ଭାପୁର,୨୭ା୫ (ଡି.ଏନ.ଏ.): ନୟାଗଡ଼ ଜିଲା ଭାପୁର ବ୍ଲକ ଦୁର୍ନୀତିକୁ ନେଇ ସାରା ରାଜ୍ୟରେ ଚର୍ଚ୍ଚିତ। କେତେବେଳେ ଗୋଟିଏ ଶହେ ମିଟର ରାସ୍ତାକୁ ୨୧ ଥର ବିଲ କରି ତ କେତେବେଳେ ନାଳ ଭିତରେ ପୋଖରୀ ଖୋଳି। ପୁଣି କେତେବେଳେ କୂଅ, ପୋଖରୀ, ଆବାସ ଗୃହ ନିର୍ମାଣ ନ କରି ଫଲସ୍ ବିଲ୍ କରି ଅର୍ଥ ହଡ଼ପ କରିବାକୁ ବାରମ୍ବାର ଅଭିଯୋଗ ହୋଇଆସୁଥିଲା। ଏପରି କି ଭାପୁର ବ୍ଲକରୁ ୮୦କୋଟି ଦୁର୍ନୀତି ହୋଇଥିବା ଅଭିଯୋଗ ହୋଇଥିଲେ ମଧ୍ୟ ପ୍ରାୟ ୭୭ ଲକ୍ଷ ଟଙ୍କା ଅସୁଲ ହୋଇଥିବା ଜଣାପଡ଼ିଛି। ଭାପୁର ବ୍ଲକରେ ଦୀର୍ଘବର୍ଷ ଧରି ରାଜନୈତିକ ମହଲରେ ସରଗରମ ରହିଛି। କରିତକମା ଅଧିକାରୀ ଜନତାଙ୍କ ଟିକସ ଅର୍ଥରେ କିଛି କାମ ନ କରି ବାଟମାରଣା କରି ଅର୍ଥକୁ ଆତ୍ମସାତ କରିଥିବା ଅଭିଯୋଗ ହୋଇଥିଲା। ଦୀର୍ଘଦିନ ଛକାପଞ୍ଝା ପରେ ନିକଟରେ ଲୋକାୟୁକ୍ତ ଓ ରାଜ୍ୟ ସରକାରଙ୍କ ଚାପରେ ଜିଲା ପ୍ରଶାସନ ଏତଲା ଦେବାକୁ ନିର୍ଦ୍ଦେଶ ଦେଇଥିଲା। ଏହିକ୍ରମରେ ଭାପୁର ବ୍ଲକ ପ୍ରଶାସନ ପକ୍ଷରୁ ବିଡିଓ ରଣଜିତ କୁମାର ମଲ୍ଲିକ ଫତେଗଡ ଥାନାରେ ଏତଲା ଦେଇଥିଲେ। ଏହାକୁ ନେଇ ପୋଲିସ ପକ୍ଷରୁ ଗୁରୁତର ଭାବେ ନେବା ସହ ଏକ ନଂ. ୧୩୦/୨୩ରେ ମାମଲା ରୁଜୁ କରି ତଦନ୍ତରେ ତତ୍ପରତା ଦେଖାଇଛି। ଫତେଗଡ ପୋଲିସ ପକ୍ଷରୁ ଖୁବ୍ଶୀଘ୍ର ଦୁର୍ନୀତିଗ୍ରସ୍ତ ଅଧିକାରୀ, ଯନ୍ତ୍ରୀ ଗିରଫ ହେବା ନେଇ ବିଶ୍ୱସ୍ତ ସୂତ୍ରରୁ ସୂଚନା ମିଳୁଛି। ପୋଲିସ ପକ୍ଷରୁ ବିଭିନ୍ନ ରେକର୍ଡ ଫାଇଲ ଜବତ କରିବା ସହ ୨ଦିନ ଧରି ବ୍ଲକ ପରିସରରେ ଜୋରଦାର ତଦନ୍ତ ଚାଲୁ ରହିଛି। ସୂଚନା ଅନୁଯାୟୀ ଭାପୁର ବ୍ଲକ ଫତେଗଡ ପଞ୍ଚାୟତ ପରିସରରେ ମିଶନ ଶକ୍ତି ଗୃହ ନିର୍ମାଣ ନ କରି ୪ ଲକ୍ଷ ଟଙ୍କା ଆତ୍ମସାତ କରାଯାଇଥିଲା। ନୟାଗଡ଼ ଜିଲା ପ୍ରଶାସନର ତଦନ୍ତ ପରେ ୩ଜଣ ସରକାରୀ କର୍ମଚାରୀଙ୍କଠାରୁ ଟଙ୍କା ଅସୁଲ ପାଇଁ ନିର୍ଦ୍ଦେଶ ଦେଇଥିଲେ। ଏହି ଟଙ୍କା ଭାପୁର ବ୍ଲକର ତତ୍କାଳୀନ ବିଡିଓ ସତ୍ୟ ସୁନ୍ଦର ରାଉତ, ସହକାରୀ ଯନ୍ତ୍ରୀ ବୃନ୍ଦାବନ ବରିହା ଓ ତତ୍କାଳୀନ ଯନ୍ତ୍ରୀ ପ୍ରମୋଦ କୁମାର ସେଠୀଙ୍କଠାରୁ ଆଦାୟ ପାଇଁ ପିଡି ସୁବାସ ରାୟ ନିର୍ଦ୍ଦେଶ ଦେଇଥିଲେ। ଘଟଣାରୁ ପ୍ରକାଶ, ନୟାଗଡ ଜିଲା ଭାପୁର ବ୍ଲକରେ ମିଶନ ଶକ୍ତି ପକ୍ଷରୁ ଆସିଥିବା ଅର୍ଥରେ ଗୃହ ନିର୍ମାଣ ନ ହୋଇ ଅର୍ଥ ଆତ୍ମସାତ ହୋଇଥିବା ମିଶନ ଶକ୍ତି କମିଶନଙ୍କ ନିକଟରେ ପୂର୍ବରୁ ଅଭିଯୋଗ ହୋଇଥିଲା। ଅଭିଯୋଗ ପରେ ରାତିଅଧିଆ ଭିଏଲ୍ଡବ୍ଲ୍ୟୁ ଘରକୁ ରଙ୍ଗ ବୋଳି ମିଶନ ଶକ୍ତି ଗୃହ ଲେଖା ହୋଇଥିଲା। ପୁଣି ତାହାକୁ ପରବର୍ତ୍ତୀ ସମୟରେ ଲିଭା ହୋଇଥିବା ଅଭିଯୋଗ ହୋଇଥିଲା। ଭାପୁର ବ୍ଲକ ଫତେଗଡ ପଞ୍ଚାୟତର ମା’ ଭଗବତୀ ମହିଳା ସ୍ବୟଂ ସହାୟକ ଗୋଷ୍ଠୀ, ସାଇ ଦୁର୍ଗା ମହିଳା ସ୍ବୟଂ ସହାୟକ ଗୋଷ୍ଠୀ, ମା’ କାଳିକା ସ୍ବୟଂ ସହାୟକ ଗୋଷ୍ଠୀ ରାଜ୍ୟ ମିଶନ ଶକ୍ତି କମିଶନଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ଗୃହ ନିର୍ମାଣ ପାଇଁ ମିଶନ ଶକ୍ତି ବିଭାଗରୁ ଆସିଥିବା ୪ ଲକ୍ଷ ୫୦ହଜାର ଟଙ୍କା ଆସିଥିଲା। ଏଥିରେ ଗୃହ ନିର୍ମାଣ ନ ହୋଇ ଟଙ୍କା ହଡପ କରାଯାଇଛି। ଏହି ଅର୍ଥକୁ କର୍ମଚାରୀମାନେ ମିଥ୍ୟା ବିଲ୍ କରି ହରିଲୁଟ କରିଛନ୍ତି। ଏହି ଅଭିଯୋଗ ପାଇଲା ପରେ ରାଜ୍ୟ ମିଶନ ଶକ୍ତିର କମିଶନର ସୁଜାତା ଆର୍ କାର୍ତ୍ତିକେୟନଙ୍କ ନିକଟରେ ଅଭିଯୋଗ ଉପରେ ତଦନ୍ତ ଆରମ୍ଭ ହୋଇଥିଲା। ତଦନ୍ତ ପରେ ମିଶନ ଶକ୍ତି ଗୃହ ନିର୍ମାଣ ନ କରି ଫଲସ୍ ବିଲ୍ କରାଯାଇଥିବା ଜଣାପଡ଼ଥିଲା। ବ୍ଲକର ଭାପୁର ପଞ୍ଚାୟତ ଖରିରିଗାଡ଼ିଆ ଗଁାରେ ରାସ୍ତା ଓ ପୋଖରୀ ନ ଖୋଳି ୨୪ଲକ୍ଷ ଟଙ୍କା ରିକଭରି ହୋଇଥିଲା। ବିଜିପୁର ଠାକୁର ଘର ଫଲସ୍ ବିଲ୍ ଘଟଣାରେ ୨ଲକ୍ଷ, ଶାସନ ପଞ୍ଚାୟତରେ ନାଳ ଭିତରେ ପୋଖରୀ ଖୋଳାରେ ୪ଲକ୍ଷ, ବାଉଁଶବାଟୀ ଓ ପଦ୍ମାବତୀ ପଞ୍ଚାୟତରେ ଫଲସ୍ ବିଲ୍ ଘଟଣାରେ ଅର୍ଥ ଅସୁଲ ହୋଇଥିଲା। ହେଲେ ଆଜି ପର୍ଯ୍ୟନ୍ତ ଦୁର୍ନୀତିଗ୍ରସ୍ତ ଅଧିକାରୀମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନ ଥିବାରୁ ଏହାକୁ ନେଇ ବୃଦ୍ଧିଜୀବୀମାନେ ପ୍ରଶ୍ନ ଉଠାଇଛନ୍ତି।