ଓ୍ବାଶିଂଟନ, ୭।୧୦: କରୋନା ମହାମାରୀ ନେଇ ପୃଥିବୀରେ ଲୋକଙ୍କ ମଧ୍ୟରେ ଆତଙ୍କ ଜାରି ରହିଛି। ଏପରିସ୍ଥଳେ ଏକ ରିପୋର୍ଟରେ ଉଲ୍ଲେଖ କରାଯାଇଛି ଯେ, ତ୍ୱଚାରେ କରୋନା ଭୂତାଣୁ ୯ ଘଣ୍ଟା ପର୍ଯ୍ୟନ୍ତ ସକ୍ରିୟ ରହିପାରେ। ତେବେ ଏହାଦ୍ୱାରା ଫୁସଫୁସ୍ ପ୍ରତି କୌଣସି ବିପଦ ସୃଷ୍ଟି ହେବାର ଆଶଙ୍କା ନ ଥାଏ। ମେଡ଼ିକାଲ ଜର୍ନାଲ କ୍ଲିନିକାଲ ଇନଫେକସିୟସ୍ ଡିଜିଜ୍ରେ ଏସମ୍ପର୍କରେ ରିପୋର୍ଟ ପ୍ରକାଶ ପାଇଛି। କେବଳ ମାସ୍କ୍ ବ୍ୟବହାର କଲେ ଫୁସଫୁସ୍ ସଂକ୍ରମରରୁ ସହଜରେ ଦୂରେଇ ରହିହେବ ବୋଲି ଏଥିରେ ଦର୍ଶାଯାଇଛି। ତ୍ୱଚାରେ ୮୦ ପ୍ରତିଶତ ଆଲକୋହଲ ଥିବା ସାନିଟାଇଜର ଲଗାଇଲେ ମାତ୍ର ୧୫ ସେକେଣ୍ଡ ମଧ୍ୟରେ କରୋନା ଭୂତାଣୁ ନଷ୍ଟ ହୋଇଯାଇଥାଏ। ଆମେରିକାର ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ ଆଣ୍ଡ୍ ପ୍ରିଭେନଶନ୍ ଅନୁସାରେ ସାନିଟାଇଜର ଲଗାଇଲେ ଅଥବା ସାବୁନରେ ୨୦ ସେକେଣ୍ଡ ପର୍ଯ୍ୟନ୍ତ ହାତ ଧୋଇଲେ କରୋନା ଭୂତାଣୁ ନଷ୍ଟ ହୋଇଯାଇଥାଏ। ତେଣୁ ସାବୁନ ଲଗାଇ ଗାଧୋଇଲେ କରୋନା ଭୂତାଣୁ ସଂକ୍ରମଣରୁ ସହଜରେ ଦୂରେଇ ହୋଇ ରହିବା ସମ୍ଭବ ହୋଇପାରିଥାଏ।