ଅନୁଗୋଳ ଅଫିସ୍, ୫।୭: ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ଦୁର୍ଘଟଣାଗ୍ରସ୍ତ ହୋଇ ଆସିଥିବା ଜଣେ ଯୁବକଙ୍କ କରୋନା ଟେଷ୍ଟ ରିପୋର୍ଟ ଶନିବାର ପଜିଟିଭ ବାହାରିଛି। ଯୁବକ ଜଣକ ଢେଙ୍କାନାଳ ଜିଲା ନିମବାହାଳି ଅଞ୍ଚଳର ବୋଲି ଜଣାପଡିଛି। ଏହି ଖବର ଜଣାପଡିବା ପରେ ମେଡିକାଲ କର୍ମଚାରୀଙ୍କ ମଧ୍ୟରେ ଆତଙ୍କ ଖେଳିଯାଇଛି। ସୂଚନା ମୁତାବକ, ଦୁର୍ଘଟଣା ପରେ ଯୁବକ ଜଣକ ମେଡିକାଲକୁ ଆସିଥିବାବେଳେ ତାଙ୍କଠାରୁ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା। ରିପୋର୍ଟ ଆସିବା ପୂର୍ବରୁ ଯୁବକଙ୍କୁ ଜିଲା ଚିକିତ୍ସାଳୟର ପୁରୁଷ ଓ୍ବାର୍ଡ ଓ ଟ୍ରକ୍ ଆସୋସିଏଶନ କ୍ୟାବିନରେ ଚିକିତ୍ସା କରାଯାଇଥିଲା। ଏହାପରେ ସେ ଭୁବନେଶ୍ୱର ସ୍ଥାନାନ୍ତର ହୋଇଥିଲେ। ରିପୋର୍ଟ ପଜିଟିଭ ଆସିବା ପରେ ପ୍ରଶାସନର ଚିନ୍ତା ବଢିଛି। ପ୍ରତିଷେଧକମୂଳକ ପଦକ୍ଷେପ ସ୍ବରୂପ ମେଡିକାଲର ଟ୍ରକ ଆସୋସିଏଶନ୍କୁ ସିଲ୍ କରି ସାନିଟାଇଜ୍ କରାଯିବ। ଏଥିସହ ଆସୋସିଏଶନ୍ରେ କାର୍ଯ୍ୟରତ ସମସ୍ତ କର୍ମଚାରୀଙ୍କୁ କ୍ବାରାଣ୍ଟାଇନ୍ରେ ରଖାଯାଇ ସ୍ବାବ ପରୀକ୍ଷା କରାଯିବ ବୋଲି ଚିକିତ୍ସାଳୟ କର୍ତ୍ତୃପକ୍ଷ କହିଛନ୍ତି। ଏ ନେଇ ସିଡିଏମ୍ଓ ଅଭୟ କୁମାର ଦାଶ କହିଛନ୍ତି, ରବିବାର ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା କର୍ମଚାରୀଙ୍କୁ ଚିହ୍ନଟ କରାଯାଇ ଜିଲାପାଳଙ୍କୁ ଅବଗତ କରାଯିବ।
