କଟକ ଅଫିସ,୧୮ା୧୦: ଢେଙ୍କାନାଳ ଜିଲା ସଦର ଥାନା ଅନ୍ତର୍ଗତ ବାରଦା ଗ୍ରାମର ଜଣେ ୭୨ ବର୍ଷୀୟ ବ୍ୟକ୍ତି ଜିଲା ମୁଖ୍ୟ ଚିକିତ୍ସାଳୟରେ ଗତ ୨୯ ତାରିଖରେ କରୋନା ଆକ୍ରାନ୍ତ ହୋଇଥିବା ଜଣାପଡିଥିଲା। ସେଠାରେ ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ ଡାକ୍ତର ତାଙ୍କୁ କଟକ ଏସ୍ସିବି ମେଡିକାଲକୁ ସ୍ଥାନାନ୍ତର କରିଥିଲେ। ପରିବାର ଲୋକେ କିଛି ସମୟ ପରେ ଆବଶ୍ୟକ କପଡା ଧରି ମେଡିକାଲରେ ପହଞ୍ଚିବା ବେଳକୁ ଜାଣିବାକୁ ପାଇଲେ ଯେ, ତାଙ୍କୁ ଏସ୍ସିବି ପଠାଯାଇଛି। ପରେ ପରିବାର ଲୋକେ ଏସ୍ସିବି ଆସି ଅନେକ ଖୋଜାଖୋଜି କରିବା ପରେ ତାଙ୍କର କୌଣସି ସନ୍ଧାନ ପାଇ ନ ଥିଲେ। ଶେଷରେ ନିରାଶ ହୋଇ ଫେରିବା ପରେ ସମ୍ପୃକ୍ତ ବ୍ୟକ୍ତିଙ୍କ ପୁଅ ଜିଲାପାଳ ଓ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଏଥିସହ ଗତ ୧୬ ତାରିଖରେ ଢେଙ୍କାନାଳ ଟାଉନ୍ ଥାନାରେ ନିଖୋଜ ଅଭିଯୋଗ କରିଥିଲେ। ଢେଙ୍କାନାଳ ଜିଲାପାଳ ଏହାର ତଦନ୍ତ ପାଇଁ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ଫଳରେ ଜିଲା ମୁଖ୍ୟ ଚିକିତ୍ସାଳୟରୁ ଡ. ସତ୍ୟନାରାୟଣ ମହାପାତ୍ରଙ୍କ ନେତୃତ୍ୱରେ ଏକ ଟିମ୍ ଶନିବାର କଟକ ଆସି ଏସ୍ସିବିରେ ଖୋଜାଖୋଜି କରିବା ସହ ମେଡିକାଲ ଫାଣ୍ଡିରେ ପଚରାଉଚରା କରିଥିଲେ। ଏହାପରେ ମଙ୍ଗଳାବାଗ ଥାନାକୁ ଯାଇ ଅଚିହ୍ନା ବ୍ୟକ୍ତିଙ୍କ ମୃତ୍ୟୁ ତଥ୍ୟ ସମ୍ପର୍କରେ ପଚାରି ବୁଝିଥିଲେ। ଅନ୍ୟପକ୍ଷରେ ଡା. ମହାପାତ୍ର କହିଛନ୍ତି, ରୋଗୀ ଜଣକ ଏସ୍ସିବିରେ ନାହାନ୍ତି। ଏହି ଘଟଣାର ତଦନ୍ତ ଚାଲିଛି। ରବିବାର ସୁଦ୍ଧା ଜିଲାପାଳଙ୍କୁ ସବିଶେଷ ତଥ୍ୟ ଦିଆଯିବ। ଘଟଣା ଓ ତଦନ୍ତ ବାବଦରେ ଏସ୍ସିବି ପଲମୋନାରୀ ମେଡିସିନ ବିଭାଗର ମୁଖ୍ୟ ଡା.ଏମ୍. ଆର୍. ପଟ୍ଟନାୟକଙ୍କୁ ପଚାରିବାରୁ ନିଖୋଜ ବ୍ୟକ୍ତିଙ୍କ ସମ୍ପର୍କରେ ସେ କିଛି ଜାଣିନାହାନ୍ତି ବୋଲି କହିଥିଲେ।