ମୋରଡ଼ା,୫ା୭(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ନିର୍ବାଚନ ମଣ୍ଡଳୀରେ ଦୁର୍ନୀତି ପିଛା ଛାଡୁନି। ନିର୍ବାଚନମଣ୍ଡଳୀର ଶୁଳିଆପଦା ବ୍ଲକରେ ମହାଦୁର୍ନୀତି ହୋଇଥିବାର ଅଭିଯୋଗ ବ୍ଲକ କଂଗ୍ରେସ କରିଥିବା ବେଳେ ଆସନ୍ତା ୧୩ ତାରିଖରେ ବ୍ଲକ କାର୍ଯ୍ୟାଳୟ ଆଗରେ ଧାରଣା ଦେବା ସହିତ ଆନ୍ଦୋଳନ ହେବ ବୋଲି ଚେତାବନୀ ଦେଇଛି ବ୍ଲକ କଂଗ୍ରେସ କମିଟି।
ପ୍ରକାଶ ଥାଉକି, ମୋରଡା ବ୍ଲକରେ ମୃତ ହିତାଧିକାରୀଙ୍କ ନାମରେ ହୋଇଥିବା ଭତ୍ତା ଟଙ୍କାର ଉଠାଣ,ଏମ୍ଜିଏନ୍ଆର୍ଜିଏ ଯୋଜନାରେ ହୋଇଥିବା ଅନୁମୋଦିତ ବ୍ୟୟ ଅଟକଳ ମୂଲ୍ୟଠାରୁ କାର୍ଯ୍ୟରେ ଅଧିକ ଟଙ୍କା ଖର୍ଚ୍ଚ ଦର୍ଶାଇବା,ଉନ୍ନୟନମୂଳକ କାର୍ଯ୍ୟ ନ କରି ମିଥ୍ୟା ବିଲ ପୈଠ, ନିମ୍ନମାନର କାର୍ଯ୍ୟ ଇତ୍ୟାଦି ନେଇ ଚଳିତ ବର୍ଷ ଗତ ଜାନୁୟାରୀ ୩ ତାରିଖ ଦିନ ମୋରଡା ବିଡିଓଙ୍କୁ ଲିଖିତ ଅଭିଯୋଗ କରିଥିଲା ବ୍ଲକ କଂଗ୍ରେସ। କିନ୍ତୁ ୫ ମାସରୁ ଅଧିକ ସମୟ ବିତିଯାଇଥିଲେ ମଧ୍ୟ ପ୍ରଶାସନ ଆଜିଯାଏ କୌଣସି ପଦକ୍ଷେପ ଗ୍ରହଣ କରିନାହିଁ। ତେଣୁ ରାଜ୍ୟ କଂଗ୍ରେସ ସମ୍ପାଦକ ପ୍ରଭାସକର ମହାପାତ୍ରଙ୍କ ନେତୃତ୍ୱରେ ବ୍ଲକର ବରିଷ୍ଠ କଂଗ୍ରେସ କର୍ମୀମାନେ ଉପସ୍ଥିତ ରହି ଆଜି ମୋରଡା ବିଡିଓ ଜୟକୃଷ୍ଣ ପାତ୍ରଙ୍କୁ ଲିଖିତ ଭାବେ ଜଣାଇଛନ୍ତି। ଆଗାମୀ ପନ୍ଦର ଦିନ ଭିତରେ ଉକ୍ତ ସବୁ ଘଟଣାର ଉପଯୁକ୍ତ ତଦନ୍ତ କରି ରିପୋର୍ଟ ପ୍ରଦାନ କରିବା ସହିତ ଉକ୍ତ ରିପୋର୍ଟକୁ ସାର୍ବଜନୀନ ନ କରାଗଲେ ବ୍ଲକ କଂଗ୍ରେସ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବ। ଉକ୍ତ କାର୍ଯ୍ୟକ୍ରମରେ ବ୍ଲକର ବରିଷ୍ଠ କଂଗ୍ରେସ କର୍ମୀ ଜୟନ୍ତ ବେହେରା, ମୋହନ ଦାସ,ରାଜେଶ ପଢିହାରୀ, ତାପସ ରଞ୍ଜନ ରାଉତ, ଶୁଭ କୁମାର ମହାନ୍ତ, ଶଶଧର ବେହେରା,ଅସିତ କୁମାର ବେହେରା, କାନ୍ଦ୍ରା ସୋରେନ, ସନାତନ ଦେ ପ୍ରମୁଖ ଉପସ୍ଥିତ ଥିଲେ।