ବେଜିଂ, ୬।୮ : କରୋନା ଏନ୍ତୁଡ଼ିଶାଳ ଚାଇନାରେ କରୋନା ପୁଣି ଥରେ ନିୟନ୍ତ୍ରିତ ହରାଇଛି। ଶନିବାର ଚାଇନାର ’ହାୱାଇ’ କୁହାଯାଉଥିବା ସାନ୍ୟା ସହରରେ କର୍ତ୍ତୃପକ୍ଷ ଲକ୍ଡାଉନ ଘୋଷଣା କରିଛନ୍ତି। ଫଳରେ ସେଠାରେ ଥିବା ପ୍ରାୟ ୮୦ ହଜାରରୁ ଅଧିକ ପର୍ଯ୍ୟଟକ ଅଟକି ରହିଛନ୍ତି। ସମଗ୍ର ସହରରେ ସତର୍କତା ଅବଲମ୍ବନ କରିବାକୁ ଅଧିକାରୀମାନେ ନିର୍ଦ୍ଦେଶ ଦେଇଛନ୍ତି। ଶନିବାର ସକାଳେ ସାନ୍ୟା ସହରରେ ଜନସାଧାରଣ ପରିବହନ ଉପରେ କଟକଣା ଲଗାଯାଇଛି ଏବଂ ଲୋକଙ୍କ ଗତିବିଧିକୁ ମଧ୍ୟ ବାରଣ କରାଯାଇଛି। ସାନ୍ୟା ସହରର ଜନସଂଖ୍ୟା ଏକ ଲକ୍ଷରୁ ଅଧିକ। ଦେଶର ଦକ୍ଷିଣ ଉପକୂଳରେ ଅବସ୍ଥିତ ହେନାନ ପ୍ରଦେଶର ରାଜଧାନୀ ସାନ୍ୟା ଏକ ପର୍ଯ୍ୟଟନ ସ୍ଥଳୀ।
ରାଜ୍ୟ ଗଣମାଧ୍ୟମ ଅନୁଯାୟୀ, ସାନ୍ୟା ଡେପୁଟି ମେୟର ହେ ଶିଗେଙ୍ଗ କହିଛନ୍ତି ଯେ ବର୍ତ୍ତମାନ ସହରରେ ବହୁ ପର୍ଯ୍ୟଟକ ଅଟକି ରହିଛନ୍ତି। ସେ କହିଛନ୍ତି ଯେ ସାନ୍ୟା ଛାଡିବା ପୂର୍ବରୁ ସେମାନେ ନିଶ୍ଚିତ ହେବା ଉଚିତ ଯେ ୪୮ଘଣ୍ଟା ମଧ୍ୟରେ ସେମାନଙ୍କର ଦୁଇଟି ନେଗେଟିଭ୍ ପିସିଆର୍ ପରୀକ୍ଷା ହୋଇଛି। ଲକ୍ଡାଉନ୍ ଯୋଗୁ ହଠାତ ବିମାନ ଟିକେଟ ଦର ବୃଦ୍ଧି ପାଇବାରେ ଲାଗିଛି ଏବଂ ସହରରେ ଅଟକି ରହିଥିବା ସମସ୍ତ ଲୋକ କିପରି ବାହାରକୁ ଯିବେ ତାହା ସ୍ପଷ୍ଟ ହୋଇନାହିଁ ।
