ନୂଆଦିଲ୍ଲୀ,୨୧ା୧୨: ଆସନ୍ତା ନୂଆବର୍ଷରୁ ଦେଶରେ କରୋନା ଟିକାକରଣ ଆରମ୍ଭ ହେବ ବୋଲି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡକ୍ଟର ହର୍ଷବର୍ଦ୍ଧନ କହିଛନ୍ତି।
ଟିକା ଦିଆଯିବା ନେଇ ସମସ୍ତ ଯୋଜନା ହୋଇଥିବା ବେଳେ ଏଥିରେ ଅବହେଳା କରାଯିବ ନାହିଁ ବୋଲି ସ୍ବାସ୍ଥ୍ୟମନ୍ତ୍ରୀ କହିଛନ୍ତି। ଦେଶରେ ଟିକା ଉପଲବ୍ଧ କରାଇବା ପାଇଁ ଏକ ରୋଡ୍ମ୍ୟାପ ମଧ୍ୟ ପ୍ରସ୍ତୁତ କରାଯାଇଛି। ୬ଟି ଟିକା କ୍ଲିନିକାଲ ପରୀକ୍ଷା ପର୍ଯ୍ୟାୟରେ ଥିବା ବେଳେ ତିନୋଟି ଟିକା ପ୍ରି-କ୍ଲିନିକାଲ ପର୍ଯ୍ୟାୟରେ ଅଛି। କିଛି ସପ୍ତାହରେ ଏସବୁର ପରୀକ୍ଷଣ ଶେଷ ହୋଇଯିବ। ଜାନୁୟାରୀର ଯେକୌଣସି ସପ୍ତାହରେ ଟିକା କରଣ ଆରମ୍ଭ ହୋଇପାରେ ବୋଲି ହର୍ଷବର୍ଦ୍ଧନ ସୂଚନା ଦେଇଛନ୍ତି ।
ହର୍ଷବର୍ଦ୍ଧନ ଆହୁରି ମଧ୍ୟ କହିଛନ୍ତି, ଟିକାର ପ୍ରଭାବ ଓ ଗୁଣାବତ୍ତା ଉପରେ ବିଶେଷ ଗୁରୁତ୍ୱ ଦିଆଯିବ। ପୋଲିଓ ପରି ଭାରତ ମଧ୍ୟ କରୋନା ଫ୍ରି ହେବ ବୋଲି ବିଶେଷଜ୍ଞମାନେ କହିଛନ୍ତି। ଅନେକ ଆଲୋଚନା ପର୍ଯ୍ୟାଲୋଚନା ପରେ ଟିକାକରଣ ପାଇଁ ଦେଶର ୩୦କୋଟି ଲୋକଙ୍କୁ ଅଗ୍ରାଧିକାର ତାଲିକାରେ ସାମିଲ କରାଯାଇଛି। ଏଥିରେ ସ୍ବାସ୍ଥ୍ୟକର୍ମୀ, ପୋଲିସ, ଯବାନ, ସଫେଇ କର୍ମଚାରୀ, ୫୦ରୁ ଊର୍ଦ୍ଧ୍ୱ ବୟସ୍କ ବ୍ୟକ୍ତି ଏଥିରେ ସାମିଲ ହେବେ। ଯେଉଁମାନେ ଟିକା ନେବାକୁ ଇଚ୍ଛା ପ୍ରକାଶ କରିବେନି, ସେମାନଙ୍କୁ ବାଧ୍ୟ କରାଯିବ ନାହିଁ ବୋଲି ମଧ୍ୟ ସ୍ବାସ୍ଥ୍ୟମନ୍ତ୍ରୀ ସୂଚନା ଦେଇଛନ୍ତି।