ଆନନ୍ଦପୁର,୨୫।୩(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ପୌର ପରିଷଦ ବିବାଦ ଓ ପୌରାଞ୍ଚଳର ବିକାଶଧାରାକୁ ସ୍ବାଭାବିକ କରିବା ଲକ୍ଷ୍ୟରେ ଶୁକ୍ରବାର କାଉନ୍ସିଲରମାନେ ରାଜ୍ୟ ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ଭେଟି ଆଲୋଚନା କରିଛନ୍ତି। ଏଥି ସହିତ ଭୁବନେଶ୍ୱରଠାରେ ଘସିପୁରା ବିଧାୟକ ବଦ୍ରି ନାରାୟଣ ପାତ୍ର ଓ ଆନନ୍ଦପୁର ବିଧାୟକ ଭାଗିରଥି ସେଠୀଙ୍କୁ ସୌଜନ୍ୟ ମୂଳକ ସାକ୍ଷାତ କରି ଆଲୋଚନା ମଧ୍ୟ କରିଛନ୍ତି।
ପୌର ନିର୍ବାଚନ ପରଠାରୁ ବିଭିନ୍ନ ସମୟରେ ଅଧ୍ୟକ୍ଷା ଏବଂ କାଉନ୍ସିଲରମାନଙ୍କ ମଧ୍ୟରେ ସମନ୍ବୟର ଅଭାବ ଓ ବିବାଦ କାରଣରୁ ବିକାଶ ମୂଳକ କାର୍ଯ୍ୟ ତ୍ୱରାନ୍ବିତ ହେବାରେ ବାଧା ସୃଷ୍ଟି ହୋଇଛି। ପୌରନିର୍ବାଚନକୁ ବର୍ଷେ ଅତିକ୍ରାନ୍ତ କରିଯାଇଥିଲେ ବି ବିଭିନ୍ନ ସମୟରେ ଉନ୍ନୟନମୂଳକ କାର୍ଯ୍ୟକୁ ନେଇ ଲାଗି ରହିଥିବା ସମସ୍ୟା ଉଦ୍ବେଗର କାରଣ ପାଲଟିଛି। ଅନେକ ସମୟରେ ରିଜୋଲ୍ୟୁସନ୍ରେ ପାରିତ ହେଉଥିବା ଉନ୍ନୟନମୂଳକ କାର୍ଯ୍ୟ ତ୍ୱରାନ୍ବିତ ହେବାରେ ବାଧା ସୃଷ୍ଟି ହେଉଥିବା, ଏପରିକି ଟେଣ୍ଡର ହୋଇପାରୁ ନ ଥିବାରୁ ପରିମଳ ବ୍ୟବସ୍ଥା ବିପର୍ଯ୍ୟସ୍ତ ଅବସ୍ଥାରେ ରହିଥିବା, ପୌରକାର୍ଯ୍ୟାଳୟରୁ ଫାଇଲ୍ ଚୋରି ଭଳି ଘଟଣା ଉଦ୍ବେଗଜନକ ସ୍ଥିତିରେ ପହଞ୍ଚତ୍ଛି। ଆନନ୍ଦପୁର ପୌରାଞ୍ଚଳର ଉନ୍ନୟନ କାର୍ଯ୍ୟରେ ରହିଥିବା ସମସ୍ୟାକୁ ନେଇ ପୌରଉପାଧ୍ୟକ୍ଷ ଦୁର୍ଗାଚରଣ ଦଳେଇଙ୍କ ନେତୃତ୍ୱରେ କାଉନ୍ସିଲରମାନେ ବିଜେଡି ସଂଗଠନ ସମ୍ପାଦକଙ୍କୁ ଭେଟି ଆଲୋଚନା କରିଥିବା ୭ ନଂ. ଓ୍ବାର୍ଡ଼ କାଉନସିଲର କୃଷ୍ଣଚନ୍ଦ୍ର ରଣା କହିଛନ୍ତି। ତେବେ ଖୁବ୍ ଶୀଘ୍ର ସମସ୍ତ ସମସ୍ୟାକୁ ନେଇ ଏକ ଲିଖିତ ଅଭିଯୋଗ ବିଭାଗୀୟ ମନ୍ତ୍ରୀ ଓ ଅଧିକାରୀଙ୍କ ନିକଟରେ ଦାଖଲ କରାଯିବ ବୋଲି ମଧ୍ୟ କହିଥିଲେ।
ପ୍ରକାଶଯୋଗ୍ୟ, ଗତ ସୋମବାର ହାଟଡ଼ିହୀ ବ୍ଲକ୍ରେ ଜିଲାପାଳଙ୍କ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ଉଭୟ ଅଧ୍ୟକ୍ଷା ଏବଂ କାଉନ୍ସିଲରମାନେ ପୃଥକ ଭାବେ ଦାବିପତ୍ର ପ୍ରଦାନ କରିବା ଘଟଣା ଚର୍ଚ୍ଚାକୁ ଆସିଥିଲା। ପରବର୍ତ୍ତୀ ସମୟରେ ଘଟଣାରେ ପରୋକ୍ଷ ଭାବେ ଜଡ଼ିତ ଥିବା ବିଜେଡି ଯୁବନେତା ତଥା ପୂର୍ବତନ ପୌରାଧ୍ୟକ୍ଷ ଶାନ୍ତନୁ ସେଠୀଙ୍କୁ ବିଜେଡିରୁ ବହିଷ୍କାର କରିବା ଘଟଣା ରୋଚକ ମୋଡ଼ ନେଇଥିଲା।