲେ ଏବଂ ମାନବତାବାଦୀ ମୁଖ୍ୟ ମାର୍କ ଲୋକକ ସୂଚନା ଦେଇଛନ୍ତି। ଗରିବ ଦେଶଙ୍କ ଆର୍ଥିକ ଅବସ୍ଥା ଅତି ଖରାପ ହେବାର ଆଶଙ୍କା ଥିବା ରିପୋର୍ଟରେ ପ୍ରକାଶ ପାଇଛି। କରୋନା ପରବର୍ତ୍ତୀ ସମୟରେ ଲୋକଙ୍କ ଜୀବନଧାରଣ କ୍ଷମତା ହ୍ରାସ ପାଇବା ସହିତ ଭୋକିଲାଙ୍କ ସଂଖ୍ୟା ବୃଦ୍ଧି ପାଇବ। ସେହିପରି ସାଧାରଣ ଶିକ୍ଷାରୁ ବହୁ ଶିଶୁ ବଞ୍ଚିତ ହେବେ। ଶରଣାର୍ଥୀ ରହିଥିବା ଦେଶଗୁଡ଼ିକରେ ସମସ୍ୟା ଅଧିକ ଗୁରୁତର ହେବାର ଆଶଙ୍କା ରହିଛି। ଗରିବ ଦେଶରେ ଆବଶ୍ୟକ ଖାଦ୍ୟ ଏବଂ ସ୍ବାସ୍ଥ୍ୟ ସେବା ଅଭାବ ପରିଲକ୍ଷିତ ହେବ। ତେବେ ସମସ୍ୟା କେତେ ଦୂର ସଙ୍କଟ ଜନକ ହେବ ତାହା ଏବେ କହି ହେବ ନାହିଁ ବୋଲି ରିପୋର୍ଟରେ ପ୍ରକାଶ ପାଇଛି। ସମ୍ପ୍ରତି ପୃଥିବୀର ୨୭ ଦେଶରେ ଖାଦ୍ୟର ଅଭାବ ଦେଖାଦେଇଛି। ଏସବୁ ଦେଶରେ ବହୁ ଶିଶୁ କୁପୋଷଣର ଶିକାର ହୋଇଛନ୍ତି। କରୋନା ମହାମାରୀର ପ୍ରଥମ ବର୍ଷରେ ୭ ନିୟୁତ ଶିଶୁ କୁପୋଷଣ ଗ୍ରସ୍ତ ହେେ ବୋଲି ରିପୋର୍ଟରେ କୁହାଯାଇଛି।