ନୂଆଦିଲ୍ଲୀ,୩ ।୧: କରୋନାର ସଂକ୍ରମଣକୁ ଦେଖି ପ୍ରାୟ ସମସ୍ତ ରାଜ୍ୟରେ ନାଇଟ କର୍ଫ୍ୟୁ ସହ ଅନ୍ୟ କଟକଣା ବି ଲାଗୁ କରାଯାଇଛି । ଏହାପରେ ବି ଦ୍ରୁତ ଗତିରେ ବଢି ଚାଲିଛି ସଂକ୍ରମଣ । ମହାରାଷ୍ଟ୍ରରେ ଏବେ କରୋନା ବେକାବୁ ହୋଇଥିବା ବେଳେ ରାଜଧାନୀ ଦିଲ୍ଲୀ ଓ ପଶ୍ଚିମବଙ୍ଗରେ ବି ସ୍ଥିତି ଅଣାୟତ ହେବାକୁ ଯାଉଛି । ସଂକ୍ରମଣ ଏତେ ଅଧିକ ହୋଇଛି ଯେ ଗୋଟିଏ ସପ୍ତାହରେ କରୋନା ସଂକ୍ରମଣ ୩ ଗୁଣା ବୃଦ୍ଧି ପାଇଛି । ଗତ ୨୪ ଘଣ୍ଟାରେ ୩୩ ହଜାରରୁ ଅଧିକ ନୂଆ ସଂକ୍ରମଣକୁ ଦେଖି ଅନୁମାନ କରାଯାଉଛି କି କରୋନାର ତୃତୀୟ ଲହର ଆସିଯାଇଛି । ସୂଚନାଯୋଗ୍ୟ, ରବିବାର ରାତିସୁଦ୍ଧା ବିଭିନ୍ନ ରାଜ୍ୟରୁ ମିଳିଥିବା ରିପୋର୍ଟ ଅନୁଯାୟୀ, ୨୪ ଘଣ୍ଟା ମଧ୍ୟରେ ୩୩୭୦୩ ନୂଆ ସଂକ୍ରମିତ ଚିନ୍ତାର କାରଣ ହୋଇଛନ୍ତି । ଶନିବାର ୨୭୭୪୭ ନୂଆ ସଂକ୍ରମିତଙ୍କ ତୁଳନାରେ ଏହା ୨୧ ପ୍ରତିଶତ ଅଧିକ ବୋଲି କୁହାଯାଇଛି । ଏପଟେ ରବିବାରର ସଂକ୍ରମିତଙ୍କୁ ଦେଖିଲେ ଗତ ରବିବାର ତୁଳନାରେ ଏହା ୫ ଗୁଣା ଅଧିକ । ତେବେ କରୋନାର ଦ୍ରୁତ ସଂକ୍ରମଣ ପାଇଁ ଓମିକ୍ରନ୍ ଭାରିଏଣ୍ଟ ଦାୟି ବୋଲି କୁହାଯାଉଛି ।