ଓ୍ବାଶିଂଟନ,୧୦।୮: ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲୁଏଚ୍ଓ) ଏକ ଚେତାବନୀ ଦେଇ କହିଛି କରୋନା ଭାଇରସର ଟିକା ବା ଭ୍ୟାକ୍ସିନ କୌଣସି ମ୍ୟାଜିକ ନୁହେଁ। ଏହା ଯେଉଁ ମାସରେ ଆସିବ ସେହି ମାସରେ ଯେ ସଂକ୍ରମଣ ଆଖି ପିଛୁଳାକେ କମ୍ ହୋଇଯିବ ତାହା ଭାବିବା ଭୁଲ୍ ବୋଲି କହିଛି ଡବ୍ଲୁଏଚ୍ଓ। ଡବ୍ଲୁଏଚ୍ଓର ମହାନିର୍ଦ୍ଦେଖଶକ ଟେହରସ୍ ଅଡାନୋମ କହିଛନ୍ତି ଆମକୁ ଲମ୍ବା ରାସ୍ତା ଅତିକ୍ରମ କରିବାର ଅଛି। ତେଣୁ ସମସ୍ତେ ମିଶି ଆମେ କରୋନା ସହ ଲଢିବା। ଅନ୍ୟପଟେ ଜନ୍ ହପକିନ୍ସ ୟୁନିଭର୍ସିଟି କହିଛି ଆମେରିକାରେ ଏବେ କରୋନା ସଂକ୍ରମଣ ୫୦ ଲକ୍ଷ ଅତିକ୍ରମ କରି ସାରିଲାଣି। ଆମେରିକାର ସଂକ୍ରାମକ ରୋଗ ବିଶେଷଜ୍ଞ ଡା. ହଥନି ଷ୍ଟିଫନ ଫଁାସିର ବରିଷ୍ଠ ପରାମର୍ଶଦାତା ଡେଭିଡ ମାରେଂସ କହିଛନ୍ତି ଭ୍ୟାକ୍ସିନ ପ୍ରସ୍ତୁତ କରିବା ଏକ ଅନ୍ଧ ପରୀକ୍ଷା ଭଳି। ଏହା ଆରମ୍ଭରୁ ଭଲ ଫଳ ଦେଇପାରେ ହେଲେ ଏହାର କିଛି ଗ୍ରାରେଣ୍ଟି ନାହିଁ ଯେ ଏହା ଶେଷ ପର୍ଯ୍ୟାୟରେ ବି ସଫଳ ହୋଇପାରେ। ହେଲେ ବିଶେଷଜ୍ଞମାନେ ଶତ ଚେଷ୍ଟା ଜାରି ରଖିଛନ୍ତି ଯେ ଏହା ଭଲ ଫଳ ଦେଉ। ୬-୧୨ ମାସ ମଧ୍ୟରେ ଆମମାନଙ୍କ ନିକଟରେ ଏକ ଭଲ ଭ୍ୟାକ୍ସିନ ଉପଲବ୍ଧ ହେଉ ବୋଲି ଆମେ ଆଶା ରଖିବୁ ନିଶ୍ଚୟ। ଅନ୍ୟ ବିଶେଷଜ୍ଞଙ୍କ ମତ ହେଉଛି କରୋନା ଭାଇରସ ପାଇଁ ଏକ ପ୍ରଭାବଶାଳୀ ଭ୍ୟାକ୍ସିନର ବିକାଶ ନିଶ୍ଚିତ ନୁହେଁ ଯାହା ଆମେ ଚିନ୍ତା କରୁଛୁ। ତେଣୁ କରୋନା ସଂକ୍ରମଣକୁ ନେଇ ଯାହା ଗାଇଡ୍ଲାଇନ୍ ରହିଛି ତାକୁ ଆମେ ପାଳନ କରିବା ଭଲ।