ଭୁବନେଶ୍ୱର,୧୯।୯ (ବ୍ୟୁରୋ):ନକଲି ଔଷଧ ବିକ୍ରି କରୁଥିଲେ ପୋଲିସ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବ। ଏନେଇ ରବିବାର ଓଡ଼ିଶା ପୋଲିସ ଟୁଇଟ୍ ମାଧ୍ୟମରେ ଔଷଧ ବିକ୍ରେତାଙ୍କୁ ସତର୍କ କରାଇଛି। ଉକ୍ତ ଟୁଇଟ୍ରେ ଉଲ୍ଲେଖ କରାଯାଇଛି ଯେ, ଔଷଧ ସଞ୍ଜୀବନୀ ସଦୃଶ। ଏହା ମଣିଷକୁ ମୃତ୍ୟୁ ମୁଖରୁ ରକ୍ଷା କରିଥାଏ। କିନ୍ତୁ କିଛି ଲାଭଖୋର ବ୍ୟବସାୟୀ ଓଡ଼ିଶାର ପ୍ରମୁଖ ସହରଗୁଡ଼ିରେ ନକଲି ଔଷଧର କାରବାର କରି ମନୁଷ୍ୟର ଜୀବନ ସହ ଖେଳୁଛନ୍ତି। ତେଣୁ ନକଲି ଔଷଧ ବିକ୍ରି କରୁଥିଲେ ଏବେଠୁ ସାବଧାନ ହୋଇଯାଅ। ନଚେତ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। କୌଣସି ବ୍ୟବସାୟୀ ନକଲି ଔଷଧ କାରବାର ସହ ସଂପୃକ୍ତ ଥିବା ପ୍ରମାଣ ମିଳିଲେ ଓଡ଼ିଶା ପୋଲିସ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ସୂଚନା ଦିଆଯାଇଛି। ସୂଚନାନୁସାରେ, ଟେଲ୍ମା-୪୦, ଟେଲ୍ମା ଏଏମ୍ ଔଷଧକୁ ନକଲି କରାଯାଇ ଦାମୀ ବ୍ରାଣ୍ଡ୍ କମ୍ପାନୀ ଖୋଳରେ ପ୍ୟାକିଂ କରି ଭୁବନେଶ୍ୱରରେ ବିକ୍ରି କରାଯାଉଥିବା ନେଇ ପ୍ରଥମେ ଅଭିଯୋଗ ଆସିଥିଲା। ଏହାକୁ ଡ୍ରଗ୍ସ କଣ୍ଟ୍ରୋଲର ଗୁରୁତ୍ୱର ସହ ଗ୍ରହଣ କରିଥିଲେ। ବିଭାଗ ପକ୍ଷରୁ ସ୍ବତନ୍ତ୍ର ଟିମ୍ ଭୁବନେଶ୍ୱରର ବିଭିନ୍ନ ଔଷଧ ଦୋକାନରେ ଚଢାଉ କରିଥିଲା। ଯାଞ୍ଚ ସମୟରେ ଏହି କାରବାରର ଚେର କଟକକୁ ଲମ୍ବିଥିବା ଜଣାପଡିଥିଲା। ପରବର୍ତ୍ତୀ ସମୟରେ କଟକର ଉକ୍ତ ଔଷଧର ୨ ଷ୍ଟକିଷ୍ଟଙ୍କୁ ଗିରଫ କରାଯାଇଥିଲା।
