ନୂଆଦିଲ୍ଲୀ, ୧୯ା୮ (ପି.ଟି.)- ପଟିଆଲାସ୍ଥିତ ଜାତୀୟ କ୍ରୀଡ଼ା ପ୍ରତିଷ୍ଠାନ (ଏନ୍ଆଇଏସ୍)ର କ୍ୟାଟରିଂ ମ୍ୟାନେଜର କରୋନା ସଂକ୍ରମିତ ହୋଇଛନ୍ତି। ଛୁଟିରୁ ଫେରିବା ପରେ ଲକ୍ଷ୍ନୌଠାରେ ସେ ନିୟମାନୁସାରେ କ୍ୱାରାଣ୍ଟାଇନ୍ରେ ଥିଲେ। ତାଙ୍କର କୋଭିଡ୍-୧୯ ଟେଷ୍ଟ ହୋଇଥିଲା। ପ୍ରୋଟୋକଲ ଅନୁସାରେ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ତରଫରୁ ଏହି ବ୍ୟକ୍ତିଙ୍କ ନାମ ପ୍ରକାଶ କରାଯାଇ ନାହିଁ। ତାଙ୍କୁ କୋଭିଡ୍-୧୯ କେୟାର ସେଣ୍ଟରକୁ ସ୍ଥାନାନ୍ତର କରାଯାଇଛି। କ୍ୟାଟରିଂ ମ୍ୟାନେଜରଙ୍କ ବ୍ୟତୀତ ଅନ୍ୟ ଦୁଇଜଣ କର୍ମଚାରୀ ଛୁଟି କଟାଇ ଏନଆଇଏସ ପଟିଆଲକୁ ଫେରିଥିଲେ। ସ୍ଥାନୀୟ ସ୍ବାସ୍ଥ୍ୟ ବିଭାଗ ଗାଇଡ୍ ଲାଇନ୍ ଅନୁସାରେ ସେମାନେ ମଧ୍ୟ କ୍ୱାରାଣ୍ଟାଇନ୍ରେ ଥିଲେ, ହେଲେ ସେମାନଙ୍କର ନେଗେଟିଭ୍ ଆସିଛି। କ୍ୟାଟରିଂ ମ୍ୟାନେଜର ଜଣକ କ୍ୱାରାଣ୍ଟାଇନ୍ରେ ରହିଥିବାରୁ ସେ ପ୍ରତିଷ୍ଠାନର ଅନ୍ୟ କୌଣସି ବ୍ୟକ୍ତିଙ୍କ ସଂସ୍ପର୍ଶରେ ଆସି ନ ଥିଲେ। ସୋମବାର ଏନ୍ଆଇଏସ୍ ପରିସରରେ ରହିଥିବା ଷ୍ଟେଟ୍ବ୍ୟାଙ୍କ ଶାଖାର ଜଣେ କର୍ମଚାରୀ କରୋନା ପଜିଟିଭ୍ ଥିବା ଜଣାପଡ଼ିଥିଲା। କିନ୍ତୁ ସାଇ ପକ୍ଷରୁ ସ୍ପଷ୍ଟ କରିଦିଆଯାଇଛି ଯେ, ବର୍ତ୍ତମାନ ଚାଲିଥିବା କ୍ୟାମ୍ପ ଏହା କୌଣସି ବିପଦ ସୃଷ୍ଟି କରିବ ନାହିଁ। କୋଭିଡ୍-୧୯ ଦୃଷ୍ଟିରୁ କ୍ୟାମ୍ପକୁ ବିଭିନ୍ନ ଜୋନ୍ରେ ବିଭକ୍ତ କରାଯାଇଛି। ବ୍ୟାଙ୍କଟି ରେଡ୍ ଜୋନ୍ରେ ରହିଥିବାବେଳେ ଆଥଲେଟ୍, କୋଚ୍ ଏବଂ ସପୋର୍ଟ ଷ୍ଟାଫ୍ଙ୍କ ଚଳପ୍ରଚଳ କେବଳ ଗ୍ରୀନ୍ ଜୋନ୍ରେ ସୀମିତ ରହିବ। ଏନଆଇଏସ୍ରେ ବର୍ତ୍ତମାନ ବକ୍ସିଂ, ଓ୍ବେଟ୍ଲିଫ୍ଟିଂ ଏବଂ ଆଥଲେଟିକ୍ସର ଜାତୀୟ କ୍ୟାମ୍ପ ଚାଲିଛି।