ବ୍ରହ୍ମପୁର ଅଫିସ ,୩।୭: କରୋନା ସଂକ୍ରମଣକୁ ରୋକିବା ପାଇଁ ସରକାର ଅନେକ ପଦକ୍ଷେପ ଗ୍ରହଣ କରିଚାଲିଛନ୍ତି। ଲକ୍ଡାଉନ ଓ ଶଟ୍ଡାଉନ ପରି ପଦକ୍ଷେପ ନେଇଛନ୍ତି। ଗତ ମାର୍ଚ୍ଚ ମାସରୁ ଏହି ଧାରା ଜାରିରହିଥିବା ବେଳେ ଲୋକମାନଙ୍କ ଜୀବନ ଜୀବିକା ଉପରେ ମଧ୍ୟ ଗୁରୁତ୍ୱ ଦେଇଛନ୍ତି । ଗତ ଜୁନ୍ ମାସରୁ ଲକ୍ଡାଉନରେ କିଛିଟା କୋହଳ ହେବାପରେ ଲୋକମାନେ କରୋନା ସମ୍ପର୍କିତ ସମସ୍ତ ସଚେତନ ଭୁଲିଯାଇ ରାସ୍ତାଘାଟ ଓ ବଜା଼ରରେ ବୁଲିଥିଲେ। ଏଣୁ ସରକାର ଜୁଲାଇ ମାସର ପ୍ରତ୍ୟେକ ସପ୍ତାହର ଶନିବାର ଓ ରବିବାର ୨ଦିନ ଶଟ୍ଡାଉନ ଘୋଷଣା କରିଛନ୍ତି । ଗଞ୍ଜାମ ଜିଲାରେ ଏବେ କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ଅପରପକ୍ଷରେ ଗତ ୨୪ ଘଣ୍ଟାରେ ଜିଲାରେ ୨୮୩ କରୋନା ପଜିଟିଭ ଚିହ୍ନଟ ହୋଇଛନ୍ତି। ତେବେ ରାଜ୍ୟରେ ଗଞ୍ଜାମ ଜିଲା କରୋନା ସଂକ୍ରମିତ ତାଲିକାରେ ସର୍ବକାଳୀନ ରେକର୍ଡ ସୃଷ୍ଟି କରିଛି । ଅନ୍ୟପଟେ ଦିନକରେ ମହାନଗରରେ ୧୪ଜଣ କରୋନା ଯୋଦ୍ଧା ସମେତ ୩୫ ଜଣ ସଂକ୍ରମିତ ହୋଇଥିବା ଜିଲାପାଳ ବିଜୟ ଅମୃତା କୁଲାଙ୍ଗେ ଟୁଇଟ୍କରି ସୂଚନା ଦେଇଛନ୍ତି। ଅମାନିଆଙ୍କୁ ଦୃଷ୍ଟିରେ ରଖି ଜିଲାପାଳ ବଜ଼ାରରେ ବାଇକ ଚଳାଚଳ ଉପରେ କଟକଣା ଜାରିକରିଥିଲେ। ଏବେ ଶନିବାର ଓ ରବିବାର ୨ ଦିନିଆ ଶଟ୍ଡାଉନ ପାଇଁ ୯ ପ୍ଲାଟନ ପୋଲିସ ଫୋର୍ସ ମୁତୟନ କରାଯିବ ବୋଲି ଅତିରିକ୍ତ ଏସ୍ପି ପି . କେ. ମିଶ୍ର ସୂଚନା ଦେଇଛନ୍ତି। ବ୍ରହ୍ମପୁର ମହାନଗରରେ ଏବେ ଦ୍ରୁତ ଗତିରେ ମାଡ଼ି ଚାଲିଛି କରୋନା। ଏହାକୁ ଆଖିରେ ରଖି ବ୍ରହ୍ମପୁର ମହାନଗର ନିଗମ ୧୨ଟି ରାସ୍ତା ସିଲ୍ କରିଛି। ୬ଟି ସାହିକୁ ନିଷିଦ୍ଧାଞ୍ଚଳ ଘୋଷଣା କରିଛି । ସେହିପରି ମହାନଗରରେ ପୂର୍ବରୁ ୩୫ଟି ଅଞ୍ଚଳକୁ ଚିହ୍ନଟ ହୋଇଥିବା ବେଳେ ଏବେ ୪୨ ଅଞ୍ଚଳକୁ ସଂକ୍ରମିତ ଚିହ୍ନଟ କରାଯାଇଛି ।
