ବେଜିଂ,୫।୪: ଦିନକୁ ଦିନ ଚାଇନାରେ କରୋନା ସ୍ଥିତି ବିଗିଡ଼ିବାରେ ଲାଗିଛି। କରୋନାର ଏନ୍ତୁଡିଶାଳ କୁହାଯାଉଥିବା ଚାଇନାରେ ବର୍ତ୍ତମାନ ହଜାର ହଜାର ସଂଖ୍ୟାରେ ଦୈନିକ ସଂକ୍ରମଣ ଚିହ୍ନଟ ହେଉଛନ୍ତି। ପରିସ୍ଥିତି ଏଭଳି ହୋଇଛି ଯେ, ନା ରୋଗୀଙ୍କ ପାଇଁ ହସ୍ପିଟାଲରେ ଶଯ୍ୟା ଅଛି ନା ଆମ୍ବୁଲାନ୍ସ ସେବା ମିଳୁଛି। ଏଥିସହ ଦୋକାନ ଓ ଷ୍ଟୋରରେ ମଧ୍ୟ ଖାଦ୍ୟର ଅଭାବ ଦେଖାଦେଲାଣି। ଅନ୍ୟପଟେ ସଂଘାଇରେ ବର୍ତ୍ତମାନ ସଂକ୍ରମିତ ନିଖୋଜ ହୋଇଯାଉଥିବା ଜଣାପଡ଼ିଛି। ଲୋକଙ୍କୁ ଅଇସୋଲେଟ କରିବାକୁ ସ୍ଥାନ ମିଳୁ ନ ଥିବାରୁ ସେମାନଙ୍କୁ ଅନ୍ୟତ୍ର ସ୍ଥାନକୁ ସ୍ଥାନାନ୍ତରିତ କରାଯାଉଥିବା କୁହାଯାଉଛି। ସୂଚନାଯୋଗ୍ୟ, ସୋମବାର ଚାଇନାରେ ୧୬,୪୧୨ ନୂଆ କରୋନା ମାମଲା ସାମ୍ନାକୁ ଆସିଛି। ମହାମାରୀ ଆରମ୍ଭ ହେବା ଦିନରୁ ଏହା ପ୍ରଥମ ଥର ଚାଇନାରେ ଏତେ ସଂଖ୍ୟକ ରୋଗୀ ଚିହ୍ନଟ ହୋଇଛନ୍ତି। ସବୁଠାରୁ ଖରାପ ଅବସ୍ଥା ହେଉଛି ଚାଇନାର ଆର୍ଥିକ ରାଜଧାନୀ ସଂଘାଇରେ। ଏଠାରେ ସମ୍ପୂର୍ଣ୍ଣ ଲକ୍ଡାଉନ ଲାଗୁ କରାଯାଇଥିବା ବେଳେ କଡ଼ା କଟକଣା ଜାରି କରାଯାଇଛି। ବିନା କାରଣରେ ଘରୁ ବାହାରିବା ଉପରେ ପ୍ରତିବନ୍ଧକ ଲଗାଯାଇଛି। କେବଳ ମେଡିକାଲ ଜରୁରୀକାଳୀନ ପରିସ୍ଥିତିରେ ଘରୁ ବାହାରିବା ପାଇଁ ଅନୁମତି ପ୍ରଦାନ କରାଯାଇଛି। ଅପରପକ୍ଷେ ସୋମବାର ୨.୬କୋଟି ଲୋକଙ୍କ କରୋନା ଟେଷ୍ଟ କରାଯାଇଛି। ଲୋକଙ୍କ ନ୍ୟୁକ୍ଲିକ୍ ଏସିଡ୍ ଟେଷ୍ଟ କରାଯାଉଛି। ଏହାଦ୍ୱାରା ଭୁଲ ରିପୋର୍ଟ ଆସିବା ସମ୍ଭାବନା ବହୁତ କମ୍। ଯଦି ସାମାନ୍ୟ କୋଭିଡ ଥାଏ ତେବେ ଏଥିରୁ ସହଜରେ ଜାଣିହେବ ବୋଲି ସଂଘାଇ ସ୍ବାସ୍ଥ୍ୟଅଧିକାରୀ ସୂଚନା ଦେଇଛନ୍ତି।