ଭୁବନେଶ୍ୱର,୩।୬(ବ୍ୟୁରୋ): ବେଙ୍ଗାଲୁରୁରେ ରହୁଥିବା ଏକ ପ୍ରେମୀଯୁଗଳ ଗୁରୁବାର ବିମାନ ଯୋଗେ ଭୁବନେଶ୍ୱର ଆସୁଥିଲେ। ତେବେ ଯୁବତୀଙ୍କ ପରିବାର ଲୋକେ ସେମାନଙ୍କ ବିବାହ ପାଇଁ ରାଜି ନ ଥିବାରୁ ଅପ୍ରୀତିକର ପରିସ୍ଥିତି ସୃଷ୍ଟି ଆଶଙ୍କାରେ ଦୁହେଁ କମିଶନରେଟ ପୋଲିସକୁ ଟୁଇଟ କରି ସହାୟତା ଲୋଡ଼ିବା ସହ ଏ ନେଇ ଏୟାରପୋର୍ଟ ଥାନାକୁ ଜଣାଇଥିଲେ। ପ୍ରେମୀଯୁଗଳ ଅପରାହ୍ନରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ ପୋଲିସ ଉଭୟଙ୍କୁ ଉଦ୍ଧାର କରିଛି। ଦୁହିଁଙ୍କୁ ଥାନାକୁ ନିଆଯିବା ପରେ ସେଠାକୁ ଉଭୟ ପକ୍ଷର ପରିବାରବର୍ଗ ଆସିଥିଲେ। ଏନେଇ ଏୟାରପୋର୍ଟ ଥାନାଧିକାରୀ କହିଛନ୍ତି, ପ୍ରେମୀଯୁଗଳ ଦୁହେଁ ସାବାଳକ। ସୁରକ୍ଷା ପାଇଁ ସେମାନେ ପୋଲିସର ସହାୟତା ଲୋଡ଼ିବାରୁ ଉଭୟଙ୍କୁ ଥାନାକୁ ଅଣାଯାଇଥିଲା। ଥାନାରେ କଥାବାର୍ତ୍ତା ପରେ ଯୁବତୀଙ୍କ ପରିବାର ଲୋକେ ଫେରିଯାଇଛନ୍ତି। ଏଥିସହ ପ୍ରେମୀଯୁଗଳ ସୁରକ୍ଷିତ ଭାବେ ଯାଇଥିବା ସେ କହିଛନ୍ତି। ଅନ୍ୟପକ୍ଷରେ ଷଡ଼ଯନ୍ତ୍ର କରାଯାଇ ତାଙ୍କ ଝିଅକୁ ଫସାଇ ଦିଆଯିବା ସହ ଭବିଷ୍ୟତ ନଷ୍ଟ କରିବାକୁ ଚେଷ୍ଟା କରାଯାଇଛି ବୋଲି ସମ୍ପୃକ୍ତା ଯୁବତୀଙ୍କ ବାପା ଗଣମାଧ୍ୟମ ଆଗରେ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ଭୁବନେଶ୍ୱରର ଖଣ୍ଡଗିରି ଥାନା ଅଞ୍ଚଳରେ ଏହି ପ୍ରେମୀ ଯୁଗଳଙ୍କ ଘର। ୨୪ ବର୍ଷୀୟା ଯୁବତୀ ଜଣକ ବେଙ୍ଗାଲୁରୁରୁ ଏମ୍ବିବିଏସ୍ ପାସ୍ କରିବା ପରେ ସେଠାରେ ଡାକ୍ତର ଅଛନ୍ତି। ତାଙ୍କ ପ୍ରେମିକ ଗଗନଦୀପ ସିଂ ମଧ୍ୟ ସେଠାରେ ଏକ ଘରୋଇ କମ୍ପାନୀରେ ଚାକିରି କରୁଛନ୍ତି। ଉଭୟଙ୍କ ମଧ୍ୟରେ ୬ବର୍ଷ ତଳୁ ପ୍ରେମ ସମ୍ପର୍କ ଗଢ଼ିଉଠିଥିଲା। ହେଲେ ଯୁବତୀଙ୍କ ପରିବାରଲୋକେ ସେମାନଙ୍କ ସମ୍ପର୍କକୁ ବିରୋଧ କରିଆସୁଛନ୍ତି। ଯୁବତୀ ଜଣକ ୧୫ଦିନ ତଳେ ଘରକୁ ଆସିଥିଲେ। ତାଙ୍କ ବିବାହ ପାଇଁ ପାତ୍ର ଦେଖିବାକୁ ବାପାଙ୍କୁ କହିଥିଲେ। କିନ୍ତୁ ବେଙ୍ଗାଲୁରୁ ଯିବା ପରେ ବୁଧବାର ତାଙ୍କ ମା’ଙ୍କୁ ଫୋନ କରି ଗଗନଦୀପଙ୍କୁ ସେ ବିବାହ କରିବେ, ଆଉ ଘରକୁ ଫେରିବେନି ବୋଲି କହିଥିଲେ। ଏନେଇ ଯୁବତୀଙ୍କ ବାପା ଜାଣିବା ପରେ ରାଗିଯାଇଥିଲେ। ସେ ତୁରନ୍ତ ବେଙ୍ଗାଲୁରୁ ଯିବା ପାଇଁ ଫ୍ଲାଇଟ ବୁକ୍ କରିଥିଲେ। ଏହା ଜାଣିବା ପରେ ଯୁବତୀ ଜଣକ ଗୁରୁବାର ଭୁବନେଶ୍ୱର ଫେରିବେ ବୋଲି ରାଜି ହୋଇଥିଲେ। ଏପଟେ ଉଭୟ ପକ୍ଷଙ୍କ ପରିବାର ଲୋକେ ସେମାନଙ୍କୁ ଏୟାରପୋର୍ଟ ନିକଟରେ ଅପେକ୍ଷା କରିଥିଲେ। ଏ ନେଇ ସେଠାରେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବାର ଆଶଙ୍କା ଥିବାରୁ ପ୍ରେମୀଯୁଗଳ ପୋଲିସର ସହାୟତା ଲୋଡ଼ିଥିଲେ।
