ନୂଆଦିଲ୍ଲୀ, ୯ା୮ : ଅଭିନେତା ସୁଶାନ୍ତ ସିଂ ମୃତ୍ୟୁ ମାମଲାରେ ଅଭିଯୁକ୍ତ ଅଭିନେତ୍ରୀ ତଥା ସୁଶାନ୍ତଙ୍କ ପ୍ରେମିକା ରିଆ ଚକ୍ରବର୍ତ୍ତୀ ସୁପ୍ରିମକୋର୍ଟରେ ମାମଲା ସ୍ଥାନାନ୍ତର ନେଇ କରିଥିବା ଆବେଦନ ବିରୋଧରେ ଶନିବାର କାଉଣ୍ଟର ଆଫିଡେଭିଟ୍ ଦାଖଲ କରାଯାଇଛି। ସୁଶାନ୍ତଙ୍କ ବାପା କେ. କେ. ସିଂ ଏହି କାଉଣ୍ଟର ଆଫିଡେଭିଟ୍ ଦାଖଲ କରିଥିବାବେଳେ ମାମଲାର ଶୁଣାଣି ୧୧ରେ କରାଯିବ। କାଉଣ୍ଟର ଆଫିଡେଭିଟ୍ରେ ସିଂ ଦର୍ଶାଇଛନ୍ତି ତଦନ୍ତ ଦାୟିତ୍ୱ ସିବିଆଇକୁ ଦିଆଯାଇଥିବାବେଳେ ମାମଲାର ମୁମ୍ବାଇ ସ୍ଥାନାନ୍ତର ଲାଗି ରିଆ କରିଥିବା ଆବେଦନର ମାନେ କିଛିନାହିଁ। ଏଥିସହ ମୁଖ୍ୟ ଅଭିଯୁକ୍ତ ରିଆ ସାକ୍ଷୀମାନଙ୍କୁ ପ୍ରଭାବିତ କରୁଥିବା ସିଂ ଅଭିଯୋଗ କରିଛନ୍ତି। ମାମଲାର ମୁଖ୍ୟ ସାକ୍ଷୀ ସିଦ୍ଧାର୍ଥ ପିଠାନିଙ୍କୁ ସେ ପ୍ରଭାବିତ କରିଥିବା ସୁଶାନ୍ତଙ୍କ ବାପା ଦର୍ଶାଇଛନ୍ତି। ପୂର୍ବରୁ ସିଂ ରିଆ ଓ ଅନ୍ୟ ୫ ଜଣଙ୍କ ବିରୋଧରେ ଏତଲା ଦାଏର କରିଥିଲେ।
