ବାର୍ସିଲୋନା,୨୮।୬: କରୋନା ଭାଇରସ ଏବେ ସାରା ବିଶ୍ୱକୁ ଦୋହଲାଇ ଦେଇଥିବା ବେଳେ ଏହା ପ୍ରଥମେ ଚାଇନାର ଉହାନ ସହରରୁ ଆରମ୍ଭ ହୋଇଥିବା ସୂଚନା ରହିଛି। ହେଲେ ନିକଟରେ ସ୍ପେନ ବାର୍ସିଲୋନା ୟୁନିଭର୍ସିଟିର ବିଶେଷଜ୍ଞମାନେ ଦାବି କରିଛନ୍ତି କି କରୋନା ଭାଇରସ ଚାଇନାରେ ଦେଖାଦେବାର ୯ ମାସ ପୂର୍ବରୁ ସ୍ପେନରେ ଦେଖାଦେଇଥିଲା। କରୋନା ଭାଇରସକୁ ନେଇ ଗବେଷଣା କରୁଥିବା କେତେଜଣ ବିଶେଷଜ୍ଞ ଏହା ସ୍ପେନର ମଇଳା ପାଣିରେ ପ୍ରଥମେ ଦେଖାଦେଇଥିବା ଦାବି କରିଛନ୍ତି। ସେମାନଙ୍କ ମତରେ ଏହା ସ୍ପନରେ ମାର୍ଚ୍ଚ ୨୦୧୯ରେ ମିଳିଥିଲା। ତେଣୁ ଏହାର ୯ ମାସ ପରେ ଅର୍ଥାତ୍ ଡିସେମ୍ବର ୨୦୧୯ରେ ଚାଇନାରେ କରୋନା ଭାଇରସରର ଉପସ୍ଥିତି ସାମ୍ନାକୁ ଆସିଥିଲା। ଚାଇନାର ବିଶେଷଜ୍ଞମାନେ ମଧ୍ୟ ଏହା କହିଥିଲେ। ଏମିତିକି ଇଟାଲୀରେ ମଧ୍ୟ କରୋନା ଭାଇରସର ଉତ୍ପତିକୁ ନେଇ ନୂଆ ତଥ୍ୟ ସାମ୍ନାକୁ ଆସିଥିଲା। ଏବେ କରୋନା ଭାଇରସର ଉତ୍ପତ୍ତିକୁ ନେଇ ଚାଲିଥିବା ଆଲୋଚନାରେ ଏକ ନୂଆ ମୋଡ ଆସିଥିବା କୁହାଯାଉଛି। ସ୍ପେନର ବିଶେଷଜ୍ଞମାନେ କହିଛନ୍ତି ପ୍ରଥମେ ମାର୍ଚ୍ଚ ୧୨ , ୨୦୧୯ରେ ସେଠାକାର ମଇଳା ପାଣିରେ କରୋନା ଭାଇରସ ମିଳିଥିଲା। ବାର୍ସିଲୋନା ୟୁନିଭର୍ସିଟି ଦ୍ୱାରା ପ୍ରକାଶିତ ଏକ ଅଧ୍ୟୟନରେ ସାର୍ସ-କୋଭିଡ-୨ରେ ଏହା ଦାବି କରାଯାଇଛି। ଏଥିପାଇଁ ସ୍ପେନର ବିଭିନ୍ନ ସହରରୁ ଜାନୁୟାରି ୨୦୧୮ରୁ ଡିସେମ୍ବର ୨୦୧୯ ମଧ୍ୟରେ ଭିନ୍ନ ଭିନ୍ନ ତାରିଖରେ ମଇଳା ଜଳର ନମୁନା ସଂଗ୍ରହ କରାଯାଇଥିଲା। ଏଥିମଧ୍ୟରୁ ଗୋଟିଏ ନମୁନାକୁ ବାଦ୍ ଦେଲେ ବାକି ସମସ୍ତ ନମୁନାରେ କୋଭିଡ-୧୯ ଭୂତାଣୁ ଥିବା ଜଣାପଡିଥିଲା। ହେଲେ ଏସମ୍ପର୍କରେ ଜଣା ନ ଥିବାରୁ ଏହାକୁ ଫ୍ଲୁ ଭାବି ଚିକିତ୍ସା କରାଯାଉଥିବା ବିଶେଷଜ୍ଞମାନେ କହିଛନ୍ତି। ଫଳରେ ଏହା ଅଧିକ ସଂକ୍ରମଣ ହୋଇଗଲା।
