ନୂଆଦିଲ୍ଲୀ, ୨୬।୭: ଜଣେ ଯୁବ ଡାକ୍ତରଙ୍କ ଜୀବନ ନେଇଛି କରୋନା ମହାମାରୀ। ଦିଲ୍ଲୀ ସରକାରଙ୍କ ଦ୍ୱାରା ପରିଚାଳିତ ଭୀମ ରାଓ ଆମ୍ବେଦକର ହସ୍ପିଟାଲ ଓ କଲେଜରେ କାର୍ଯ୍ୟ କରୁଥିବା ରେସିଡେଣ୍ଟ ଡାକ୍ତର ଯୋଗୀନ୍ଦର ଚୌଧୁରୀ କରୋନାରେ ଆକ୍ରାନ୍ତ ହୋଇ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଛନ୍ତି। ମୃତ୍ୟୁ ବେଳକୁ ତାଙ୍କୁ ମାତ୍ର ୨୭ ବର୍ଷ ହୋଇଥିଲା। ଯୋଗୀନ୍ଦର ଗତ ୬ ମାସ ହେବ ଏହି ହସ୍ପିଟାଲରେ ଆଡ୍ହକ ଆଧାରରେ କାମ କରୁଥିଲେ। ସେ ପ୍ରଥମେ ଫ୍ଲୁ କ୍ଲିନିକ ଓ ପରେ କାଜୁଆଲଟୀ ଦାୟିତ୍ୱରେ ରହିଥିଲେ। ତେବେ ଗତ ମାସ ୨୭ରେ ସେ କରୋନା ଆକ୍ରାନ୍ତ ବୋଲି ଚିହ୍ନଟ ହୋଇଥିଲେ। ଏହାପରେ ତାଙ୍କୁ ଚିକିତ୍ସା ପାଇଁ ବାବା ସାହେବ ଆମ୍ବେଦକର ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ଯୋଗୀନ୍ଦରଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିବାରୁ ଡାକ୍ତର ତାଙ୍କୁ ଜୁନ୍ ୩୦ରେ ଲୋକ ନାୟକ ହସ୍ପିଟାଲକୁ ସ୍ଥାନାନ୍ତର କରିଥିଲେ। ସେଠାରେ ଜୁଲାଇ ୮ ପର୍ଯ୍ୟନ୍ତ ରହିବା ପରେ ଯୋଗୀନ୍ଦରଙ୍କ ବାପାଙ୍କୁ ଡାକ୍ତର କହିଥିଲେ ତାଙ୍କ ପୁଅର ଫୁସ୍ଫୁସରେ ଏକ ଛିଦ୍ର ରହିଛି। ତାଙ୍କୁ ଭେଣ୍ଟିଲେଟରରେ ରଖିବାର ଆବଶ୍ୟକ ହେଉଛି। ତେଣୁ ସେହିଦିନ ତାଙ୍କୁ ସାର୍ ଗଙ୍ଗାରାମ ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ଚିକିତ୍ସାଧିନ ଅବସ୍ଥାରେ ଶେଷରେ ଯୋଗୀନ୍ଦରଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଦିଲ୍ଲୀ ସରକାରଙ୍କ ହସ୍ପିଟାଲରେ କାର୍ଯ୍ୟ କରୁଥିବାବେଳେ କରୋନା ଆକ୍ରାନ୍ତ ହୋଇ ମୃତୁୂ୍ୟବରଣ କରିଥିବାରୁ ଏକ କୋଟି ଟଙ୍କା ଦେବାକୁ ଯୋଗୀନ୍ଦରଙ୍କ ପିତା ଦାବି କରିଛନ୍ତି।