ନୟାଗଡ଼,୪।୧୦(ଲୋକନାଥ ମିଶ୍ର)ମୃତ୍ତିକା ସଂରକ୍ଷଣ ବିଭାଗ ପକ୍ଷରୁ ନୟାଗଡ଼ ବ୍ଲକ ଶୁକଳଗାଡ଼ିଆ ମଞ୍ଚେଶ୍ୱର ପୋଖରୀ କାମରେ ୧୮ଲକ୍ଷରୁ ଊର୍ଦ୍ଧ୍ୱ ଟଙ୍କା ଆତ୍ମସାତ୍ ହୋଇଥିବା ଅଭିଯୋଗ ହୋଇଛି ।ଉକ୍ତ କାମ ଜୟ ଜଗନ୍ନାଥ ଜଳ ବିଭାଜିକା ଚମ୍ପତିପୁର କମିଟି ନାଁରେ କରାଯାଇଥିବା ଦର୍ଶାଯାଇଛି । ୨୫ ଲକ୍ଷ ଟଙ୍କାର କାମକୁ ୨୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ବିଲ୍ ହୋଇଛି । ଶିଆଳିଖାଲ ପରେ ସୁକଳଗାଡିଆ ମଞ୍ଚେଶ୍ୱର ପୋଖରୀ ଦୁର୍ନୀତି ମୃତ୍ତିକା ସଂରକ୍ଷଣ ବିଭାଗକୁ ହରଡଘଣାରେ ପକାଇଛି । ନୟାଗଡ଼ ପରି ପାହାଡିଆ ଜିଲାରେ ଜଳ ବିଭାଜିକା ନାଁରେ ଦୁର୍ନୀତି ଅଭିଯୋଗ ଆସିବା ପରେ ଏହାର ଭିଜିଲାନ୍ସ ତଦନ୍ତ ପାଇଁ ଚାଷୀମାନଙ୍କ ପକ୍ଷରୁ ଦାବି କରାଯାଇଛି ।
ସୂଚନା ଅନୁଯାୟୀ, ବଳରାମ ପାହାଡ଼ର ନିଷ୍କାସିତ ପାଣିରେ ସୃଷ୍ଟି ନୟାଗଡ଼ ବ୍ଳକ ଲକ୍ଷ୍ମୀପ୍ରସାଦ ପଞ୍ଚାୟତ ଶିଆଳି ଖୋଲ ବନ୍ଧରେ ଆଡିବନ୍ଧ କରି ୨୪ ଲକ୍ଷ ଟଙ୍କା ସରକାରୀ ଅନୁଦାନ ହଡପ ହୋଇଥିବା ଅଭିଯୋଗ ହୋଇଥିଲା । ଅଭିଯୋଗ ପାଇ ନୟାଗଡ଼ ଜିଲା ପରିଷଦ ଚେୟାରମ୍ୟାନ୍ ଦେବାଶିଷ ପଟ୍ଟନାୟକଙ୍କ ନେତୃତ୍ୱରେ ୧୨ ଜଣିଆ ଟିମ୍ ଗତ ସେପ୍ଟେମ୍ବର ୨୯ରେ ଜଳବିଭାଜିକା ପରିଦର୍ଶନରେ ଯାଇ ଅନିୟମିତତା ଗୁମର ଖୋଲିଥିଲେ। ଆଡିବନ୍ଧର ମେଜେରେମେଣ୍ଟ ବୁକ୍ ଜିଲା ପରିଷଦ ସଭାପତି ଓ ସଭ୍ୟଙ୍କୁ ମୃତ୍ତିିକା ସଂରକ୍ଷଣ ବିଭାଗର ଉପନିର୍ଦ୍ଦେଶକଙ୍କ ସମେତ କର୍ମଚାରୀ ଦେଖେଇ ନ ପାରି ଅପଦସ୍ତ ହୋଇଥିଲେ । ଜିଲା ପରିଷଦ ପକ୍ଷରୁ ଏହାର ମେଜରମେଣ୍ଟ କରାଯିବା ପରେ ଦୁର୍ନୀତି ହୋଇଥିବାର ପ୍ରମାଣ ମିଳିଥିଲା । ପ୍ରକଳ୍ପ ପାଇଁ ୨୪ ଲକ୍ଷ ୯୪ ହଜାର ଟଙ୍କା ମଞ୍ଜୁର ହୋଇଥିଲା । ତେବେ ୨୪ ଲକ୍ଷ ୬୮ ହଜାର ୪୨୬ ଟଙ୍କା ବିଲ୍ ହୋଇଥିଲା । ଶୁକଳଗାଡିଆ ପୋଖରୀ ଦୁର୍ନୀତି ନେଇ ଜଣେ ଚାଷୀ କହିଛନ୍ତି, ଆମ ଗଁାରେ ପୋଖରୀ କାମ କରିବା ପାଇଁ ଯେଉଁ କମିଟି ହୋଇଛି ସେ କମିଟି କାମ କରିବାକୁ ମନା କଲା । ୨୫ ଲକ୍ଷ ଟଙ୍କାର କାମ କରିବାକୁ ନିଜର ଅସମର୍ଥ ପ୍ରକାଶ କଲା କମିଟି । ତେବେ କମିଟିର ଜଣେ ସଭ୍ୟ ମୃତ୍ତିକା ସଂରକ୍ଷଣ ବିଭାଗର ଜଣେ କର୍ମଚାରୀ ଓ ମୃତ୍ତିକା ସଂରକ୍ଷଣ ବିଭାଗର ପ୍ରକଳ୍ପ ନିର୍ଦ୍ଦେଶକଙ୍କୁ ଧରାଧରି କରି ୨୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ଦୁର୍ନୀତି କରିଛନ୍ତି । ପୋଖରୀରେ ଜେସିବି ଲଗାଇ ୧ରୁ ୩ ଲକ୍ଷ ଟଙ୍କାର କାମ କରି ଅଧାପନ୍ତରିଆ ଭାବେ ଛାଡି ଦେଇଛନ୍ତି । ପୋଖରୀ ଆଗକୁ ଯେପରି ଥିଲା ଏବେ ସେପରି ଅଛି । ଟଙ୍କା ଆତ୍ମସାତ୍ ପାଇଁ ମୃତ୍ତିକା ସଂରକ୍ଷଣ ବିଭାଗର କର୍ମଚାରୀ କେତେଜଣ ଚାଷୀ ନେତାଙ୍କୁ ହାତ କରି ଦୁର୍ନୀତି କରିଛନ୍ତି । ଶିଆଳିଖାଲ ଦୁର୍ନୀତି ଧରାପଡିବା ପରେ ଆମେ ଆମ ଅଞ୍ଚଳର ଦୂର୍ନୀତି ପଦାକୁ ବାହାରୁ ବୋଲି ଦାବି କରୁଛୁ ।
ଯେଉଁ ପ୍ରକାର ଦୁର୍ନୀତି ମୃତ୍ତିକା ସଂରକ୍ଷଣ ବିଭାଗରେ ଚାଲିଛି ଅଭିଯୋଗକାରୀ ନାଁ ଜାଣିଲେ ଟଙ୍କା ଦେଇ, ମାରପିଟ୍ କରି ମୁହଁ ବନ୍ଦ କରୁଛନ୍ତି । ଏହାର ଭିଜିଲାନ୍ସ ତଦନ୍ତ କରାଗଲେ ପ୍ରକୃତ ଘଟଣା ଲୋକ ଲୋଚନକୁ ଆସିବ । ନୟାଗଡ଼ର ଚାଷୀ ବଳରାମ ନାୟକ କୁହନ୍ତି, ଶୁକଳଗାଡିଆ ମଞ୍ଚେଶ୍ୱର ପୋଖରୀ କାମରେ ଜଣେ ଚାଷୀ ନେତା ଓ ମୃତ୍ତିକା ସଂରକ୍ଷଣ ବିଭାଗର କର୍ମଚାରୀ ଓ ଅଧିକାରୀ ମିଶି ସରକାରୀ ଅନୁଦାନକୁ ଆମତ୍ସାତ୍ କରିଛନ୍ତି । ଘଟଣା ଆଗକୁ ନ ବଢ଼ିବା ପାଇଁ ସବୁ ପ୍ରକାରର ଉଦ୍ୟମ କରିଛନ୍ତି । ଗଣମାଧ୍ୟମରେ ଖବର ପ୍ରକାଶନ ନ କରିବା ପାଇଁ ଚାଷୀମାନଙ୍କୁ ଚାପ ପ୍ରୟୋଗ କରି ଧମକଚମକ ଦେଉଛନ୍ତି ।
ଏପରି କି ସବୁ କିଛି ଠିକ ଅଛି, କାହାକୁ କିଛି କୁହନି ବୋଲି କହୁଛନ୍ତି । ଏହି ଦୂର୍ନୀତି ଘଟଣାରେ ଜଡ଼ିତ ଥିବା ମୃତ୍ତିକା ସଂରକ୍ଷଣ ବିଭାଗର ଜଣେ ପ୍ରକଳ୍ପ ନିର୍ଦ୍ଦେଶକ ଅବସର ନେଇ ସାରିଲେଣି । ତାଙ୍କ ସମୟରେ ଅନେକ ଦୁର୍ନୀତି ରହିଛି ଯାହାକି ତଦନ୍ତ କଲେ ପଦାକୁ ଆସିବ । ଜିଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ କୁହନ୍ତି, ଶିଆଳିଖୋଲ ଜଳବିଭାଜିକାକୁ ଜିଲା ପରିଷଦ କମିଟି ଅନୁଧ୍ୟାନ କରି ଫେରିଛି ।
ଶୁକଳଗାଡ଼ିଆ ଜଳବିଭାଜିକା ପ୍ରକଳ୍ପର ହେରଫେରି ଜଣାପଡିବା ପରେ ଆମ କମିଟି ଅନୁଧ୍ୟାନ କରି ପଦକ୍ଷେପ ନେବ ବୋଲି କହିଛନ୍ତି । ମୃତ୍ତିକା ସଂରକ୍ଷଣ ବିଭାଗର ପ୍ରକଳ୍ପ ନିର୍ଦ୍ଦେଶକ ଉପେନ୍ଦ୍ର ପରିଡ଼ା କୁହନ୍ତି, ମୁଁ ନୂଆ କରି କାର୍ଯ୍ୟରେ ଯୋଗ ଦେଇଛି । ଅଭିଯୋଗ ଆସୁଥିବା ଶୁକଳଗାଡିଆ ଜଳବିଭାଜିକାର ତଦନ୍ତ କରାଯିବା ପରେ ଯାହା କିଛି କୁହାଯାଇପାରିବ।