ବିଞ୍ଝରପୁର,୮ା୫(ଡି.ଏନ.ଏ.): ବିଞ୍ଝାରପୁର ବ୍ଲକ କାର୍ଯ୍ୟାଳୟରେ ବସୁନ୍ଧରା ଯୋଜନାରେ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ଏହି ଦୁର୍ନୀତିର ତଦନ୍ତକରି ଅଯୋଗ୍ୟ ହିତାଧିକାରୀଙ୍କ ଜମି ପଟ୍ଟା ବାତିଲ କରିବାସହ ସେମାନଙ୍କଠାରୁ ଦଖଲ ଉଚ୍ଛେଦ କରିବାକୁ ଉପଜିଲାପାଳ ବିଞ୍ଝାରପୁର ତହସିଲ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି। ହେଲେ ତହସିଲ ପ୍ରଶାସନ ଦଖଲ ଉଚ୍ଛେଦ କରି ପାରୁ ନ ଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି।
ସୂଚନା ମୁତାବକ, ବିଞ୍ଝାରପୁର ତହସିଲ ଅଧୀନ ଚନ୍ଦ୍ରମୁଁ ପଞ୍ଚାୟତ ବଡ଼ମଲ୍ଲିପୁର ରାଜସ୍ବ ଗ୍ରାମରେ ଥିବା ଅନାବାଦୀ ଜମି ଖାତା ନଂ.୪୩୪, ପ୍ଲଟ୍ ନଂ.୨୧୭ ରକବା ୨୬ ଡିସିମିଲ ମଧ୍ୟରୁ ତହସିଲ ପ୍ରଶାସନ ବସୁନ୍ଧରା ଯୋଜନାରେ ସେହି ଗ୍ରାମର କୈଳାସ ଯେନା, ବ୍ରହ୍ମାନନ୍ଦ ଯେନା, ସୁଦର୍ଶନ ଯେନା, ଭାନୁମତି ଯେନା, ଧରଣୀ ଯେନା ଓ ଶିଶିର ଯେନାଙ୍କୁ ୨୦୧୦ ଆର୍ଥିକ ବର୍ଷରେ ୧୮ ଡିସିମିଲ ଜମି ପ୍ରଦାନ କରିଥିଲା, ଯାହାକୁନେଇ ବଡ଼ମଲ୍ଲିପୁର ଗ୍ରାମରେ ଅସନ୍ତୋଷ ପ୍ରକାଶ ପାଇଥିଲା। ବସୁନ୍ଧରା ଯୋଜନାରେ ଜମି ପାଇଥିବା ପରିବାର ମଧ୍ୟରେ ସମସ୍ତେ ଅଯୋଗ୍ୟ ଏବଂ ସମସ୍ତ ପରିବାରର ଜମି ଥିବା ଦର୍ଶାଇ ପ୍ରସନ୍ନ କୁମାର ଯେନାଙ୍କ ସମେତ ଗ୍ରାମର ବହୁଲୋକ ଗତ ଡିସେମ୍ବର ୬ରେ ଯାଜପୁର ଜିଲାପାଳଙ୍କ ଜନଶୁଣାଣି ଶିବିରରେ ଅଭିଯୋଗ କରିଥିଲେ।
ଜିଲାପାଳ ଉକ୍ତ ଅଭିଯୋଗକୁ ଗ୍ରହଣ କରିବାସହ ପୃଥକ୍ ଭାବେ ଅଯୋଗ୍ୟ ହିତାଧିକାରୀଙ୍କ ନାମରେ ମାମଲା ରୁଜୁକରି ଘଟଣାର ସମାଧାନ କରିବାକୁ ଉପଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ଉପଜିଲାପାଳ ନିଜଆଡୁ ନଂ.୩୦/୨୨, ୩୧/୨୨, ୩୨/୨୨, ୩୩/୨୨, ୩୪/୨୨ ଓ ୩୫/୨୨ରେ ମାମଲା ରୁଜୁ କରିଥିଲେ। ପରେ ଗତ ୨୪ା୧ା୨୦୨୩ରେ ମାମଲାର ଶୁଣାଣିକରି ଅତିରିକ୍ତ ଜିଲାପାଳ ଉପରୋକ୍ତ ୬ ହିତାଧିକାରୀଙ୍କ ମଧ୍ୟରୁ ୫ଜଣ ହିତାଧିକାରୀଙ୍କ ପଟ୍ଟା ବାତିଲ କରିବାସହ ଦଖଲ ଉଚ୍ଛେଦ କରିବାକୁ ବିଞ୍ଝାରପୁର ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲେ। ଇତିମଧ୍ୟରେ ୩ ମାସ ବିତିଥିଲେ ମଧ୍ୟ ତହସିଲ ପ୍ରଶାସନ ଚୁପହୋଇ ବସିଛି, ଯାହାକୁନେଇ ଗ୍ରାମରେ ଚାପା ଉତ୍ତେଜନା ଲାଗିରହିଛି। ଏ ସମ୍ପର୍କରେ ତହସିଲଦାର କୈଳାଶ ଚନ୍ଦ୍ର ମହାଳିକଙ୍କୁ ପଚାରିବାରୁ ସେ କହିଛନ୍ତି, ଉପଜିଲାପାଳଙ୍କ ନିର୍ଦ୍ଦେଶ ଅନୁଯାୟୀ ଦିଆଯାଇଥିବା ଜମିକୁ ସରକାରଙ୍କ ଖାତାକୁ ନେଇଆସିଛୁ। ଉପରୋକ୍ତ ହିତାଧିକାରୀମାନେ ଉପଜିଲାପାଳଙ୍କ ରାୟ ବିରୋଧରେ ସିଭିଲ କୋର୍ଟର ଦ୍ୱାରସ୍ଥ ହୋଇଥିବାରୁ ଦଖଲରୁ ଉଚ୍ଛେଦ କରାଯାଇନାହିଁ।