ଭୁବନେଶ୍ୱର, ୨।୬(ବ୍ୟୁରୋ): ରାଜ୍ୟରେ ଦିନକୁ ଦିନ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି। ମଙ୍ଗଳବାର ଆଉ ୧୪୧ ଆକ୍ରାନ୍ତ ଚିହ୍ନଟ ହେବା ପରେ ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୨୨୪୫ରେ ପହଞ୍ଚିଛି। ସେଥିରୁ ୯୯୧ଜଣ ବିଭିନ୍ନ କୋଭିଡ୍ ହସ୍ପିଟାଲରେ ଚିକିତ୍ସିତ ହେଉଛନ୍ତି। ସେହିପରି ୧୨୪୫ ଜଣ ସୁସ୍ଥ ହୋଇଥିବା ବେଳେ ୭ ଜଣଙ୍କ ମୃତ୍ୟୁ ଘଟିଛି। ତେବେ ଜିଲାଓ୍ବାରୀ କରୋନା ତଥ୍ୟକୁ ଯଦି ଦେଖାଯାଏ ତେବେ ସର୍ବାଧିକ ଆକ୍ରାନ୍ତ ଜିଲାଭାବେ ଗଞ୍ଜାମ ଶୀର୍ଷରେ ରହିଛି। ବର୍ତ୍ତମାନ ପର୍ଯ୍ୟନ୍ତ ରାଜ୍ୟରେ ୭ଟି ଜିଲା ଶତକ ଛୁଇଁଛି। ଏହି ଜିଲାଗୁଡିକ ହେଲା ଗଞ୍ଜାମ, ଯାଜପୁର, ଖୋର୍ଦ୍ଧା, ବାଲେଶ୍ୱର, କେନ୍ଦ୍ରାପଡ଼ା, କଟକ ଓ ଭଦ୍ରକ।
ମୋଟାମୋଟି ଭାବେ ଦେଖିବାକୁ ଗଲେ ରାଜ୍ୟରେ ସର୍ବାଧିକ କରୋନା ଆକ୍ରାନ୍ତଙ୍କ ସଂଖ୍ୟା ଗଞ୍ଜାମ ଜିଲାରେ ରହିଛନ୍ତି। ଗଞ୍ଜାମରୁ ମଙ୍ଗଳବାର ୨୭ ଆକ୍ରାନ୍ତ ଚିହ୍ନଟ ହେବା ପରେ ଏଠାରେ ପଜିଟିଭ ସଂଖ୍ୟା ୪୫୮ରେ ପହଞ୍ଚିଛି। ଯାଜପୁରରେ ୨୯୦ ଜଣ କରୋନା ଆକ୍ରାନ୍ତ ରହିଥିବା ବେଳେ ଖୋର୍ଦ୍ଧା ୧୬୭, ବାଲେଶ୍ୱର ୧୫୪, କେନ୍ଦ୍ରାପଡ଼ା ୧୫୨, କଟକ ୧୨୬, ଭଦ୍ରକ ୧୨୦ ଜଣ ଆକ୍ରାନ୍ତ ରହିଛନ୍ତି।
