ରାଞ୍ଚି,୨୦।୭: ଦେଶରେ କରୋନା ମହାମାରୀ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହି କାରଣରୁ ବିଭିନ୍ନ ରାଜ୍ୟରେ ଲକ୍ଡାଉନ୍ ଏବଂ ଶଟ୍ଡାଉନ୍ ଭଳି ନିୟମ ଲାଗୁ କରାଯାଇଛି। କରୋନା ସଂକ୍ରମିତ ହେଉଥିବା ବ୍ୟକ୍ତିଙ୍କ ଘରକୁ ପ୍ରଶାସନ ସିଲ୍ କରିଦେଉଛି। ଏହାର ଫାଇଦା ଉଠାଉଛନ୍ତି ଚୋର। ଝାଡଖଣ୍ଡର ଜାମସେଦପୁରରେ ଜଣେ କରୋନା ସଂକ୍ରମିତଙ୍କ ଘର ସିଲ୍ ଥିବାବେଳେ ଚୋରମାନେ କୌଣସି ମତେ ଘରେ ପଶି ମାଂସ ରୋଷେଇ କରି ଖାଇବା ସହ ଘରୁ ଟଙ୍କା ଏବଂ ସୁନା ଗହଣା ଲୁଟି ନେଇଛନ୍ତି। ସ୍ଥାନୀୟ ଲୋକେ ଘର ତାଲା ଭଙ୍ଗାଥିବା ଦେଖି ଉକ୍ତ ବ୍ୟକ୍ତିଙ୍କ ସମ୍ପର୍କୀୟଙ୍କୁ ସୂଚନା ଦେଇଥିଲେ। ସେମାନେ ପୋଲିସକୁ ଜଣାଇବା ପରେ ମାମାଲାର ତଦନ୍ତ ଆରମ୍ଭ ହୋଇଛି। ସୂଚନାଯୋଗ୍ୟ, ଜାମସେଦପୁରର ପରସୁଡିହ ଥାନା ଅଞ୍ଚଳର ଶିକ୍ଷକ ଡି ସିଂହ ପୂର୍ତ୍ତି ଜୁଗସଲାଇ ନଗର ପରିଷଦ ଅଞ୍ଚଳରେ କରୋନା ଡ୍ୟୁଟିରେ ଥିବାବେଳେ ସେ ନିଜେ ସଂକ୍ରମିତ ହୋଇଯାଇଥିଲେ। ତାଙ୍କ ଟାଟା ମେନ୍ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଘରେ ଆଉ କୌଣସି ବ୍ୟକ୍ତି ନ ଥିବା କାରଣରୁ ପ୍ରଶାସନ ପୂର୍ତ୍ତିଙ୍କ ଘରକୁ ସିଲ୍ କରିଦେଇଥିଲା। ତାଙ୍କ ପରିବାର ଲୋକେ ଗାଁରେ ରହୁଥିବା ଜଣାପଡିଛି।
