ନୂଆଦିଲ୍ଲୀ,୧୮।୮(ପି.ଟି.): କୋଭିଡ୍-୧୯ ପ୍ରଭାବ କାରଣରୁ ଆଉ ଏକା ମେଗା ଇଭେଣ୍ଟକୁ ଘୁଞ୍ଚାଇ ଦିଆଯାଇଛି। ଆଗାମୀ ନଭେମ୍ବର- ଡିସେମ୍ବରରେ ଭାରତରେ ଆୟୋଜନ ହେବାକୁ ଥିବା ଏସିଆନ ବକ୍ସିଂ ଚାମ୍ପିୟନଶିପ୍ ଆସନ୍ତାବର୍ଷକୁ ଘୁଞ୍ଚାଇବାକୁ ନିଷ୍ପତ୍ତି ନିଆଯାଇଛି। ଏ ନେଇ ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ) ସମ୍ପାଦକ ଜେନେରାଲ ଜୟ କୋଓ୍ବଲି ସୂଚନା ଦେଇଛନ୍ତି।
ସୋମବାର ଅନଲାଇନ୍ରେ ଅନୁଷ୍ଠିତ ଏସିଆନ ବକ୍ସିଂ କନ୍ଫେଡେରେଶନ (ଏଏସ୍ବିସି) କାର୍ଯ୍ୟକାରୀ କମିଟି ବୈଠକ ମିଳିତ ଭାବେ ନିଷ୍ପତ୍ତି ନିଆଯାଇଛି। ୨୦୨୧ରେ ଭାରତ ଏହି ଟୁର୍ନାମେଣ୍ଟକୁ ଆୟୋଜନ କରିବ କୋଓ୍ବଲି କହିଛନ୍ତି। ସେ ଏଏସ୍ବିସି କାର୍ଯ୍ୟକାରୀ କମିଟିରେ ସଦସ୍ୟ ରହିଛନ୍ତି। ଆସନ୍ତାବର୍ଷ କେଉଁ ସମୟରେ ଏହି ମେଗା ଇଭେଣ୍ଟ ଆୟୋଜନ ହେବ ସେ ନେଇ ନଭେମ୍ବରରରେ ବୈଠକ ବସିବ ଓ ଏ ସଂକ୍ରାନ୍ତରେ ଆଲୋଚନା ହେବ ବୋଲି ସେ କହିଛନ୍ତି। ଶେଷଥର ପାଇଁ ଭାରତ ୧୯୮୦ରେ ଏସିଆନ ମିଟ୍ ମୁମ୍ବାଇରେ ଆୟୋଜନ କରିଥିଲା। ଗତବର୍ଷଠାରୁ ଏହି ଟୁର୍ନାମେଣ୍ଟରେ ଉଭୟ ପୁରୁଷ ଓ ମହିଳା ଅଂଶଗ୍ରହଣ କରୁଛନ୍ତି।
ଉଲ୍ଲେଖଥାଉ କି, କୋଭିଡ୍-୧୯ ମହାମାରୀ କାରଣରୁ ବିଶ୍ୱର ପ୍ରାୟ ସବୁ ମେଗା ଇଭେଣ୍ଟ ବାତିଲ ହୋଇଛି କିମ୍ବା ସ୍ଥଗିତ ରହିଛି। ଏହି କାରଣରୁ ଟୋକିଓ ଅଲିମ୍ପିକ୍ସ ଓ ଟି୨୦ ବିଶ୍ୱକପ୍କୁ ମଧ୍ୟ ଘୁଞ୍ଚାଇ ଦିଆଯାଇଛି। ଏହି ମହାମାରୀର ପ୍ରକୋପ ଜାରି ରହିଥିବା ବେଳେ ଏହା ନ କମିବା ପର୍ଯ୍ୟନ୍ତ ଆମକୁ ସତର୍କ ହେବାକୁ ପଡିବ ବୋଲି କୋଓ୍ବଲି କହିଛନ୍ତି। ଭାରତରେ ଏପର୍ଯ୍ୟନ୍ତ ୨୫ ଲକ୍ଷ କୋଭିଡ୍-୧୯ ଦ୍ୱାରା ସଂକ୍ରମିତ ହୋଇଛନ୍ତି ଓ ୫୦,୦୦୦ ମୃତ୍ୟୁବରଣ କରିଛନ୍ତି। ଅବଶ୍ୟ ଏହା ସତ୍ତ୍ୱେ ଦେଶରେ ବିଭିନ୍ନ ସ୍ଥାନରେ ଟ୍ରେନିଂ କ୍ୟମ୍ପ ଆରମ୍ଭ ହୋଇଛି। ପଟିଆଲାରେ କେତେଜଣ ବକ୍ସର ଏକାଠି ହୋଇ ଅଭ୍ୟାସ ଆରମ୍ଭ କରିଛନ୍ତ ଓ ଏହା ଏପର୍ଯ୍ୟନ୍ତ ଚାଲୁ ରହିଛି। ଟୋକିଓ ଅଲିମ୍ପିକ୍ସ ପାଇଁ ଏପର୍ଯ୍ୟନ୍ତ ୯ଜଣ ବକ୍ସର କ୍ୱାଲିଫାଏ କରିଛନ୍ତି। ସେମାନଙ୍କ ମଧ୍ୟରେ ୫ ପୁରୁଷ ଓ ୪ ମହିଳା ବକ୍ସର ସାମିଲ ରହିଛନ୍ତି।
