ନୟାଗଡ ଅଫିସ,୭ା୯: ନୟାଗଡ ସହର ନୀଳାଦ୍ରିବିହାରରେ ଜଣେ କରୋନା ପଜିଟିଭ୍ ରୋଗୀଙ୍କ ମୃତ୍ୟୁ ପରେ ପରିବାର ଲୋକ ପ୍ରଶାସନକୁ ନଜଣାଇ ପୋଡ଼ି ଦେଇଛନ୍ତି। ଖବର ଜଣାପଡ଼ିବା ପରେ ନୟାଗଡ ମ୍ୟୁନିସିପାଲିଟି ପକ୍ଷରୁ ତଦନ୍ତ ଆରମ୍ଭ ହୋଇଛି। ଜିଲା ପ୍ରଶାସନ ଘଟଣାର ତଦନ୍ତ ପାଇଁ ଖଣ୍ଡପଡା ତହସିଲଦାରଙ୍କୁ ନିର୍ଦ୍ଦେଶ ଦେଇଛି। ନୟାଗଡ ମ୍ୟୁନିସିପାଲିଟିର ନିର୍ବାହୀ ଅଧିକାରୀ ସନ୍ତୋଷ ଜେନାଙ୍କଠାରୁ ମିଳିଥିବା ସୂଚନା ଅନୁସାରେ, ନୀଳାଦ୍ରିବିହାରରୁ ଜଣେ କରୋନା ପଜିଟିଭ୍ ଚିହ୍ନଟ ହୋଇଥିଲେ। ସ୍ବାସ୍ଥ୍ୟ ବିଭାଗର ଗାଡ଼ି ତାଙ୍କୁ ଚିକିତ୍ସା ନିମନ୍ତେ ନେବା ପାଇଁ ଶନିବାର ଯାଇଥିଲା। ମାତ୍ର ଆକ୍ରାନ୍ତ ଜଣକ ହୋମ କ୍ୱାରାଣ୍ଟାଇନ୍ରେ ରହିବେ ବୋଲି କହି ସ୍ବାସ୍ଥ୍ୟ ବିଭାଗ ଗାଡ଼ିକୁ ଫେରାଇ ଦେଇଥିଲେ। ରବିବାର ସେ ହଠାତ୍ ଗୁରୁତର ହୋଇ ପଡ଼ିିଥିଲେ। ପରିବାର ଲୋକେ ତାଙ୍କୁ ନେଇ ଖଣ୍ଡପଡା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ସମ୍ପୃକ୍ତ ଆକ୍ରାନ୍ତଙ୍କ ମୃତ୍ୟୁ ଘଟିଥିଲା। ମାତ୍ର ଏବିଷୟରେ ସ୍ବାସ୍ଥ୍ୟ ବିଭାଗକୁ ନ ଜଣାଇ ମୃତଦେହକୁ ତରବରିଆ ଭାବେ ସ୍ବାସ୍ଥ୍ୟକେନ୍ଦ୍ରରୁ ଆଣି ଖଣ୍ଡପଡା ବ୍ଲକର ବରକୋରଳିପାଟଣାସ୍ଥିତ ପୈତୃକ ଗ୍ରାମରେ ପରିବାର ଲୋକେ ପୋଡ଼ି ଦେଇଥିଲେ। ଖବର ପାଇ ଖଣ୍ଡପଡା ଥାନା ପୋଲିସ ସେଠାରେ ପହଞ୍ଚତ୍ଥିଲା। ମାତ୍ର ସେତେବେଳକୁ ମୃତଦେହ ସଂସ୍କାର ହୋଇସାରିଥିଲା। ଏସମ୍ପର୍କରେ ଏସ୍ପି ଓ ଜିଲା ପ୍ରଶାସନକୁ ଅବଗତ କରାଯିବା ସହ ତଦନ୍ତ ଜାରି ରହିଛି ବୋଲି ନିର୍ବାହୀ ଅଧିକାରୀ ଜେନା କହିଛନ୍ତି।