ନୂଆଦିଲ୍ଲୀ, ୮।୨: ଦେଶ କରୋନା ଲଢ଼େଇରେ ବିଜୟୀ ହୋଇଛି। ଭାରତର ସଫଳତାକୁ ବିଦେଶୀ ରାଷ୍ଟ୍ର ପ୍ରଶଂସା କରୁଛନ୍ତି। ତେବେ ବିରୋଧୀ ଦଳ ପକ୍ଷରୁ ଏହାକୁ ନେଇ ସମାଲୋଚନା କରାଯାଉଛି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ରାଜ୍ୟ ସଭାରେ କହିଛନ୍ତି। ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଭିଭାଷଣ ଉପରେ ହୋଇଥିବା ଚର୍ଚ୍ଚାର ଉତ୍ତରରେ ସେ ଏଭଳି କହିଛନ୍ତି। ସରକାର ଯୋଜନାବଦ୍ଧ ଭାବେ କରୋନା ବିରୋଧରେ ଲଢ଼େଇ ଜାରି ରଖିଥିବା ବେଳେ ବିରୋଧୀଙ୍କ ପାଇଁ ଏହା ଏକ ଉପହାସ ପାଲଟି ଥିବା ମୋଦି ପ୍ରକାଶ କରିଛନ୍ତି। କରୋନା ଲଢ଼େଇରେ ଟିକା ପ୍ରସ୍ତୁତ ହୋଇ ନ ଥିବା ସମୟରେ ଭାରତ ୧୫୦ ଦେଶରେ ଔଷଧ ପହଞ୍ଚାଇ ନିଜର ବିଦେଶନୀତିରୁ ସୁଦୃଢ଼ କରି ପାରିଛି। ଏକ୍ଷେତ୍ରରେ ଦେଶରେ କେନ୍ଦ୍ର ସରକାର ସମସ୍ତ ରାଜ୍ୟ ସରକାରଙ୍କ ସହିତ ମିଳିମିଶି କାର୍ଯ୍ୟ କରୁଛନ୍ତି। ସେହିପରି ସଂସଦରେ ଚାଷୀ ଆନ୍ଦୋଳନକୁ ନେଇ ଚର୍ଚ୍ଚା ହୋଇଛି। ଏପରିସ୍ଥଳେ ବିରୋଧୀ ଦଳ ନୀରବତା ଅବଲମ୍ବନ କରିଥିବା ସେ କହିଛନ୍ତି। ସରକାର ୧୦ କୋଟି ଚାଷୀଙ୍କ ବିକାଶ ଲାଗି ଯୋଜନା କରିଛନ୍ତି। ସଂଶୋଧିତ କୃଷି ଆଇନରେ ସର୍ବନିମ୍ନ ସହାୟକ ମୂଲ୍ୟ ନେଇ କେତେକ ଭ୍ରମାତ୍ମକ ପ୍ରଚାର କରାଯାଉଛି। ତେବେ ସର୍ବନିମ୍ନ ସହାୟକ ଥିଲା, ରହିଛି ଏବଂ ରହିବ ବୋଲି ମୋଦି କହିଛନ୍ତି। ଭାରତ ପୃଥିବୀର ବୃହତ ଗଣତନ୍ତ୍ର। ଦେଶରେ ଗଣତାନ୍ତ୍ରିକ ବ୍ୟବସ୍ଥା ସତ୍ୟ, ଶିବ ଏବଂ ସୁନ୍ଦର ଉପରେ ପର୍ଯ୍ୟବେସିତ ବୋଲି ସେ କହିଛନ୍ତି। ଏହା ସହିତ ମୋଦି କେନ୍ଦ୍ର ସରକାର ବିଭିନ୍ନ କ୍ଷେତ୍ରରେ ହାସଲ କରିଥିବା ସଫଳତା ସମ୍ପର୍କରେ ସୂଚନା ଦେଇଛନ୍ତି।
