ମୋଦି ସରକାରଙ୍କ କାଉଣ୍ଟ ଡାଉନ ଆରମ୍ଭ,ମିଳିତ ଭାବେ ନିର୍ବାଚନ ଲଢ଼ିଲେ ୨୦୨୪ରେ ମହାରାଷ୍ଟ୍ରରେ ୪୦ ଆସନରେ ଜିତିବ ଏମଭିଏ: କଂଗ୍ରେସ…

ମୁମ୍ବାଇ,୪।୬ : ମହାରାଷ୍ଟ୍ରର ବରିଷ୍ଠ କଂଗ୍ରେସ ନେତା ବାଲାସାହେବ ଥୋରାଟ କହିଛନ୍ତି ଯଦି ମହା ବିକାଶ ଅଘାଡି (ଏମଭିଏ) ମିଳିତ ମେଣ୍ଟରେ କଂଗ୍ରେସ, ଶିବସେନା (ୟୁବିଟି) ଏବଂ ଏନସିପି ମିଳିତ ଭାବେ ୨୦୨୪ ନିର୍ବାଚନରେ ଲଢ଼ିବେ, ତେବେ ଏମଭିଏ ମହାରାଷ୍ଟ୍ରରେ ୪୮ ଟି ଲୋକସଭା ଆସନ ମଧ୍ୟରୁ ଏହା ୪୦ ସିଟ ଜିତିବ। ରାଜ୍ୟ କଂଗ୍ରେସ ସଭାପତି ନାନା ପାଟୋଲ କହିଛନ୍ତି କର୍ମୀମାନେ ଚାହୁଁଛନ୍ତି ଦଳ ସର୍ବାଧିକ ସଂଖ୍ୟକ ଆସନରେ ପ୍ରତିଦ୍ୱନ୍ଦ୍ୱିତା କରୁ।

ଥୋରାଟ କହିଛନ୍ତି ଯେଉଁ ଆସନରେ କଂଗ୍ରେସ ପୂର୍ବରୁ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ନ ଥିଲା, କିନ୍ତୁ ଏହାର ଭଲ ସମର୍ଥନ ଆଧାର ରହିଛି, ଏମଭିଏରେ ଆସନ ବଣ୍ଟନରେ ସେସବୁ ଦଳକୁ ଦିଆଯିବା ଉଚିତ। ଦଳର ଅଧିକାରୀମାନେ ଏହି ଆସନଗୁଡିକ ଉପରେ ଭାଗ ନେବାକୁ ରାଜ୍ୟ ନେତୃତ୍ୱଙ୍କ ନିକଟରେ ଦାବି କରିଛନ୍ତି। କଂଗ୍ରେସ ବିଧାନସଭା ଦଳର ନେତା ଥୋରାଟ କହିଛନ୍ତି ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରା ଯୋଗୁଁ ଦେଶର ଲୋକମାନେ ସେମାନଙ୍କ ସମ୍ମୁଖୀନ ହେଉଥିବା ସମସ୍ୟା ବିଷୟରେ ଅବଗତ ହୋଇଛନ୍ତି।

ଏହି ସମୟରେ, ପାଟୋଲ କହିଛନ୍ତି ଦଳର ଦୁଇ ଦିନିଆ ସମୀକ୍ଷା ବୈଠକରେ ସାଂଗଠନିକ ଶକ୍ତି ଆକଳନ କରିବା ଏବଂ ଦଳର କର୍ମୀମାନଙ୍କ କାର୍ଯ୍ୟ ଉପରେ ଗୁରୁତ୍ୱାରୋପ କରାଯାଇଥିଲା। ଯାହାଦ୍ୱାରା ଏମଭିଏ ସର୍ବାଧିକ ଆସନ ଜିତି ପାରିବ। ସିଟ ବାଣ୍ଟିବା ସୂତ୍ର ଏପର୍ଯ୍ୟନ୍ତ ସ୍ଥିର ହୋଇନାହିଁ। ଆମର କର୍ମକର୍ତ୍ତା କହିଛନ୍ତି କଂଗ୍ରେସ ସର୍ବାଧିକ ଆସନରେ ପ୍ରତିଦ୍ୱନ୍ଦ୍ୱିତା କରିବା ଉଚିତ। ଆମେ ଏକ ଜାତୀୟ ଦଳ। ସେ ଦାବି କରିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କ ପାଇଁ କାଉଣ୍ଟ ଡାଉନ ଆରମ୍ଭ ହୋଇଛି। ମୋଦି ସରକାରଙ୍କୁ ପରାସ୍ତ କରି ଦେଶକୁ ବଞ୍ଚାଇବା ପାଇଁ ଆମେ ମିଳିତ ଭାବେ କାର୍ଯ୍ୟ କରିବୁ। କେନ୍ଦ୍ର ଏବଂ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ସରକାରଙ୍କ ବିରୋଧରେ ଲୋକଙ୍କ ମଧ୍ୟରେ ଅସନ୍ତୋଷ ରହିଛି।