ୱାଶିଂଟନ,୨୫ ।୧୧: କରୋନା ମହାମାରୀ ଦ୍ୱାରା ପ୍ରଭାବିତ ହୋଇଥିବା ଆମେରିକାରେ ଏବେ ଏହି ମହାମାରୀ ଶିଶୁଙ୍କୁ ଦ୍ରୁତ ଗତିରେ ସଂକ୍ରମିତ କରୁଥିବା ଜଣାପଡିଛି । ଭାଇରସର ଏହି ରୂପ ବିଶ୍ୱ ପାଇଁ ସତର୍କ ଘଣ୍ଟି ହୋଇପାରେ ବୋଲି କୁହାଯାଉଛି । ଆମେରିକାନ ଏକାଡେମୀ ଅଫ୍ ପେଡିଆଟ୍ରିକ୍ସ(ଏଏପି)ର ଏକ ରିପୋର୍ଟ ଅନୁଯାୟୀ, ଗତ ସପ୍ତାହେ ମଧ୍ୟରେ ୧୧ରୁ ୧୮ ନଭେମ୍ବର ମଧ୍ୟରେ ୧,୪୧,୯୦୫ ଶିଶୁ କରୋନାରେ ସଂକ୍ରମିତ ହୋଇଥିବା ଜଣାପଡିଛି । ରିପୋର୍ଟ ଅନୁଯାୟୀ, ଶିଶୁଙ୍କଠାରେ ସଂକ୍ରମଣ ହାର ଗତ ୨ ସପ୍ତାହ ତୁଳନାରେ ୩୨ ପ୍ରତିଶତ ବୃଦ୍ଧି ପାଇଛି । ତେଣୁ ଆମେରିକାରେ ଯେତିକି ଲୋକ କରୋନାରେ ସଂକ୍ରମିତ ହେଉଛନ୍ତି ସେମାନଙ୍କ ମଧ୍ୟରୁ ଶିଶୁଙ୍କ ସଂଖ୍ୟା ଏକ ତୃତୀୟାଂଶ ରହିଛି । ଆମେରିକାର ଶିଶୁଙ୍କ ସଂଖ୍ୟା ୨୨ ପ୍ରତିଶତ । ମହାମାରୀ କବଳରେ ଏବେ ୩ ପ୍ରତିଶତରୁ ଅଧିକ ଶିଶୁ ଆସିଯାଇଛନ୍ତି । ଏହି ଅନୁଯାୟୀ, ଏବେ ପର୍ଯ୍ୟନ୍ତ ଆମେରିକାରେ ୬୮ ଲକ୍ଷରୁ ଅଧିକ ଶିଶୁ କରୋନା ଦ୍ୱାରା ସଂକ୍ରମିତ ହୋଇସାରିଲେଣି । ହେଲେ କରୋନାରେ ଶିଶୁଙ୍କ ମୃତ୍ୟୁହାର ଖୁବ୍ କମ୍ ରହିଛି । ଏମିତିକି ଆମେରିକାର ୬ଟି ରାଜ୍ୟରେ ଜଣେ ହେଲେ ବି ଶିଶୁଙ୍କର ମୃତ୍ୟୁ ହୋଇ ନାହିଁ । ଶିଶୁଙ୍କଠାରେ କରୋନାର ସାମାନ୍ୟ ଲକ୍ଷଣ ଦେଖାଯାଉଥିବା ବେଳେ ଏମାନେ ଶୀଘ୍ର ସୁସ୍ଥ ହୋଇ ଯାଉଛନ୍ତି ବୋଲି କୁହାଯାଉଛି । ଏହାର କାରଣ ହେଉଛି କିଛିଦିନ ବ୍ୟବଧାନରେ ସେମାନେ ଇନଫ୍ଲୁଏଞ୍ଜା, ମେନିନୋଜାଇଟିସ, ଚିକେନପକ୍ସ ଓ ହେପାଟାଇଟିସ ଭଳି ଟିକା ନେଉଥିବାରୁ ଏମାଙ୍କର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଉଛି ।
