ଖୋର୍ଦ୍ଧା ଅଫିସ,୧୨।୧୦: ଖୋର୍ଦ୍ଧା ତହସିଲ କାର୍ଯ୍ୟାଳୟ ଦୁର୍ନୀତିରେ ବୁଡିଛି। କାର୍ଯ୍ୟାଳୟରେ ଦଲାଲ ସକ୍ରିୟ ରହିଛନ୍ତି। କାର୍ଯ୍ୟାଳୟର କେତେଜଣ ଅସାଧୁ କର୍ମଚାରୀ ଏବଂ ଦଲାଲଙ୍କ ମଧୁଚନ୍ଦ୍ରିକାରେ ଚାଲିଛି କାର୍ଯ୍ୟ। ଫଳରେ ଜମିଜମା ପଟ୍ଟା, ଅନ୍ୟାନ୍ୟ କାମରେ ଆସୁଥିବା ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଦାବି ମୁତାବକ ଲାଞ୍ଚ ନ ଦେଲେ କାର୍ଯ୍ୟ ହୋଇପାରିବ ନାହିଁ ବୋଲି ଦଲାଲଙ୍କ ଜରିଆରେ କହୁଛନ୍ତି। ଏଭଳି ଅଭିଯୋଗ ଆଣିଛନ୍ତି ଖୋର୍ଦ୍ଧାର କେତେଜଣ ସଚେତନ ନାଗରିକ। ଖୋର୍ଦ୍ଧା ତହସିଲ କାର୍ଯ୍ୟାଳୟକୁ ତଦନ୍ତ ପରିସରଭୁକ୍ତ କରି ସାଧାରଣ ଲୋକଙ୍କୁ ନ୍ୟାୟ ଦାବିରେ ମଙ୍ଗଳବାର ଶତାଧିକ ଖୋର୍ଦ୍ଧା ବାସିନ୍ଦାଙ୍କ ଦସ୍ତଖତ ସମ୍ବଳିତ ଏକ ଦାବିପତ୍ର ଜିଲାପାଳଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ(ରାଜସ୍ବ) ସାଫଲ୍ୟ ମଣ୍ଡିତ ପ୍ରଧାନଙ୍କୁ ପ୍ରଦାନ କରିଛନ୍ତି।
ଦାବିପତ୍ରରେ ଉଲ୍ଲେଖ ରହିଛି ଯେ, ଦୀର୍ଘବର୍ଷ ହେବ ଏହି କାର୍ଯ୍ୟାଳୟରେ ଦୁର୍ନୀତିର ଚେର ବଢିବାରେ ଲାଗିଛି। ଦଲାଲଙ୍କ ଦ୍ୱାରା କାର୍ଯ୍ୟାଳୟ ଅପରେଟିଂ ହେଉଛି। ଏହି ତହସିଲ ଅନ୍ତର୍ଗତ ବିଭିନ୍ନ ଆର୍ଆଇ ସର୍କଲରେ କାର୍ଯ୍ୟରତ କେତେଜଣ କର୍ମଚାରୀ ଏକ ନିର୍ଦ୍ଦିଷ୍ଟ ଦୋକାନରେ ବିଳମ୍ବିତ ରାତି ପର୍ଯ୍ୟନ୍ତ ବେଆଇନ ଭାବେ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର କାର୍ଯ୍ୟ କରୁଛନ୍ତି। ଏନେଇ ଉପରିସ୍ଥ ଅଧିକାରୀଙ୍କ ନିକଟରେ ବାରମ୍ବାର ଅଭିଯୋଗ ସତ୍ତ୍ୱେ କୌଣସି ପଦକ୍ଷେପ ନିଆଯାଉନାହିଁ। ବେଆଇନ ଭାବେ ଚାଲାଣ ହେଉଥିବା ଲଘୁଖଣିଜ ଚଢ଼ାଉ ଆଳରେ ତହସିଲର କେତେଜଣ କର୍ମଚାରୀ ଅର୍ଥ ଆଦାୟ କରି ଛାଡି ଦେଉଥିବା ଅଭିଯୋଗ ହେଉଛି। ଏଥିସହିତ ତହସିଲଦାର ଈପ୍ସିତ ସାହୁଙ୍କ ନାମରେ ମଧ୍ୟ ଅଭିଯୋଗ ଆଣିଛନ୍ତି। ତହସିଲଦାର ଜନସାଧାରଣଙ୍କୁ ଦୁର୍ବ୍ୟବହାର କରିବା, ପ୍ରତିବାଦ କଲେ କୌଣସି କାମ କରାଯିବ ନାହିଁ ବୋଲି ଧମକ ଦେଇ ଫେରାଉ ଦେଉଛନ୍ତି। ଏଥିସହ ତହସିଲଦାର ପୌର ନିର୍ବାହୀ ଅଧିକାରୀ ଭାବେ ଅତିରିକ୍ତ ଦାୟିତ୍ୱରେ ମଧ୍ୟ ରହିଛନ୍ତି। ତେବେ ତହସିଲଦାରଙ୍କ ଅବହେଳାରୁ ରାସ୍ତାଘାଟ ଶୋଚନୀୟ ହୋଇପଡିଥିବା ବେଳେ ଡ୍ରେନେଜ୍ ବ୍ୟବସ୍ଥା ଭୁଶୁଡିଗଲାଣି। ସ୍ବୟଂ ସହାୟକ ଗୋଷ୍ଠୀଙ୍କ ଦ୍ୱାରା କାର୍ଯ୍ୟର ଅର୍ଥ ଲାଞ୍ଚ ନ ଦେଲେ ବିଲ୍ କରାଯାଉନାହିଁ। ବିଭିନ୍ନ ସମସ୍ୟା ନେଇ ଆସୁଥିବା ଲୋକଙ୍କ ଅଭିଯୋଗକୁ ତହସିଲଦାର କୌଣସି ଗୁରୁତ୍ୱ ଦେଉନାହାନ୍ତି ବୋଲି ଦାବିପତ୍ରରେ ଉଲ୍ଲେଖ ରହିଛି। ତାଙ୍କ ବିରୋଧରେ ଆସିଥିବା ସମସ୍ତ ଅଭିଯୋଗକୁ ତହସିଲଦାର ଈପସିତ ସାହୁ ଖଣ୍ଡନ କରିଛନ୍ତି। ଅନ୍ୟପକ୍ଷରେ ଜିଲାପାଳଙ୍କ ସହ ଆଲୋଚନା କରାଯାଇ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ଅତିରିକ୍ତ ଜିଲାପାଳ ପ୍ରଧାନ ପ୍ରତଶ୍ରୁତି ଦେଇଥିବା ଅଭିଯୋଗକାରୀ କହିଛନ୍ତି।