ଟୋକିଓ, ୨୮ା୫(ଏପି)-ଟୋକିଓ ଅଲିମ୍ପିକ୍ସର ଆୟୋଜନ ଦ୍ୱାରା କରୋନା ଭାଇରସ୍ର ନୂଆ ଭାରିଆଣ୍ଟ୍ସ ବ୍ୟାପିବା ଆଶଙ୍କା ରହିଛି। ଜାପାନ ଡାକ୍ତର ସଂଘର ପ୍ରତିନିଧିତ୍ୱ କରୁଥିବା ଜଣେ ସ୍ବାସ୍ଥ୍ୟ ବିଶେଷଜ୍ଞ ନାଓତୋ ଉୟାମା ଏକଥା ପ୍ରକାଶ କରିଛନ୍ତି। ଦେଶରେ ଅଲିମ୍ପିକ୍ସ ଆୟୋଜନ ହେଲେ ଏଥିରେ ଭାଗନେବା ଲାଗି ୨୦୦ରୁ ଅଧିକ ଦେଶର ୧୫,୦୦୦ ଅଲିମ୍ପିକ ଓ ପାରାଅଲିମ୍ପିକ ଆଥଲେଟ୍ଙ୍କ ସମାଗମ ହେବ। ଏହାଛଡ଼ା ୧୦ହଜାର ଅଫିସିଆଲ, ଜଜ୍, ମିଡିଆ ଓ ବ୍ରଡ୍କାଷ୍ଟର ମଧ୍ୟ ଆସିବେ। ସେମାନଙ୍କ ପରାମର୍ଶକୁ ଜାପାନ ସରକାର ହେୟଜ୍ଞାନ କରୁଛନ୍ତି। ସରକାର ବଡ଼ ରିସ୍କ ନେଉଛନ୍ତି ବୋଲି ସେ କହିଛନ୍ତି। ବର୍ତ୍ତମାନ ପରିସ୍ଥିତିରେ ଅଲିମ୍ପିକ ଆୟୋଜନ ଦ୍ୱାରା କ’ଣ ଘଟିବ ତାହା ପୂର୍ବାନୁମାନ କରିବା କଠିନ ବ୍ୟାପାର ବୋଲି ଉୟାମା କହିଛନ୍ତି। ଏଣେ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଓ ସ୍ଥାନୀୟ ଆୟୋଜକ ବିଶ୍ୱ ସ୍ବାସ୍ଥ୍ୟ ସଂଗଠନର ପବ୍ଲିକ ହେଲ୍ଥ ଗାଇଡାନ୍ସ ଉପରେ ନିର୍ଭର କରୁଛନ୍ତି। ଅଲିମ୍ପିକ ଓ ପାରାଅଲିମ୍ପିକ୍ସ ସୁରକ୍ଷିତ ଓ ନିରାପଦ। ଏହି ସଂଗଠନ ବ୍ୟାପକ ଟେଷ୍ଟିଂ, କଡ଼ାକଡ଼ି ପ୍ରୋଟୋକଲ, ସାମାଜିକ ଦୂରତା ଏବଂ ବହୁ ସଂଖ୍ୟାରେ ଆଥ୍ଲେଟଙ୍କୁ ଟୋକିଓ ଉପକୂଳବର୍ତ୍ତୀ ଅଲିମ୍ପିକ ଭିଲେଜରେ ପୃଥକ୍ ପୃଥକ୍ ଭାବେ ରଖିବା ଉପରେ ଗୁରୁତ୍ୱାରୋପ କରୁଛି। ଭିଲେଜ୍ରେ ଅବସ୍ଥାନ କରୁଥିବା ୮୦ପ୍ରତିଶତରୁ ଊର୍ଦ୍ଧ୍ୱ ଲୋକଙ୍କର ଟିକାକରଣ ହେବ। ସେ ତୁଳନାରେ ଜାପାନରେ ଟିକାକରଣ ମନ୍ଥର ରହିଛି। ଦେଶରେ ୫% ଲୋକ ଟିକା ନେଇସାରିଛନ୍ତି। ଜାପାନର ଡାକ୍ତର ମହାସଂଘ ଅଲିମ୍ପିକ୍ସକୁ ବିରୋଧ କରୁଛି। ଏହାକୁ ବାତିଲ କରିବା ଲାଗି ସରକାରଙ୍କ ଉପରେ ଚାପ ପକାଉଛନ୍ତି। ଉୟାମା କହିଛନ୍ତି, ଅଲିମ୍ପିକ୍ସ ଆୟୋଜନ ଦ୍ୱାରା ବ୍ରିଟେନ, ବ୍ରାଜିଲ, ଭାରତ ଓ ଦକ୍ଷିଣ ଆଫ୍ରିକାରେ ଯେଉଁ ଷ୍ଟ୍ରେନ୍ର ଭାଇରସ ଦେଖାଯାଉଛିି ତାହା ହୁଏତ ଟୋକିଓକୁ ଆସିଯାଇପାରେ। ପିସିଆର ଟେଷ୍ଟିଂ ଓ ଟିକାକରଣ ଦ୍ୱାରା ସମ୍ପୂର୍ଣ୍ଣ ସୁରକ୍ଷିତ ମନେକରିବା ଠିକ୍ ନୁହେଁ ବୋଲ ସେ ପୁଣି ଦୋହରାଇ କହିଛନ୍ତି।
