ସିଡ୍ନୀ, ୧୮ା୧୧ (ପି.ଟି.)-ସାଉଥ ଅଷ୍ଟ୍ରେଲିଆରେ କରୋନା ଭାଇରସ ବ୍ୟାପିବାରେ ଲାଗିଥିବାରୁ ସତର୍କତାମୂଳକ ପଦକ୍ଷେପ ସ୍ବରୂପ କ୍ରିକେଟ ଅଷ୍ଟ୍ରେଲିଆ (ସିଏ) ତରଫରୁ ଟେଷ୍ଟ ଅଧିନାୟକ ଟିମ୍ ପେନ୍ ଓ ଷ୍ଟାର ବ୍ୟାଟ୍ସମ୍ୟାନ ମାର୍ନସ ଲାବୁସାନେଙ୍କ ସମେତ ଅନ୍ୟ ଖେଳାଳିମାନଙ୍କୁ ବିମାନ ଯୋଗେ ଆଡିଲେଡ୍ରୁ ନ୍ୟୁ ସାଉଥ୍ ଓ୍ବେଲ୍ସ ସ୍ଥାନାନ୍ତର କରାଯାଇଛି। ଏହି କାରଣରୁ ସୋମବାର ସାଉଥ୍ ଅଷ୍ଟ୍ରେଲିଆକୁ ଲାଗି କରି ଥିବା ଓ୍ବେଷ୍ଟର୍ନ ଅଷ୍ଟ୍ରେଲିଆ, କୁଇନ୍ସଲାଣ୍ଡ ଏବଂ ଟାସ୍ମାନିଆ ସୀମାକୁ ବନ୍ଦ କରିଦିଆଯାଇଛି। ଭାରତ ବିପକ୍ଷ ୩୦୦ ନିୟୁତ ଡଲାର ବିଶିଷ୍ଟ ସିରିଜ ଯେପରି ପ୍ରଭାବିତ ନ ହୁଏ ସେଥିପ୍ରତି କ୍ରିକେଟ ଅଷ୍ଟ୍ରେଲିଆ ସଜାଗ ରହିଥିବା ଏହାର କାମଚଳା ମୁଖ୍ୟ କାର୍ଯ୍ୟନିର୍ବାହୀ ନିକ୍ ହକ୍ଲେ ପ୍ରକାଶ କରିଛନ୍ତି। ସ୍ଥାନାନ୍ତର ହୋଇଥିବା ଖେଳାଳିଙ୍କୁ ମଧ୍ୟରେ ପେନ୍ ଓ ଲାବୁସାନେଙ୍କ ବ୍ୟତୀତ ମାଥ୍ୟୁ ଓ୍ବାଡେ, ଟ୍ରାଭିସ୍ ହେଡ୍ ଏବଂ କାମେରନ ଗ୍ରୀନ୍ ରହିଛନ୍ତି। କୋଭିଡ୍ ସଂକ୍ରମଣ ସଂଖ୍ୟା ବୃଦ୍ଧି ପାଉଥିଲେ ମଧ୍ୟ ଡିସେମ୍ବର ୧୭ରେ ଆଡିଲେଡ୍ ଓଭାଲରେ ଭାରତ ବିପକ୍ଷ ପ୍ରଥମ ଟେଷ୍ଟ ଅନୁଷ୍ଠିତ ହେବ। ସୋମବାର ଆଡିଲେଡ୍ରେ ସାନି କରୋନା ସଂକ୍ରମଣ ଦେଖାଦେବା ପରେ ପେନ୍ଙ୍କ ସମେତ ଅଷ୍ଟ୍ରେଲୀୟ ଖେଳାଳିମାନେ ୧୪ଦିନ ସେଲ୍ଫ କ୍ୱାରାଣ୍ଟାଇନ୍ରେ ଅଛନ୍ତି। ଅଷ୍ଟ୍ରେଲିଆ ଟୁର୍ରେ ଥିବା ଭାରତ ୩ ଅନ୍ତର୍ଜାତୀୟ ଦିନିକିଆ, ସମାନ ସଂଖ୍ୟକ ଟି୨୦ ଏବଂ ୪ ଟେଷ୍ଟ ମ୍ୟାଚ୍ ଖେଳିବ। ନଭେମ୍ବର ୨୭ରେ ସିଡ୍ନୀଠାରେ ପ୍ରଥମ ଅନ୍ତର୍ଜାତୀୟ ଦିନିକିଆ ସହ ଟୁର୍ ଆରମ୍ଭ ହେବ। ଆଡିଲେଡ୍ଠାରେ ଟେଷ୍ଟ ସିରିଜ ଡିସେମ୍ବର ୧୭ରୁ ଆରମ୍ଭ ହେବ। ପ୍ରଥମ ଟେଷ୍ଟ ଦିବାରାତ୍ର ବିଶିଷ୍ଟ ହେବ। ଭ୍ରମଣକାରୀ ଦଳ ବର୍ତ୍ତମାନ ସିଡ୍ନୀରେ କ୍ୱାରାଣ୍ଟାଇନ୍ରେ ଅଛି।