କେନ୍ଦୁଝର,୧୨ା୧(ଦୀପକ ମିଶ୍ର): କାରଖାନା, ଶିଳ୍ପ, ଖଣି, ଯାନବାହନ ଓ ବସତି ସ୍ଥାପନ ପାଇଁ ପରିବେଶ ପ୍ରଦୂଷିତ ହେବା ସହିତ ଜଙ୍ଗଲ କାଟି ସଫା କରାଯାଉଛି। ଜଙ୍ଗଲ ସଫା ହେବା ଫଳରେ ବନ୍ୟପ୍ରାଣୀ ଗାଁ ମୁହାଁ ହେଉଛନ୍ତି। ବିରଳ ବନ୍ୟପ୍ରାଣୀଙ୍କ ବଂଶ ଲୋପ ପାଇବାକୁ ବସିଛି। ଏଣୁ କେନ୍ଦ୍ର ଓ ରାଜ୍ୟ ସରକାର ଜଙ୍ଗଲ ସୃଷ୍ଟି ପାଇଁ ବିଭିନ୍ନ ଯୋଜନା ପ୍ରଣୟନ କରି ଅନେକ କୋଟି ଟଙ୍କା ଖର୍ଚ୍ଚ କରୁଛନ୍ତି। ମାତ୍ର ଆନ୍ତରିକତା ଅଭାବରୁ ଯୋଜନା ଗୁଡ଼ିକ ଫେଲ ମାରୁଥିବା ଦେଖିବାକୁ ମିଳୁଛି। କେନ୍ଦୁଝର ଜିଲା ସଦର ବ୍ଲକ୍ ଅନ୍ତର୍ଗତ ସେଣ୍ଡକାପ ଗ୍ରାମରେ ହୋଇଥିବା କଲମୀ କାଜୁ ଚୋରାରୋପଣ ଏହାର ଏକ ଉଦାହରଣ।
ସୂଚନା ଅନୁଯାୟୀ, ଗ୍ରାମରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ଉଦ୍ୟାନ କୃଷି ବିଭାଗ ଅନୁଦାନ (ଉଦ୍ୟାନ ଉପନିର୍ଦ୍ଦେଶକ କେନ୍ଦୁଝରଙ୍କ ଆର୍ଥିକ ବର୍ଷ ୨୦୨୧-୨୨ ହିତାଧିକାରୀଙ୍କ ସଂଖ୍ୟା ୧୨, କ୍ଷେତ୍ରଫଳ ୮ ହେକ୍ଟର ସ୍ଥାନ)ରେ କଲମୀ କାଜୁ ଚାରା ଲଗା କରାଯାଇଥିଲା। ଏ ନେଇ ଅଟକଳ ପରିମାଣ ୧୯ ଲକ୍ଷ ବ୍ୟୟବରାଦ ହୋଇଥିଲା। ସ୍ଥାନୀୟ ଅଞ୍ଚଳର କିଛି ଶ୍ରମିକଙ୍କୁ ଚାରାରୋପଣ ପାଇଁ ନିୟୋଜିତ କରାଯାଇଥିଲା। ମାତ୍ର ଉକ୍ତ ସ୍ଥାନରେ କାଜୁ ଚାରାରୋପଣ ପରେ ସୁରକ୍ଷା ପାଇଁ ବାଡ ଦିଆଯାଇ ନ ଥିଲା। ଏଥିସହ ରକ୍ଷଣାବେକ୍ଷଣ ଅଭାବରୁ ଚାରାରୋପଣର ୫ ଦିନ ମଧ୍ୟରେ ନଷ୍ଟ ହୋଇଯାଇଥିଲା। ଏଥିସହ ଗଛ ନ ଲାଗି ଟଙ୍କା ଆତ୍ମସାତ କରାଯାଇଥିବା ସ୍ଥାନୀୟ ବାସିନ୍ଦା ଜୟକୃଷ୍ଣ ନାଏକ, ସରୋଜ ସାହୁ, ସସ୍ମିତା ସାହୁ, ଉଜ୍ଜୟିନୀ ମହାନ୍ତ, କୀର୍ତ୍ତିଚନ୍ଦ୍ର ବାରିକ, ସସ୍ମିତା ମହାନ୍ତ, ପ୍ରୀତି ପ୍ରଣତି ମହାକୁଡ଼, ହରିହର ନାଏକ, ବିବେକ ମହାନ୍ତ ଅଭିଯୋଗ କରିଛନ୍ତି। ଏହାର ଭିଜିଲାନ୍ସ ତଦନ୍ତ ପରିସରଭୁକ୍ତ କରାଗଲେ ସତ୍ୟାସତ୍ୟ ଜଣାପଡ଼ିବ ବୋଲି କହିଛନ୍ତି। ଅଭିଯୋଗ ଉପରେ କେନ୍ଦୁଝର ଉଦ୍ୟାନ ବିଭାଗ ଉପ ନିର୍ଦ୍ଦେଶକ ସୌମେନ୍ଦ୍ର ନାରାୟଣ ପାଣିଗ୍ରାହୀ କହିଛନ୍ତି, ତାଙ୍କ ନିକଟରେ ଅଭିଯୋଗ ପହଞ୍ଚତ୍ଛି, ସେ ଏହାର ତଦନ୍ତ ପାଇଁ ଦୁଇ ଜଣ ଅଧିକାରୀଙ୍କୁ ଦାୟିତ୍ୱ ଦେଇଛନ୍ତି। ରିପୋର୍ଟ ଆସିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେ ମଧ୍ୟ ଏହାର ତଦନ୍ତ କରିବେ ବୋଲି କହିଥିଲେ।