ବ୍ରହ୍ମପୁର ଅଫିସ, ୮।୫: ବ୍ରହ୍ମପୁରରେ ଦୈନିକ ଖବରକାଗଜ ‘ସମ୍ବାଦ’ରେ ଗଞ୍ଜାମ ଜିଲା ପ୍ରତିନିଧି ଭାବେ କାର୍ଯ୍ୟରତ ପ୍ରଦୀପ କିଶୋର ସାହୁ (୪୩)ଙ୍କ ଶୁକ୍ରବାର ପୂର୍ବାହ୍ନରେ ଦେହାନ୍ତ ହୋଇଛି। ସେ କରୋନା ଆକ୍ରାନ୍ତ ହୋଇ କନିଷିସ୍ଥିତ ଅଶ୍ୱିନୀ କୋଭିଡ୍ ହସ୍ପିଟାଲ୍ରେ ଚିକିତ୍ସାଧୀନ ଥିଲେ।
ପୁରୁଷୋତ୍ତମପୁର ବ୍ଲକ ବଳରାମପୁର ଗ୍ରାମର ମୂଳନିବାସୀ ପ୍ରଦୀପ ବ୍ରହ୍ମପୁର ଲୋଚାପଡ଼ା ଶକ୍ତିନଗରରେ ପରିବାର ସହିତ ରହୁଥିଲେ। ତାଙ୍କର ୨ ପୁଅ ଓ ସ୍ତ୍ରୀ ଅଛନ୍ତି। ସେ ‘ଧରିତ୍ରୀ’ ଖବରକାଗଜରୁ ସାମ୍ବାଦିକତା ଜୀବନ ଆରମ୍ଭ କରି କଟକ, ଭୁବନେଶ୍ୱର ସମେତ ବାରିପଦା, ଖୋର୍ଦ୍ଧା ଓ ପୁରୀରେ ଜିଲା ପ୍ରତିନିଧି ଭାବେ ଦକ୍ଷତାର ସହ ଦାୟିତ୍ୱ ସମ୍ପାଦନ କରିଥିଲେ। ୨୦୧୮ ଡିସେମ୍ବରରୁ ସେ ସମ୍ବାଦରେ ଯୋଗଦେଇଥିଲେ। କରୋନା ସଂକ୍ରମିତ ହୋଇ ପ୍ରାୟ ଦୁଇ ସପ୍ତାହରୁ ଊର୍ଦ୍ଧ୍ୱ କୋଭିଡ୍ ହସ୍ପିଟାଲ୍ରେ ଚିକିତ୍ସାଧୀନ ରହିିଥିଲେ। ମଧ୍ୟାହ୍ନରେ ଶୀତଳାପଲ୍ଲୀ ଶ୍ମଶାନରେ ତାଙ୍କ ଶେଷକୃତ୍ୟ ସମ୍ପନ୍ନ ହୋଇଛି। ତାଙ୍କ ବିୟୋଗରେ ବିଭିନ୍ନ ମହଲରେ ଶୋକ ପ୍ରକାଶ ପାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପୂର୍ବତନ ଏମ୍ପି ବୈଜୟନ୍ତ ପଣ୍ଡା ଟୁଇଟ୍ କରି ଶୋକ ବ୍ୟକ୍ତ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି।
