କଳିଙ୍ଗନଗର,୨୫।୬(ଡି.ଏନ.ଏ.): ଯାଜପୁର ଜିଲା କଳିଙ୍ଗନଗର ଥାନା ଅନ୍ତର୍ଗତ ଗୋଲଗାଁ ନିକଟରେ ଏକ ନକଲି ସିମେଣ୍ଟ କାରଖାନାକୁ ପୋଲିସ ଗୁରୁବାର ରାତିରେ ଠାବ କରିଛି। ଏଥିସହିତ ଘଟଣାସ୍ଥଳରୁ ପାଖାପାଖି ୨୦୦ ବସ୍ତାରୁ ଊର୍ଦ୍ଧ୍ୱ ସିମେଣ୍ଟ ବସ୍ତା ଜବତ କରିଛି। ଏହି ଘାଟଣାରେ ପୋଲିସ ୪ଜଣ (ସିମେଣ୍ଟ କାରଖାନାର ସୁପରଭାଇଜର, ମାଲିକ, ଟ୍ରକ୍ ଡ୍ରାଇଭର ଓ ଟ୍ରକ ମାଲିକ)ଙ୍କୁ ଅଟକ ରଖି ପଚରାଉଚରା ଚଳାଇଛି। ଏହି ନକଲି କାରଖାନାର ମାଲିକ ଜଣେ ପ୍ରଭାବଶାଳୀ ନେତାଙ୍କ ସମ୍ପର୍କୀୟ ହୋଇଥିବା ଚର୍ଚ୍ଚା ଜୋର ଧରିଛି। ତେବେ ପୋଲିସ ଥାନାରେ ଅଟକ ରଖିଥିବା ବ୍ୟକ୍ତିଙ୍କ ମଧ୍ୟରେ ସମ୍ପୃକ୍ତ ମୁଖ୍ୟ ଅଭିଯୁକ୍ତ ଅଛନ୍ତିକି ନାହିଁ ପୋଲିସଠାରୁ କୌଣସି ସୂଚନା ମିଳିନାନହିଁ। ତଦନ୍ତରେ ବାଧା ଉପୁଜିବା ଆଶଙ୍କାରେ ପୋଲିସ ଅଟକ ବ୍ୟକ୍ତିଙ୍କ ନାଁ ସ୍ପଷ୍ଟ କରୁନାହିଁ। ତେବେ ଖୁବ୍ଶୀଘ୍ର ଏହାର ପର୍ଦ୍ଦାଫାଶ କରାଯିବ ବୋଲି ପୋଲିସ କହିଛି। ଅନ୍ୟପକ୍ଷରେ ମୁଖ୍ୟ ଅଭିଯୁକ୍ତଙ୍କୁ ଖସାଇ ଦେବାକୁ ପୋଲିସ ଉପରେ ଚାପ ପଡୁଥିବା ଚର୍ଚ୍ଚା ଜୋର ଧରିଛି।
ଯୋଗ୍ୟ, ୨ ବର୍ଷରୁ ଊର୍ଦ୍ଧ୍ୱ ହେବ ଏହି ନକଲି ସିମେଣ୍ଟ କାରଖାନା ଚାଲିଥିଲା। ପୋଲିସ କୌଣସି ସୂତ୍ରରୁ ଖବର ପାଇ ଚଢ଼ାଉ କରିଥିଲା। ଚଢ଼ାଉ ସମୟରେ ଏକ ପୁରୁଣା ରାଇସ ମିଲ ମେଶିନ ପୋଲିସ ଦେଖିଥିଲା। ଏହି ମେଶିନରେରେ ନଷ୍ଟ ହୋଇଯାଇଥିବା ମୁଣ୍ଡା ସିମେଣ୍ଟକୁ ଗୁଣ୍ଡ କରାଯାଇ ଅଲଟ୍ରାଟେକ ନାମ ଲେଖାଥିବା ସିମେଣ୍ଟ ବସ୍ତାରେ ଭର୍ତ୍ତି କରି ବିକ୍ରି କରାଯାଉଥିବା ପୋଲିସ ଜାଣିବାକୁ ପାଇଥିଲା। ଏପରି କି ନକଲି ସିମେଣ୍ଟକୁ ଅସଲି ସିମେଣ୍ଟଠାରୁ ମାତ୍ର ୨୦ରୁ ୩୦ଟଙ୍କା କମ ମୂଲ୍ୟରେ ବିକ୍ରି କରି ସମ୍ପୃକ୍ତ ମାଲିକ ମାଲାମାଲ ହେଉଥିଲେ। ତେବେ କଳିଙ୍ଗନଗର-ଚଣ୍ଡିଖୋଲ ତ୍ୱରିତ ରାଜପଥର ୨୦୦ ମିଟର ଦୂରରେ ଏହି କାରଖାନା ଚାଲୁଥିଲେ ମଧ୍ୟ ପୋଲିସ ଜାଣି ନ ପରିବା ଘଟଣା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।