ଢେଙ୍କାନାଳ, ୨୮।୬(ରତନ ନାୟାର): ରାଜ୍ୟ ଆଜି ଓଡ଼ିଆଙ୍କ ଅସ୍ମିତା ଓ ଭାବାବେଗକୁ ବୁଝୁ ନ ଥିବା ଦୁର୍ନୀତିଖୋରଙ୍କ ହାବୁଡ଼ରେ ପଡ଼ିଛି। ଏଠି ବାବୁମାନେ ପ୍ରତିନିଧି। ବାବୁଙ୍କ ଚୌକି ପକାଇବା ପାଇଁ ଜନପ୍ରତିନିଧିଙ୍କ ମଧ୍ୟରେ ପ୍ରତିଯୋଗିତା ଚାଲିଛି। ଏଠାରେ ଦୁର୍ନୀତି ନୀତି ହୋଇଛି ବୋଲି ମଙ୍ଗଳବାର ଢେଙ୍କାନାଳ ଜିଲା ଗଁଦିଆରେ ଅନୁଷ୍ଠିତ ‘ଗରିବ କଲ୍ୟାଣ ସମାବେଶ’ରେ ଯୋଗଦେଇ ରାଜ୍ୟ ସରକାରଙ୍କୁ ଏଭଳି କଡ଼ା ଭାଷାରେ ଟାର୍ଗେଟ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ମୋଦି ସରକାରଙ୍କ ୯ ବର୍ଷ ପୂର୍ତ୍ତି ଅବସରରେ ଆୟୋଜିତ ଏହି କାର୍ଯ୍ୟକ୍ରମରେ ଧର୍ମେନ୍ଦ୍ର କହିଲେ, ସବ୍କା ସାଥ, ସବ୍କା ବିକାଶ, ସବକା ବିଶ୍ୱାସ, ସବ୍କା ପ୍ରୟାସ କେନ୍ଦ୍ର ସରକାରଙ୍କ ଶାସନର ମୂଳମନ୍ତ୍ର ହୋଇଛି। ଗରିବ କଲ୍ୟାଣ ଯୋଜନାରେ ଢେଙ୍କାନାଳ ଜିଲାର ୨ ଲକ୍ଷ ୭୦ ହଜାର ୮୭୬ ପରିବାରକୁ ୮ ହଜାର ୮୧୬ କୋଟି ଟଙ୍କା ପ୍ରଦାନ କରାଯାଇଛି। ପରିବାର ପିଛା ପ୍ରାୟ ୩ ଲକ୍ଷ ୨୫ ହଜାର ୪୬୭ ଟଙ୍କା ମିଳିଛି। ମୋଦି ସରକାରରେ ଓଡ଼ିଶାରେ ବିକାଶ ପାଇଁ ଅର୍ଥର ଅଭାବ ରହିବ ନାହଁ। ହେଲେ କେନ୍ଦ୍ରୀୟ ଅନୁଦାନକୁ ବିଭିନ୍ନ ବାଟରେ ହଡ଼ପ କରାଯାଉଛି। ଯୋଗ୍ୟ ହିତାଧିକାରୀଙ୍କୁ ଏହାର ସୁଫଳରୁ ବଞ୍ଚତ୍ତ କରାଯାଉଛି। ଓଡ଼ିଶାରେ ଶାସନ ନୁହେଁ ଭ୍ରଷ୍ଟାଚାର ଚାଲିଛି। କେନ୍ଦ୍ର ସରକାରଙ୍କ ଆବାସ ଯୋଜନାରେ ହାତଗୁଞ୍ଜା ଦାବି କରାଯାଉଛି। ଯିଏ ଦେଇପାରୁନାହିଁ, ତାହାର ନାମ ୱେଟିଂଲିଷ୍ଟରେ ରହୁଛି। କୋଇଲାରେ ଭରପୂର ଓଡ଼ିଶା ଦୀପତଳ ଭଳି ଅନ୍ଧାର। ନିକଟରେ ଦୁର୍ନୀତିରେ ଲିପ୍ତ ଜଣେ ସହକାରୀ ଉପଜିଲାପାଳଙ୍କ ଘରୁ ଟଙ୍କାର ପାହାଡ଼ ଠାବ ହୋଇଥିଲା। ଏଭଳି ଦୁର୍ନୀତିଗ୍ରସ୍ତ ଅଧିକାରୀ ତୃତୀୟ ମହଲା ଅଧିକାରୀଙ୍କ ଅଧିକ ପ୍ରିୟ। ଏ ବିଷୟରେ ପଚାରିଲେ ଶାସକ କଳର ଭଡ଼ାଟିଆ ଗୁଣ୍ଡା ଚଉଦ ପୁରୁଷ ବଖାଣୁଛନ୍ତି। ଧର୍ମେନ୍ଦ୍ର ଆହୁରି ମଧ୍ୟ କହିଲେ, ସେ ଯୁଆଡ଼େ ଯାଉଛନ୍ତି ରାଜ୍ୟ ସରକାର ଉକ୍ତ ସ୍ଥାନକୁ ତୁରନ୍ତ ଅନୁଦାନ ଦେଉଛନ୍ତି। ଯଦି ଏଭଳି ହେଉଛି, ତେବେ ସେ ସପ୍ତଶଯ୍ୟା, କୁଆଳୋ ଅଷ୍ଟଶମ୍ଭୁ, ସରାଙ୍ଗ ଅନନ୍ତଶୟନ, ଶହୀଦ ପୀଠ ନୀଳକଣ୍ଠପୁର ଯିବେ। ସେଠାକୁ ମଧ୍ୟ ରାଜ୍ୟ ସରକାର ଅନୁଦାନ ଦିଅନ୍ତୁ ବୋଲି ଧର୍ମେନ୍ଦ୍ର କହିଛନ୍ତି।
ଜିଲା ଭାଜପା ସଭାପତି ନରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମାବେଶରେ ବରିଷ୍ଠ ଭାଜପା ନେତା ରୁଦ୍ରନାରାୟଣ ପାଣି, ପ୍ରେମାନନ୍ଦ ଜେନା, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ରାମଚନ୍ଦ୍ର ପାତ୍ର, ଶତ୍ରୁଘ୍ନ ଜେନା, ରାଜ୍ୟ ସମ୍ପାଦକ ସୀମାଞ୍ଚଳ ଖଟେଇ, ଢେଙ୍କାନାଳ ପୌରାଧ୍ୟକ୍ଷା ଜୟନ୍ତୀ ପାତ୍ର, ବିଭୂତି ଭୂଷଣ ପ୍ରଧାନ ପ୍ରମୁଖ ବହୁ ନେତୃବୃନ୍ଦ ଓ କର୍ମକର୍ତ୍ତା ଯୋଗଦେଇଥିଲେ।