ପୁରୁଷୋତ୍ତମପୁର,୨୧ା୯(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ପାଣ୍ଡିଆ ଗ୍ରାମର ଜଣେ କରୋନା ଯୋଦ୍ଧାଙ୍କ ମୃତ୍ୟୁ ଘଟିଛି। ସେ ହେଲେ ଓ୍ବାଇ ରାଜକୁମାର (୪୬)। ସେ ଦୀର୍ଘ ୧୩ ବର୍ଷ ହେଲା ମାଲକାନଗିରି ଜିଲା ମାଥିଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଥିବା କାଳିଆଗୁଡ଼ା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଫାର୍ମାସିଷ୍ଟ ଭାବେ କାର୍ଯ୍ୟ କରୁଥିଲେ। ଗତ ମାସ ୨୭ ତାରିଖରେ ସେ ଅସୁସ୍ଥତା ଅନୁଭବ କରିଥିଲେ। ପରେ ସେ କରୋନା ପରୀକ୍ଷା କରିଥିଲେ ଯାହାକି ୨୯ ତାରିଖରେ ରିପୋର୍ଟ ପଜିଟିଭ୍ ଆସିବାରୁ ତାଙ୍କୁ ଜୟପୁର କୋଭିଡ୍ ହସ୍ପିଟାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା। ମାତ୍ର ପରିସ୍ଥିତି ଗୁରୁତର ହେବାରୁ ସେହିଦିନ ଅପରାହ୍ନରେ ବିଶାଖାପାଟଣାର ମେଡିକଭର କୋଭିଡ୍ ହସ୍ପିଟାଲକୁ ନିଆଯାଇ ଚିକିତ୍ସା କରାଯାଇଥିଲା। ମାତ୍ର ସେଠାରେ ମଧ୍ୟ ସ୍ବାସ୍ଥ୍ୟରେ ଉନ୍ନତି ନ ଆସିବାରୁ ଗତ ୯ ତାରିଖରେ ବିଶାଖାପାଟଣାର ଅନ୍ୟ ଏକ ମେଡିକାଲକୁ ସ୍ଥାନାନ୍ତର କରି ଚିକିତ୍ସା କରାଯାଉଥିବା ବେଳେ ରବିବାର ତାଙ୍କର ମୃତ୍ୟୁ ଘଟିଥିଲା। ଏହାକୁ ନେଇ ମାଲକାନଗିରି ଜିଲା ପ୍ରଶାସନକୁ ପରିବାର ଲୋକେ ଖବର ଦେଇଥିଲେ। ପ୍ରଶାସନର ପରାମର୍ଶ ଅନୁଯାୟୀ ମୃତଦେହକୁ ନିଜ ଗ୍ରାମ ପାଣ୍ଡିଆ କୁ ଅଣାଯାଇଥିଲା। ଏହାର ଖବର ପାଇ ପୁରୁଷୋତ୍ତମପୁର ତହସିଲଦାର ଅରୁଣ କୁମାର ନାୟକ, ବିଡିଓ ବିଜୟ କୁମାର ବେହେରା, ଥାନା ଏଏସ୍ଆଇ ରବିନ୍ଦ୍ର ନାଥ ପାଣିଗ୍ରାହୀ ଓ ପୋଲିସ କର୍ମଚାରୀମାନେ ପାଣ୍ଡିଆ ଗ୍ରାମରେ ପହଞ୍ଚି ଗାର୍ଡ ଅଫ୍ ଅନର ଦେଇ ମର୍ଯ୍ୟାଦାର ସହ ଶେଷକୃତ୍ୟ ସମ୍ପନ୍ନ କରିଥିଲେ। ତାଙ୍କର ସ୍ତ୍ରୀ ଓ୍ବାଇ ପ୍ରେମଲତା, ୧୩ ବର୍ଷ ଓ ୯ବର୍ଷର ଦୁଇ ଝିଅ ରହିଛନ୍ତି।