ଅନୁଗୋଳ ଅଫିସ,୨୪।୪: ନିର୍ବାଚନ ପରେ ଅନୁଗୋଳ ପୌର ପରିଷଦର ପ୍ରଥମ ବୈଠକ ଶୁକ୍ରବାର ଅନୁଷ୍ଠିତ ହୋଇଯାଇଛି। ନଗରପାଳ ଅକ୍ଷୟ କୁମାର ସାମନ୍ତଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଥିଲା। ତେବେ ପୌରାଞ୍ଚଳର ଉନ୍ନୟନ କାର୍ଯ୍ୟ ପାଇଁ ନିର୍ବାଚନ ପୂର୍ବରୁ ୬୦ଟି ଟେଣ୍ଡର କରାଯାଇଥିବାରୁ ତାହାକୁ ନେଇ ନବନିର୍ବାଚିତ କାଉନସିଲରମାନେ ଅସନ୍ତୋଷ ପ୍ରକାଶ କରିଥିଲେ। ନୂଆ ପରିଷଦ ଗଠନ ପୂର୍ବରୁ କାହିଁକି ତରବରରେ ଟେଣ୍ଡର ଡକାଗଲା ତାହାକୁ ନେଇ ସେମାନେ ପ୍ରଶ୍ନ ଉଠାଇଥିଲେ। ସେହିପରି ଜିଲା ମହୋତ୍ସବକୁ ନିମନ୍ତ୍ରଣ କରାଯାଇ ନ ଥିବାରୁ କାଉନସିଲରମାନେ ତାହାକୁ ନିନ୍ଦା କରିଥିଲେ। ତେବେ ନିର୍ବାଚନ ବେଳେ ଭୋଟରମାନଙ୍କୁ ଦିଆଯାଇଥିବା ବିଭିନ୍ନ ପ୍ରତିଶ୍ରୁତି ସମ୍ପର୍କରେ ଏହି ପ୍ରଥମ ବୈଠକରେ ସେପରି ଆଲୋଚନା ହୋଇ ନ ଥିବା ସୂଚନା ମିଳିଛି। ତେବେ ପୌରାଞ୍ଚଳରେ ଥିବା ୨୧ଟି ଅଙ୍ଗନଓ୍ବାଡିର ନିଜସ୍ବ ଗୃହ ନିର୍ମାଣ ହୋଇପାରୁ ନ ଥିବାରୁ ତାହା ଉପରେ ଜୋରଦାର ଆଲୋଚନା ହୋଇଥିଲା। ଏଥିପାଇଁ ୬ ବର୍ଷ ହେଲା ଅର୍ଥ ପଡ଼ିରହିଥିଲେ ମଧ୍ୟ ବିଭିନ୍ନ କ୍ଲବ ଘର, ଭଡ଼ା ଘରେ ଏହି ଅଙ୍ଗନଓ୍ବାଡି କେନ୍ଦ୍ରଗୁଡ଼ିକ ଚାଲିଥିବାରୁ ଅସନ୍ତୋଷ ବ୍ୟକ୍ତ କରାଯାଇଥିଲା। ସେହିପରି ପୂର୍ବରୁ ସମ୍ପୂର୍ଣ୍ଣ ହୋଇଥିବା ପାନୀୟ ଜଳ ପ୍ରକଳ୍ପଗୁଡ଼ିକର ରକ୍ଷଣାବେକ୍ଷଣ କରାଯିବା ସହ ଓ୍ବାର୍ଟର ଏଟିଏମ୍ ବ୍ୟବସ୍ଥା କରିବାକୁ ଦାବି କରାଯାଇଥିଲା। ପୌରପାଳିକାରେ ଓ୍ବାର୍ଡ ଅଫିସ ଖୋଲିବାକୁ ଦାବି କରାଯାଇଥିଲା। କଦମ ପଡ଼ିଆରେ ଦୋକାନ ଘର ନିଲାମ ଦିଆଯାଇଥିବା ବେଳେ କମ୍ ମୂଲ୍ୟ ନିର୍ଦ୍ଧାରଣ ଓ ନିର୍ବାଚନ ପୂର୍ବରୁ ଭେଣ୍ଡିଂ ଜୋନ ଉଦ୍ଘାଟନ କରାଯିବା ନେଇ ବୈଠକରେ ଅସନ୍ତୋଷ ବ୍ୟକ୍ତ କରାଯାଇଥିଲା। ଅନ୍ୟମାନଙ୍କ ମଧ୍ୟରେ ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ, ଉପନଗରପାଳ ଅନୁପମା ସାହୁ, ବିଧାୟକ ଓ ଏମ୍ପିଙ୍କ ପ୍ରତିନିଧି ଏବଂ ସମସ୍ତ କାଉନସିଲର ଉପସ୍ଥିତ ଥିଲେ।