ନୂଆଦିଲ୍ଲୀ,୩ ।୧: ଦେଶ ପ୍ରାୟ ୧ ବର୍ଷ ହେବ କରୋନା ମହାମାରୀ ସହ ଲଢି ଚାଲିଥିବା ବେଳେ ରବିବାର ସ୍ୱେଦେଶୀ ଭ୍ୟାକ୍ସିନକୁ ଜରୁରୀକାଳିନ ପରିସ୍ଥିତିରେ ବ୍ୟବହାର କରିବାକୁ ମଞ୍ଜୁରୀ ପ୍ରଦାନ କରାଯାଇଛି । ଏକ୍ସପର୍ଟ କମିଟିର ସୁପାରିସ ପରେ ରବିବାର ଡ୍ରଗ୍ସ କଣ୍ଟ୍ରୋଲର ଜେନରାଲ ଅଫ୍ ଇଣ୍ଡିଆ(ଡିସିଜିଆଇ) ସିରମ ଇନଷ୍ଟିଚ୍ୟୁଟ ଅଫ୍ ଇଣ୍ଡିଆର ଭ୍ୟାକ୍ସିନ କୋଭିସିଲ୍ଡ ଓ ଭାରତ ବାୟୋଟେକର କୋଭାକ୍ସିନକୁ ଶେଷରେ ଜରୁରୀକାଳିନ ସ୍ଥିତିରେ ବ୍ୟବହାର ପାଇଁ ଅନୁମତି ପ୍ରଦାନ କରିଛି । ଦେଶର ଡ୍ରଗ୍ସ କଣ୍ଟ୍ରୋଲର ଜେନରାଲ ବିଜି ସୋମାନି ଏକ ଖବରଦାତା ସମ୍ମିଳନୀରେ କହିଛନ୍ତି, ସିଡିଏସ୍ସିଓ ପର୍ଯ୍ୟାପ୍ତ ଅଧ୍ୟୟନ ପରେ ବିଶେଷଜ୍ଞ ସମିତିର ମଞ୍ଜୁରୀକୁ ସ୍ୱୀକାର କରିଛି ଓ ସେହି ଅନୁଯାୟୀ ଉକ୍ତ ୨ଟି ଟିକାକୁ ଜରୁରୀକାଳିନ ସ୍ଥିତିରେ ବ୍ୟବହାର କରିବାକୁ ସ୍ୱୀକୃତି ପ୍ରଦାନ କରିଛି । ଏହା ଫଳରେ ଆଗାମୀ ଦିନରେ ଭାରତରେ ୨ଟି ଟିକା ଜାରି କରିବାର ରାସ୍ତା ସଫା ହୋଇଯାଇଛି । ଏହାପରେ କେତେଜଣ ଏହି ଭ୍ୟାକ୍ସିନକୁ ନେଇ ଭୁଲ ତଥ୍ୟ ପ୍ରଚାର କରୁଥିବା ଜଣାପଡିଛି । ଇତିମଧ୍ୟରେ ସମାଜବାଦୀ ପାର୍ଟିର ଜଣେ ନେତା କହିଛନ୍ତି କରୋନା ଟିକା ନେଲେ ନପୁସଂକ ହେବାର ସମ୍ଭାବନା ରହିଛି । ଏହା ଜାଣିବା ପରେ ଡ୍ରଗ୍ସ କଣ୍ଟ୍ରୋଲର ଜେନରାଲ ବିଜି ସୋମାନି କହିଛନ୍ତି ଏହା ସମ୍ପୂର୍ଣ୍ଣ ମିଥ୍ୟା । ଭ୍ୟାକ୍ସିନ ୧୧୦ ପ୍ରତିଶତ ସୁରକ୍ଷିତ । ଯଦି ଭ୍ୟାକ୍ସିନର ବ୍ୟବହାରକୁ ନେଇ ସାମାନ୍ୟ ଦ୍ୱନ୍ଦ୍ୱ ଥାଆନ୍ତା ତେବେ ଏହାକୁ ଅନୁମତି ମିଳି ନ ଥାଆନ୍ତା । ହେଲେ ଭ୍ୟାକ୍ସିନ ନେବା ପରେ ସାମାନ୍ୟ, ଜ୍ୱର, ମୁଣ୍ଡବିନ୍ଧା, ଆଲର୍ଜି ଦେଖା ଦେଇପାରେ । ସୂଚନାଯୋଗ୍ୟ, ଗୋଟିଏ ଦିନ ପୂର୍ବରୁ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ କହିଥିଲେ ଦେଶରେ ଯେଉଁ ଭ୍ୟାକ୍ସିନକୁ ଅନୁମତି ମିଳିଛି ତାହା ଭାରତୀୟ ଜନତା ପାର୍ଟି(ଭାଜପା)ର ତେଣୁ ଏହା ଉପରେ ମୋର ଭରସା ନାହିଁ ତେଣୁ ମୁଁ ଏହି ଭ୍ୟାକ୍ସିନ ନେବି ନାହିଁ । ଏହାପରେ ସମାଜବାଦୀ ପାର୍ଟିର ବିଧାୟକ ଆଶୁତୋଷ ସିହ୍ନା କହିଥିଲେ ଏହି ଭ୍ୟାକ୍ସିନ ନପୁସଂକ କରିଦେଇପାରେ । ଆଉ ଏହା ସମ୍ପୂର୍ଣ୍ଣ ଭୁଲ ବୋଲି କହିଛି ଡିସିଜିଆଇ ।