ବ୍ରହ୍ମପୁର ଅଫିସ,୧୪ା୮-ଗଞ୍ଜାମ ଜିଲାରେ କରୋନା ସ୍ଥିତି ସୁଧୁରୁଛି ା ଦିନକୁ ଦିନ ସଂକ୍ରମିତଙ୍କ ସଂଖ୍ୟା ହ୍ରାସ ପାଉଛି। କରୋନା ଟେଷ୍ଟ ବୃଦ୍ଧି ପାଇଛି ା ଜିଲାରେ ଟେଷ୍ଟ ସଂଖ୍ୟା ଏକ ଲକ୍ଷରେ ପହଞ୍ଚିଥିବା ଶୁକ୍ରବାର ବ୍ରହ୍ମପୁର ଟାଉନହଲ ପରିସରରେ ଅନୁଷ୍ଠିତ ଖବରଦାତା ସମ୍ମିଳନୀରେ ଜିଲାପାଳ ବିଜୟ ଅମୃତ କୁଲାଙ୍ଗେ ସୂଚନା ଦେଇଛନ୍ତି ା ସେ ଆହୁରି କହିଛନ୍ତି, ବର୍ତ୍ତମାନ ଜିଲାରେ ସଂକ୍ରମିତଙ୍କ ଚିହ୍ନଟ ହାର ୧୫ ପ୍ରତିଶତ ତଳେ ରହୁଛି। ଗତ ୧୦ ଦିନରେ ଜିଲାରେ ସଂକ୍ରମିତଙ୍କ ସଂଖ୍ୟା ୪୦ ପ୍ରତିଶତ ହ୍ରାସ ପାଇଛି। ଅଧିକରୁ ଅଧିକ ଟେଷ୍ଟ ସହ ସଂକ୍ରମିତଙ୍କ ଚିକିସତ୍ା ପାଇଁ ଆବଶ୍ୟକ ଚିକିତ୍ସା ସୁବିଧା ଓ ସୁସ୍ଥ ହେଉଥିବା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ହେଉଥିବାରୁ ଜିଲାବାସୀଙ୍କ ମନରୁ ଭୟ ଦୂର ହୋଇଛି। କରୋନାକୁ ନେଇ ସଚେତନତା ବୃଦ୍ଧି ପାଉଥିବା ଜିଲାପାଳ କହିଛନ୍ତି। ଏବେ ସୁଦ୍ଧା ଜିଲାର ଗ୍ରାମାଞ୍ଚଳରେ ୬୯୪, ସହରାଞ୍ଚଳରେ ୧୭୦, ବ୍ରହ୍ମପୁର ମହାନଗର ନିଗମ(ବିଏମସି) ଅଞ୍ଚଳରେ ୬୫ ଜଣ ସଂକ୍ରମିତ ହୋମ୍ ଆଇସୋଲେଶନରେ ରହି ଚିକିତ୍ସିତ ହେଉଛନ୍ତି। ଜିଲାରେ ପ୍ରାୟ ୮୪ ପ୍ରତିଶତ ଗ୍ରାମାଞ୍ଚଳ ଓ ୫୫ ପ୍ରତିଶତ ସହରାଞ୍ଚଳ ଏବେ ଗ୍ରୀନ ଜୋନ୍ରେ ରହିଛି ା ସଂକ୍ରମିତଙ୍କ ସଂଖ୍ୟା ଶୂନ ନ ହେବା ପର୍ଯ୍ୟନ୍ତ କରୋନା ଜନିତ କଟକଣା ଜାରି ରହିବ ବୋଲି ଜିଲାପାଳ ସୂଚାଇଛନ୍ତି ା ଶନିବାର ସ୍ବାଧୀନତା ଦିବସ ଉପଲକ୍ଷେ କିଛି ସମୟ ପାଇଁ ଶଟ୍ଡାଉନ୍ କଟକଣା କୋହଳ କରାଯାଉଥିଲେ ମଧ୍ୟ ନିୟମାବଳୀ ଜାରି ରହିବ ବୋଲି ବିଏମସି କମିଶନର ଚକ୍ରବର୍ତ୍ତୀ ସିଂ ରାଠୋର ସ୍ପଷ୍ଟ କରିଥିଲେ ା ସ୍ଥିତି ସମ୍ପୂର୍ଣ୍ଣ ନ ସୁଧୁରିବା ପର୍ଯ୍ୟନ୍ତ ଜିଲା ପ୍ରଶାସନ ଦ୍ୱାରା ଜାରି ହୋଇଥିବା ପଞ୍ଚସୂତ୍ର ନିୟମ, ମାସ୍କ ବ୍ୟବହାର ଓ ସାମାଜିକ ଦୂରତା ରକ୍ଷା କରିବାକୁ ଜିଲାପାଳ ନିବେଦନ କରିଥିଲେ। ଖବରଦାତା ସମ୍ମିଳନୀରେ ଜିଲାପାଳ, ବିଏମସି କମିଶନର ଓ ବ୍ରହ୍ମପୁର ଉପଜିଲାପାଳ ସିନ୍ଧେ ଦତ୍ତାତ୍ରୟ ଭାଉସାହେବ ପ୍ରମୁଖ ଉପସ୍ଥିତ ଥିଲେ ା