କେନ୍ଦୁଝର,୧୦।୧୧(ନରେଶ ଚନ୍ଦ୍ର ପଟ୍ଟନାୟକ):କେନ୍ଦୁଝର ଜିଲା ଚମ୍ପୁଆ ରେଞ୍ଜ କାଳିକାପ୍ରସାଦ ବିଟ୍ ଅଧୀନସ୍ଥ କୃଷ୍ଣପୁର ସଂରକ୍ଷିତ ଜଙ୍ଗଲରେ ବେଆଇନ ଗଛ କଟା ଅଭିଯୋଗ ପରେ ବନ ବିଭାଗ ପକ୍ଷରୁ ହେଉଥିବା ମୂଳ ଗଣିତ ଅଧାରେ ଅଟକିଛି। ନିଜ ଦୋଷକୁ ଲୁଚାଇବାକୁ ବିଭାଗ ଗଣିତ ବନ୍ଦ କରିଛି। ଏଥିସହ ଡିଏଫ୍ଓଙ୍କ ଆଦେଶକୁ ଅବମାନନା କରାଯାଇଥିବା ଗ୍ରାମବାସୀ ଅଭିଯୋଗ କରିବା ସହ ଅସନ୍ତୋଷ ବ୍ୟକ୍ତ କରିଛନ୍ତି।
ସୂଚନା ଅନୁଯାୟୀ, କୃଷ୍ଣପୁର ସଂରକ୍ଷିତ ଜଙ୍ଗଲରୁ ୨୫୦୫ଟି ୟୁକାଲିପଟାସ ଗଛ କାଟିବାକୁ ଡିଏଫ୍ଓ ଅନୁମତି ଦେଇଥିଲେ। ତଦାରଖ ଅଭାବରୁ ଅନୁମତିଠାରୁ ଅଧିକ ଗଛ କଟାଯାଇଥିବା ନେଇ ସ୍ଥାନୀୟ ଲୋକ ଜିଲାପାଳ, ଡିଏଫ୍ଓ, ଚମ୍ପୁଆ ଉପଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଅଭିଯୋଗ ପରେ କୃଷ୍ଣପୁର ବନ ସୁରକ୍ଷା ସମିତି ଦ୍ୱାରା କଟାଯାଇଥିବା ଗଛର ମୂଳ ଗଣତି ପାଇଁ ଡିଏଫ୍ଓ ଧନ୍ରାଜ ଏଚ୍ଡି ଚିଠି ସଂଖ୍ୟା ୩୦୮୩, ୯ ଅକ୍ଟୋବର ୨୦୨୪ରେ ଆଦେଶ କରିଥିଲେ। ଗଣତି କାର୍ଯ୍ୟରେ ଟିମ୍ ଲିଡର ଭାବେ ଚମ୍ପୁଆ ବନପାଳ ସୁନିତା ବାଘେଲ, ବାଲିବନ୍ଧ ବନପାଳ ବୁଲୁ ନାହକ, ଯୋଡ଼ା ବନପାଳ ତ୍ରିନାଥ ଜେନା, ବାମେବାରୀ ବନପାଳ ରାଜେନ୍ଦ୍ର ଜେନା ଏବଂ ଉଖୁଣ୍ଡା ବନପାଳ ପ୍ରମୋଦ ବେହେରାଙ୍କୁ ଦାୟିତ୍ୱ ଦିଆଯାଇଥିଲା। ତାଙ୍କ ଅଧୀନରେ ବନରକ୍ଷୀ ଏବଂ ସ୍କ୍ବାର୍ଡ କର୍ମଚାରୀ କାର୍ଯ୍ୟରେ ସହଯୋଗ କରିବାକୁ ଚିଠିରେ ଉଲ୍ଲେଖ ରହିଥିଲା। ଗଣତି ବେଳେ ଅନୁମତିଠାରୁ ଅଧିକ ଗଛ କଟାଯାଇଥିବା ଜଣାପଡ଼ିଥିଲା। ତେବେ ବେଆଇନ କାମ ଧରା ପଡ଼ିଯିବା ଭୟରେ ଅଧାରୁ ଗଣତି ବନ୍ଦ କରି ଦିଆଗଲା ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଦୀର୍ଘ ୧ ମାସ ପରେ ମଧ୍ୟ ସ୍ଥାନୀୟ ବନ ବିଭାଗ ଜାଣିଶୁଣି କଟା ଗଛର ମୂଳ ଗଣତି ଶେଷ କରୁ ନ ଥିବାରୁ ଅସନ୍ତୋଷ ପ୍ରକାଶ ପାଇଛି।
ପ୍ରକାଶଯୋଗ୍ୟ, ଅକ୍ଟୋବର ୨୯ରେ ବଡ଼ବିଲ ରେଞ୍ଜ ହାୟରପୁରଠାରେ ଥିବା ଏକ କମ୍ପାନୀ ରାସ୍ତା ପାଇଁ ୯ଟି ଗଛ ଏବଂ ୬ଟି ଗଛର ଡାଳ କାଟିଥିଲା। ବନ ବିଭାଗ ଉକ୍ତ କମ୍ପାନୀର ହାଇୱା ଗାଡ଼ି ଜବତ କରିବା ସହ ୩ ଜଣଙ୍କ ନାମରେ ମାମଲା ରୁଜୁ କରିଥିଲା। ମାତ୍ର ଚମ୍ପୁଆ ରେଞ୍ଜରେ ବେଆଇନ ଗଛ କଟା ମାମଲାରେ ବନ ବିଭାଗ ନିଜର ସୁରକ୍ଷା ପାଇଁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ। କ୍ଷୟକ୍ଷତି ଆକଳନ କରି ଦୋଷୀଙ୍କଠାରୁ ଭରଣା କରିବା ସହ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି। ଅତିରିକ୍ତ ବନ ସଂରକ୍ଷକ ଅଶୋକ ଦାସ କହିଛନ୍ତି, ଗଣନା ସରିନି। ଅଧିକ ଗଛ କଡ଼ାଯାଇଥିବା ଜଣାପଡ଼ିଛି।