ନୂଆଦିଲ୍ଲୀ,୨୯।୭: ସମଗ୍ର ଦେଶରେ କରୋନା ମାମଲା ଦ୍ରୁତଗତିରେ ବ୍ୟାପିବାରେ ଲାଗିଛି। ଏଭଳି ସ୍ଥିତିରେ ଅଗଷ୍ଟ ୧୫କୁ ନେଇ ପ୍ରସ୍ତୁତି ଆରମ୍ଭ ହୋଇଯାଇଛି। କରୋନା ଯୋଗୁ ସ୍ବାଧୀନତା ଦିବସ କିଭଳି ସୁରୁଖୁରରେ ପାଳିତ ହେବ ଏବଂ ଲୋକେ ସଂକ୍ରମିତ ନ ହେବେ ସେଥିପାଇଁ ସରକାରଙ୍କ ପକ୍ଷରୁ ବଡ଼ ନିଷ୍ପତ୍ତି ନିଆଯିବା ସହ ସତର୍କତା ଅବଲମ୍ବନ କରାଯାଇଛି। ସ୍ବାଧୀନତା ଦିବସକୁ ଦୃଷ୍ଟିରେ ରଖି ଭାରତୀୟ ସେନା, ବାୟୁସେନା, ନୌସେନା ଓ ଦିଲ୍ଲୀ ପୋଲିସର ଯେଉଁ ଅଧିକାରୀମାନେ ଏହି କାର୍ଯ୍ୟକ୍ରମରେ ସାମିଲ ହେବେ ସେମାନଙ୍କୁ ଅଗଷ୍ଟ୧୫ ଯାଏଁ କ୍ୱାରାଣ୍ଟାଇନ୍ରେ ରହିବାକୁ ନିର୍ଦ୍ଦେଶ ଦିଆଯାଇଛି। ଏଥିରେ ଅଧିକାରୀଙ୍କ ଡ୍ରାଇଭର, ଅପରେଟର, ରୋଷେୟା, ବସ୍ ଡ୍ରାଇଭର ଓ ଟ୍ରେନର ସମେତ ସେମାନଙ୍କ ସହ ଜଡ଼ିତ ସମସ୍ତ କର୍ମଚାରୀଙ୍କୁ ମଧ୍ୟ ଅଗଷ୍ଟ ୧୫ଯାଏ କ୍ୱାରାଣ୍ଟାଇନ୍ରେ ରଖାଯିବ ବୋଲି ସୂଚନା ରହିଛି। କ୍ୱାରାଣ୍ଟାଇନ୍ ସମୟରେ କାର୍ଯ୍ୟକ୍ରମରେ ସାମିଲ ହେବାକୁ ଥିବା ସମସ୍ତ ଅଧିକାରୀ ଓ ତାଙ୍କର କର୍ମଚାରୀ କେବଳ ରିର୍ହସଲ୍ ଓ ପ୍ରସ୍ତୁତିରେ ଅଂଶଗ୍ରହଣ କରିବେ। ଏହାପରେ ସିଧା ଘରକୁ ଯିବେ। କାରଣ ରେଡ୍ କାର୍ପେଟରେ ଗାର୍ଡ ଅଫ୍ ଅନର ସମୟରେ ପ୍ରଧାନମନ୍ତ୍ରୀ ନିଜେ କମାଣ୍ଡର ଓ ଯବାନଙ୍କ ମେଳରେ ରହିଥାନ୍ତି। ତେଣୁ ସଂକ୍ରମିତକୁ ଦୃଷ୍ଟିରେ ରଖାଯାଇ ଏଭଳି ନିଷ୍ପତ୍ତି ନିଆଯାଇଛି। ଏଥିସହ ଅଗଷ୍ଟ ୧୫ ଯାଏଁ ସମସ୍ତ ସରକାରୀ ଗାଡ଼ିଗୁଡ଼ିକୁ ପ୍ରତିଦିନ ସାନିଟାଇଜ୍ କରାଯିବ ବୋଲି ଜଣାପଡ଼ିଛି।