ଓ୍ବାଶିଂଟନ,୨।୨ : ଆମେରିକାରେ ଧଳା ହରିଣଠାରେ କରୋନା ମହମାରୀ ବ୍ୟାପିବା ନେଇ ଚିନ୍ତା ବଢ଼ିବାରେ ଲାଗିଛି। ହରିଣଙ୍କଠାରେ କରୋନା ଭୂତାଣୁ ମନୁଷ୍ୟ ତୁଳନାରେ ୮୦ ଥର ନିଜର ରୂପ ପରିବର୍ତ୍ତନ କରି ନୂଆ ନୂଆ ଭାରିଆଣ୍ଟ ସୃଷ୍ଟି କରିଛି।
ବୈଜ୍ଞାନିକମାନେ ଉତ୍ତର ଆମେରିକାରେ ଧଳା ହରିଣଠାରେ ସାର୍ସ କୋଭ-୨ ଭାରିଆଣ୍ଟର ଉପସ୍ଥିତି ପାଇଛନ୍ତି ଯାହା ଏକଦା ମଣିଷମାନଙ୍କ ମଧ୍ୟରେ ବହୁଳ ଭାବରେ ସଂକ୍ରମଣ କରିଥିଲା କିନ୍ତୁ ଏବେ ଏହା ମଣିଷମାନଙ୍କଠାରେ ଆଉ ଦେଖିବାକୁ ମିଳୁ ନାହିଁ। ଗବେଷକମାନେ କହିଛନ୍ତି ଯେ ମଣିଷଠାରେ ମିଳୁଥିବା ଭୂତାଣୁ ତୁଳନାରେ ହରିଣରେ ମିଳୁଥିବା କେତେକ ଭୂତାଣୁୁ ୮୦ ଥର ନିଜର ସଂରଚନା ବଦଳାଇଛନ୍ତି।
ଆମେରିକାର କର୍ନେଲ ବିଶ୍ୱବିଦ୍ୟାଳୟର ଗବେଷକମାନେ କହିଛନ୍ତି ଯେ ଦୀର୍ଘ ଦିନ ଧରି ହରିଣଠାରେ ଏହି ଭାରିଆଣ୍ଟ ଉପସ୍ଥିତ ଅଛି କି ନାହିଁ ତାହା ଏପର୍ଯ୍ୟନ୍ତ ଜଣା ପଡିନାହିଁ। ତଥାପି, ଅଧିକ ତଥ୍ୟ ସଂଗ୍ରହ କରାଯାଉଛି । ଏହି ଅଧ୍ୟୟନ ଅନୁସନ୍ଧାନ ପତ୍ରିକା ପ୍ରୋସିଡିଙ୍ଗସ ଅଫ ନ୍ୟାଶନାଲ ଏକାଡେମୀ ଅଫ ସାଇନ୍ସରେ ପ୍ରକାଶିତ ହୋଇଛି। କର୍ନେଲ ବିଶ୍ୱବିଦ୍ୟାଳୟର ଆସୋସିଏଟ ପ୍ରଫେସର ଡିଏଗୋ ଡାଏଲେ କହିଛନ୍ତି ଯେ ଏହି ଅଧ୍ୟୟନର ଏକ ଗୁରୁତ୍ୱପୂର୍ଣ୍ଣ ଅନୁସନ୍ଧାନ ହେଉଛି ତିନୋଟି ଚିନ୍ତାଜନକ ସ୍ବରୂପ ଆଲଫା, ଗାମା ଏବଂ ଡେଲଟା ଜଙ୍ଗଲରେ ବାସ କରୁଥିବା ପ୍ରାଣୀଙ୍କଠାରେ ଚିହ୍ନଟ ହେବା।
ଅଧ୍ୟୟନ ଅନୁଯାୟୀ, ମହାମାରୀ ସମୟରେ ହରିଣମାନେ ସାର୍ସ କୋଭ-୨ ଦ୍ୱାରା ସଂକ୍ରମିତ ହୋଇଥିଲେ। ଡିଏଲ କହିଛନ୍ତି ଯେ ଏସିଆରେ ମଣିଷମାନଙ୍କଠାରେ ସୃଷ୍ଟି ହୋଇଥିବା ଏକ ଭୂତାଣୁ ବର୍ତ୍ତମାନ ଉତ୍ତର ଆମେରିକାର ବନ୍ୟପ୍ରାଣୀଙ୍କଠାରେ ଦେଖିବାକୁ ମିଳିଛି।
ଗବେଷଣାରେ ବ୍ୟବହୃତ ୫,୭୦୦ ନମୁନା ୨୦୨୦ ରୁ ୨୦୨୨ ପର୍ଯ୍ୟନ୍ତ ସଂଗ୍ରହ କରାଯାଇଥିଲା। ଯେତେବେଳେ ଗବେଷକମାନେ ହରିଣଠାରେ ମିଳୁଥିବା ଏକ ପ୍ରକାରର ଜେନୋମିକ କ୍ରମକୁ ନ୍ୟୁୟର୍କରେ ମାନବଙ୍କଠାରୁ ନିଆଯାଇଥିବା ସମାନ ପ୍ରକାରର କ୍ରମ ସହିତ ତୁଳନା କଲେ, ସେମାନେ ଜାଣିବାକୁ ପାଇଲେ ଯେ ହରିଣଙ୍କଠାରେ ଦେଖାଦେଇଥିବା ଭୂତାଣୁର ସ୍ବରୂପରେ ପରିବର୍ତ୍ତନ ହୋଇଛି। ଅଧ୍ୟୟନ ଅନୁଯାୟୀ, ଏହା ସୂଚିତ କରୁଛି ଯେ ହରିଣଙ୍କଠାରେ ଅନେକ ମାସ ଧରି ଭୂତାଣୁ ଉପସ୍ଥିତ ରହିଥିଲା। ଅଧ୍ୟୟନରେ ଦର୍ଶାଯାଇଛି ଯେ ହରିଣଙ୍କଠାରେ ଆଲଫା ଏବଂ ଗାମା ଭାରିଆଣ୍ଟର ଉପସ୍ଥିତି ଜଣାଶୁଣା ଥିବାବେଳେ ମଣିଷଠାରେ ଏହି ପ୍ରକାରର କୌଣସି ପ୍ରମାଣ ନାହିଁ।