ଲଣ୍ଡନ,୭।୯: କରୋନା ଭାଇରସ ଦ୍ୱାରା ଅଧିକ ପରିମାଣରେ କ୍ଷତିଗ୍ରସ୍ତ ବ୍ୟକ୍ତିଙ୍କ ନିକଟରେ ଫୁସ୍ଫୁସ୍ ଜନିତ ସମସ୍ୟା ଦେଖାଯିବ ଆଶଙ୍କା ରହିଛି। କାରଣ ଏହି ଭୂତାଣୁ ପ୍ରଥମେ ଗଳା ଓ ପରେ ଫୁସ୍ଫୁସ୍କୁ ସଂକ୍ରମଣ କରି ଏହାକୁ କ୍ଷତି ପହଞ୍ଚାଇଥାଏ। ତେଣୁ କରୋନାରେ ସଂକ୍ରମିତ ଲୋକେ କିଛିଦିନ ପର୍ଯ୍ୟନ୍ତ ଫୁସ୍ଫୁସ୍ ସମସ୍ୟା ଦେଇ ଗତି କରିପାରନ୍ତି ବୋଲି ଡାକ୍ତରମାନେ ମତ ଦେଉଛନ୍ତି। ଏବେ କିନ୍ତୁ ଏକ ନୂଆ ଅଧ୍ୟୟନରୁ ଜଣାପଡିଛି କି କରୋନା ଦ୍ୱାରା ଯେଉଁମାନଙ୍କର ଫୁସ୍ଫୁସ୍ କ୍ଷତିଗ୍ରସ୍ତ ହୋଇଥିବ ତାହା ଅପାଣାଛାଏଁ ଠିକ୍ ହୋଇଯିବ। ବ୍ରିଟିଶ ଟେଲିଗ୍ରାଫର ଏକ ରିପୋର୍ଟ ଅନୁଯାୟୀ, ପାଖାପାଖି ୩ ମାସ ମଧ୍ୟରେ କରୋନା ସଂକ୍ରମିତଙ୍କ ଫୁସ୍ଫୁସ୍ ଆପଣାଛାଏଁ ସୁସ୍ଥ ହୋଇଯାଇ ପାରିବ। ଏଥିରୁ ଆଶା କରାଯାଉଛି କି ଯେଉଁ କରୋନା ସଂକ୍ରମିତଙ୍କ ଫୁସ୍ଫୁସ୍ କ୍ଷତିଗସ୍ତ ହୋଇଥିବ ସେମାନେ ହୁଏତ ଲମ୍ବା ସମୟ ପର୍ଯ୍ୟନ୍ତ ଏହି ଅସୁବିଧାକୁ ସାମ୍ନା ନ କରି ପାରନ୍ତି। ଅଧ୍ୟୟନରୁ ଜଣାପଡିଛି କି ସଂକ୍ରମିତ ଲୋକଙ୍କ ମଧ୍ୟରୁ ପାଖାପାଖି ଅଧା ଲୋକଙ୍କ ପାଖରେ ଯେଉଁମାନେ ସୁସ୍ଥ ହୋଇଯାଇଛନ୍ତି ୧୨ ସପ୍ତାହ ପରେ ବି ସେମାନଙ୍କ ଫୁସ୍ଫୁସ୍ ସୁସ୍ଥ ରହିଛି। ତେବେ କରୋନା ସଂକ୍ରମିତଙ୍କ ସୁସ୍ଥ ଫୁସ୍ଫୁସ୍ ସମ୍ପର୍କିତ ଏହା ପ୍ରଥମ ଷ୍ଟଡି ବୋଲି କୁହାଯାଉଛି। ଅନ୍ୟପଟେ କରୋନା ସଂକ୍ରମିତଙ୍କୁ ଚିକିତ୍ସା କରୁଥିବା ଅଧିକାଂଶ ଡାକ୍ତର ଏବେବି କହୁଛନ୍ତି କରୋନାରୁ ସୁସ୍ଥ ହେବାର କିଛି ସପ୍ତାହ ପର୍ଯ୍ୟନ୍ତ ରୋଗୀଙ୍କ ନିକଟରେ ଏହାର ସାଇଡ୍ ଇଫେକ୍ଟ ଦେଖିବାକୁ ମିଳିବ। ଗବେଷଣା ସମୟରେ ଅଷ୍ଟ୍ରିୟାର ୮୬ ରୋଗୀଙ୍କୁ ନିଆଯାଇଥିବା ସୂଚନା ଦିଆଯାଇଛି। ଏମାନେ ୨୯ ଏପ୍ରିଲରୁ ୯ ଜୁନ୍ ମଧ୍ୟରେ ହସ୍ପିଟାଲରେ ଭର୍ତ୍ତି ହୋଇଥିଲେ। ହସ୍ପିଟାଲରୁ ଡିସଚାର୍ଜ ହେବାର ୬ ଓ ୧୨ ସପ୍ତାହ ପରେ ଏମାନଙ୍କର ପରୀକ୍ଷା କରାଯାଇଥିଲା। ସୁସ୍ଥ ହେବାର ୬ ସପ୍ତାହ ପରେ ୮୮ ପ୍ରତିଶତଙ୍କ ନିକଟରେ ଫୁସ୍ଫୁସ୍ ସମସ୍ୟା ଦେଖାଯାଇଥିଲା। ହେଲେ ୧୨ ସପ୍ତାହ ପରେ ଏହା କମ୍ ହୋଇ ୫୬ ପ୍ରତିଶତରେ ପହଞ୍ଚିଥିଲା। ଏମାନଙ୍କ ମଧ୍ୟରେ ଅଧିକାଂଶ ପୁରୁଷ ଥିବା ବେଳେ ଏମାନଙ୍କ ବୟସ ପାଖାପାଖି ୬୧ ବର୍ଷ ଥିଲା। ଏମାନଙ୍କ ମଧ୍ୟରୁ ଅଧା ଲୋକ ପୂର୍ବରୁ ସ୍ମୋକର ଥିବା ବେଳେ ଅନ୍ୟମାନେ କରୋନା ଯୋଗୁ ଆଇସିୟୁରେ ଚିକିତ୍ସିତ ହୋଇଥିଲେ।